Read turkana Akitamunet a Etal 8 Bible Online

Akitamunet a Etal 8 - turkana bible

Akitamunet a Etal 8

¹“Kiwapa lokojokon ngitalio daang lu kainak ayong esi akolongit naga, sodi toyareta esi, talalakearotor sodi toloma nakwap nakolong echikakini Ekapolon Akuj taapaakus.

²Kitamutu eger lokolong kirikio esi Ekapolon Akuj na erai Akuj kus analosit anakooyen kana, kisitor nariet a ngikaru a alutomwon-omwon kangulu. Abu ngesi yau ngichan lukaalak nikus kiningio esi toyenea ngakiro na isakete esi akisub, nabo taanyunea kiwapete esi ngitalio keng.

³Abu ngesi kitanyam esi akoro sodi kiinak akimuj be mana tanyama, akimuj nakolong nyenyama esi ka taapaakus a ache. Asubi ngesi kongina sodi kitatamea esi atamar nyejoikinit itwaan igienokin imugati bon toyarea, pearai ejoikinit igienokin ngakiro daang na elimuni Ekapolon Akuj.

⁴Alokaru alutomwon-omwon kalu, nyekorisiuna ngiworui kus nabo nyebwo ngakejen kus.

⁵Toyena atamar kirionokini esi Ekapolon Akuj na erai Akuj kus loger lo erionokinea itwaan ngide keng.

⁶Aloger kangolo, tosuba ngakiro nakidungokinit esi Ekapolon Akuj. Kibooyoto iwapito ngitalio, keng nabo tokera ngesi.

⁷Kiyauni esi Ekapolon Akuj na erai Akuj kus nakwap naajokon, akwap na eyakasi ngangololin ka ngileleae, ta ngichwae lu ebukuno ngakipi nadipoe ka lomukur.

⁸Akwap na ekoniuni ngakanoi, ka ngimomwa, ka ngamusabib, ka ngameyana, ka ngalam, ka ngikito a akimiet, ta akimiet a ao.

⁹Nyikinyami esi akoro kaina jik kori emam ibore iitunete. Eyakasi ngasua tooma natabab a akwap kangina, nabo ipedorete esi abokun ngasua nanyangayek alomukur a akwap kangina.

¹⁰ Iriamunete esi ibore daang ni isakete akinyam, nabo ibuakinete Ekapolon Akuj na erai Akuj kus alakara kotere akwap naajokon kiinak ngesi esi.

¹¹“Warasi nyikimuriak Ekapolon Akuj na erai Akuj kus. Warasi nyiingero akiwap tani epei a ngitalio keng alu kainak ayong esi akolongit naga.

¹²Ani iriamunete esi akimuj daang ka akiduk ngakais naajokak na iboikinosi,

¹³nabo ani iatakinosi ngaatuk ka ngamesekin kus, ngaropiyae ka egolit kus, ta ngiboro kus daang,

¹⁴warasi nyiiwogakinosi kimuriak Ekapolon Akuj na erai Akuj kus, nakolong kiyuuni esi alo Misiri ani iraakatar ngikedalak.

¹⁵Abu ngesi kitorik esi kisitor nariet naasilon ketubulon ni ayakasi ngimunio luadwarak ka ngikuutanea. Anakwap anakoonon amam ngakipi kangina, abu ngesi kitoleleu ngakipi anataaba anakaagongon kotere esi.

¹⁶Kiinak ngesi esi akimuj nabe mana anariet tanyama, akimuj nakolong nyenyama taapaakus a ache. Abu ngesi kining esi a ngakiro anaationok, sodi ani ekisidi, kitopiarea esi a ngiboro aluajokak.

¹⁷Tokona bocha, nyiitamasi alotai kus ‘Agogongu kosi ka ngikilinga ngesi kianyunea sua ebarit logo’.

¹⁸Kitamutu Ekapolon Akuj na erai Akuj kus kainyo ngesi kiinakini esi agogongu na ibareta. Esubi ngesi kongina kainyo eringa ngesi tani tokona irichakinit achamunet na kolong achamakin ngesi ka taapaakus.

¹⁹Warasi nyikimuriak Ekapolon Akuj na erai Akuj kus kori nyiirearosi akilip ngakujo ngache ka akisub etich kech. Kechikichiki tokona ayong esi atamar ani kisubakis esi kongina, kimunyario esi dir.

²⁰ Ani pekiwap esi Ekapolon Akuj, kimunyario esi loger a ngibukui a luche alu tokona emunyari ngesi iloose esi ngaren.