Read turkana Akitamunet a Etal 9 Bible Online

Akitamunet a Etal 9 - turkana bible

Akitamunet a Etal 9

¹“Topupokisi Ngisirael! Akolongit naga, anang esi ni idokareta ekwakaye angolol a Yorudan sodi toloma nakwap a ngitunga alu eyenikinitae nabo ejwoko noi kidwangito esi. Epolok ngirerea kech nabo eyakasi ngawasea na enangito nadis.

²Ani ngitunga ngikulepek, ewoyak nabo egogong. Eraakasi kesi ngide a Ngianak, lukolong iirarete esi ebeyo, ‘Emam itwaan epedori aweikin ngide a Anak.’

³Nakaneni ingolikinete tokona esi atamar kingarenikini esi Ekapolon Akuj na erai Akuj kus ikoni akim nakariran. Idwangi ngesi kesi iloose esi ngaren, sodi kitwarakineta esi kesi nabo tomunyasi atipei, loger lokolong kichikakinitor ngesi.

⁴“Ani kitwarak Ekapolon Akuj na erai Akuj kus kesi anikus kerumor, nyiilimut tamasi ‘Kiyauni kolong Ekapolon Akuj sua atoloma nakwap naga, ani kiraakar luajokak.’ Meere kongina, itwarakini Ekapolon Akuj ngitunga lu kotere esi kainyo eroko kesi.

⁵Meere ni iraakatar esi luajokak kori ni isubeta ngakiro na iyookino ngesi kimiekinitor esi Ekapolon Akuj ilemarete akwap kech. Itwarakini Ekapolon Akuj kesi ani eraakatar ngitunga luaronok nabo kotere akichikakinet nakolong echikakini ngesi taapaakus Aburaam, ka Isaka, ta Yakobo.

⁶Toyena bocha atamar nyikiinakinit esi Ekapolon Akuj na erai Akuj kus akwap naajokon naga ani iraakatar esi ngitunga luajokak. Meere kongina! Iraakasi esi ngitunga lukechanak.

⁷“Kitamutu eger lokolong itongoeta esi Ekapolon Akuj na erai Akuj anariet. Napei kolong irotokinioto esi alo Misiri tanang akolongit na inanguneta esi nege ingerito esi Ekapolon Akuj.

⁸Tani kolong alomoru a Sinai, ipot esi kitongoa Ekapolon Akuj. Tongo ngesi lokojokon tasak tani amunyar esi.

⁹Atolot ayong kidiama emoru akidiaun ngamoru nadapal na egiritae achamunet nakolong ichamakinotor esi ka Ekapolon Akuj. Eboikin ayong moru ngirwa ngitomwon-omwon, akwaar ka apaaran, emam ibore anyami kori amasi.

¹⁰Abu Ekapolon Akuj kainak ayong ngamoru ngaarei nadapal na egirit ngesi a akan keng a ilope. Egirit ngakiro nasek kilimokinit ngesi esi anakim, akolongit na iriamiriamitotor esi moru.

¹¹ Adaunet a ngirwa alutomwon-omwon kangulu, abu Ekapolon Akuj kainak ayong ngamoru naarei dapal nguna, na egiritae achamunet.

¹²“Sodi katolimok Ekapolon Akuj ayong tama, ‘Tonyou totiyaar alomoru atipei, kainyo asecha ngitunga kon lukolong irikuni iyong alo Misiri, asuba naaronok. Arearosi kesi atipei anakiro ana kolong adungokini ayong kesi atamar tosuba, asubakis kesi akuj kech nasubuna.’

¹³“Katolimok nabo Ekapolon Akuj ayong tama, ‘Ayeni ayong atamar ichanaka ngitunga lugu noi.

¹⁴Wara nyikiratak ayong, kainyo asaki ayong atomunya kesi tojongoi alimit anakwap. Sodi ketiliwo ayong iyong apakeng a ngibukui alukaalak nabo tojwoko noi kidwangito kesi.’

¹⁵“Abu ayong atorei atotiyaun alomoru adakit ngamoru naarei dapal na egiritae achamunet. Ariraunit asarae a akim alomoru.

¹⁶Abu ayong engolik atamar ingero esi ngakiro nakolong kidungokini esi Ekapolon Akuj na erai Akuj kus. Engolik nabo atamar isechakis esi Ekapolon Akuj, ani isubeta akuj nasubuna a asuat kisikwaanikis ka itaok nikile.

¹⁷Abu ayong atochakak ngamoru naarei dapal nguna kwap, atobwangabwanga alongaren kus.

¹⁸Abu nabo ayong atoper a akook alongaren Ekapolon Akuj a ngirwa a ngitomwon-omwon, akwaar ka apaaran, emam ibore anyami kori amasi. Asubi ayong kongina kainyo isechakinito esi Ekapolon Akuj nabo itongoito.

¹⁹Atoem ayong angoit a Akuj naaronon, kainyo angoit ngesi noi adikino kimunyari esi, nakaneni abu Ekapolon Akuj nabo kiira ngakiro kang.

²⁰Angoikinit nabo Ekapolon Akuj tani Aron adikino eari, nakaneni elip ayong nabo kotere Aron dang esaa lopei ngolo.

²¹ Atolem ayong ibore ni a akisech ni isubete esi ngini, ni arai itaok nikile nisuat, sodi atachakak nakim. Abu ayong atobilibili, nabo eriak tanyapidid kikok apua, sodi atobukok apua keng nangolol tolelea kwap emoru.

²²“Ipot esi nabo kitongoa Ekapolon Akuj na erai Akuj kus na iyakatar Tabera, ka Masa, ta Kibiros Ataapa.

²³Ani nabo kimeari ngesi esi alo Kadech Barinea ebala, ‘Toloto tolemasi akwap nakainak ayong esi,’ ipot esi tongero ngesi. Ipot esi nyiigienokinosi ngesi kori nyiiwap ngesi.

²⁴ Ingerito esi jik Ekapolon Akuj napei kolong kianyunor ngoni.

²⁵“Abu ayong atoper a akook alongaren Ekapolon Akuj a ngirwa alutomwon-omwon kangulu kainyo ayeni atamar asaki ngesi amunyar esi jik.

²⁶Elip ayong atama, ‘Ekapolon lo irai Ekapolon Akuj, nyiimunya ngitunga kon a ilope, ngitunga lukolong iyuuni iyong kipud alo Misiri a agogongu kon anaationon.

²⁷Kitamu ngikasubak etich kon ta Aburaam, ka Isaka, ta Yakobo. Nyiimisik akichananu a ngitunga kalu, ka aronis ta akisech kech.

²⁸Ani kemam, elimunete Ngimisiri tamasi, kona epiyorea Ekapolon Akuj akitanang ngitunga keng nakwap nakolong echikakinit ngesi kesi, nabo kona eremitor ngesi kesi, ariku amunyar anariet.

²⁹Nakaneni iseuni kolong iyong ngitunga lugu toliworos ngikon nabo kipud kesi alo Misiri a agogongu kon anaationon.’