Read turkana Yoana 1 Bible Online

Yoana 1 - turkana bible

Yoana 1

¹Kolong eringa akwap nyesubakina, ayei Akiroit, arukito Akiroit ngina ka Akuj, nabo arai Akiroit ngina Akuj.

²Arukito Akiroit ka Akuj napei kolong anakisiakinet.

³Asubi Akuj ibore daang anikeng, emam ibore tani ipei ni asubio emam ngesi.

⁴Ayei akiyar nikeng, sodi toliwor akiyar ngina akicha alotunga.

⁵ Echai akicha anaribu nakaneni nyerapa aribu akicha.

⁶Ameuni Akuj itwaan ni anyaritae Yoana.

⁷Abuni ngesi alimokin ngitunga ngakiro a akicha, sodi kiirareta ngakiro nguna tonupa.

⁸Pearai ngesi akicha, nakaneni abuni ngesi akiruor ngakiro a akicha.

⁹Akicha na erai aka iteni dir naga, akicha na abuni nakwap tochaa anitwaan kadaang.

¹⁰Ayei Akiroit nakwap, tani bo kolong kesubit Akuj akwap anikeng dang, peayenete ngitunga a akwap ngesi.

¹¹Abuni nakwap keng, nakaneni nyechamuna ngitunga keng ngesi.

¹²Nakaneni daang lu achamunete ngesi, ngulu enupete ngakiro keng, ainakin agogongu na eliworotor ngide a Akuj.

¹³Pearaunete kesi ngide a Akuj ani auriunere kona palem sek, meere ekile auriuni kesi, Akuj ngesi erai Apakech.

¹⁴Toliwor Akiroit ngina itwaan eruko ka ngoni erai lo ajakaanit noi eruoro ngakiro na iteni. Engolikisi ngoni apolou keng na aanyuni ngesi ani eraakar Lokookeng a Akuj ana erai Apa, lo edounio erai epei bon.

¹⁵Alimuni Yoana ngakiro keng kirema tama, “Logo ngesi lo kolong eruoro ayong ngakiro keng atamar ebuni ekisidi kang, nakaneni epolot kedwangit ayong, kainyo ayei ngesi kolong tani eringa ayong nyidouno.”

¹⁶Kianyu ngoni daang ajokis a Akuj alobari keng, kiinanakini ngesi ngoni ajokis keng na iyatanakin jiik.

¹⁷Ainakini Akuj ngitunga etal kitoru nia Musa, nakaneni etorunete ajokis ka ngakiro na iteni nia Yesu Kiristo.

¹⁸Emam itwaan nakanuan ni aanyunga Akuj, Lokookeng lo erai epei bon lo eriyan ka Apakeng nabo irudakina lorarum ka Apakeng, ngesi kitodik ngoni Akuj.

¹⁹Tomeasi ngikapolok a Ngiyaudi lu ayakasi Yerusalem ngimurok a akai a Akuj ka ngikengarakinak kech atamar kingita Yoana ebalasi, “Iyong irai ngae?”

²⁰ Nyewouna Yoana atachakin kesi ngakiro. Tolim ngakiro na eleerete tama, “Meere ayong arai Kiristo.”

²¹Kingita ngesi tamasi, “Iyong ngesi ngae? Irai iyong Elija a?” Tatachak Yoana tama, “Meere.” Sodi kingita tamasi, “Irai iyong ekadwaran ngolo a?” Tolim tama, “Meere ayong.”

²² Sodi tolimokis tamasi, “Tolimokinae robo iyong sua atamar iyong ngesi ngae. Kisaki sua atoloto atolimokisi lu kimeunito sua. Ibala tokona iyong ai?”

²³Tatachak Yoana kesi ngakiro nakolong alimuni ekadwaran Isaya ebala, “Ayong ngesi etoil a itwaan ani echala anariet, Kitenikisi erot lo itori Ekapolon!”

²⁴Sodi kingita ngimeanara lu aponito Aloparisayo,

²⁵Yoana tamasi, “Nyo bo ibatisa iyong ngitunga pekirai iyong Kiristo, kori Elija kori ekadwaran a Akuj ngolo?”

²⁶Tatachak Yoana tama, “Ebatisae ayong a ngakipi, nakaneni ewei itwaan alokiding kus ni nyiyenete esi.

²⁷Ngesi ngolo kesidiun ayong, nakaneni nyitemokino ayong tani alachakini ngarukanes a ngamuk keng.”

²⁸Asubasi nguna daang alo Betania, kide angolol a Yorudan, ni ebatisaa Yoana ngitunga.

²⁹Akolongit na atupit ngina, taanyunga Yoana Yesu ebunit nikeng. Sodi tolim tama, “Kingolikisi a! Imesek a Akuj ngin ni elemari ngasechesea a ngitunga anakwap!

³⁰Logo ngesi longoon eruoro ayong ngakiro keng abala, ‘Ebuni itwaan ekisidi kang, epolot ngesi noi kedwangit ayong, kainyo ayei kolong sek ngesi eringa ayong nyidouno.’

³¹Peayeni ayong atamar ngesi ngae, nakaneni abuni ayong ebatisae a ngakipi sodi eteyenunea ngesi Ngisirael.”

³²Tolim Yoana ngakiro na aanyuni ngesi tama, “Engolik Etau a Akuj etiyaun anadis ikoni akuuri min kidiama keng.

³³Peayeni ayong dang ngesi, nakaneni Akuj nakameuni ayong ebatisa a ngakipi, ngesi kalimokini tama, ‘Itwaan ni ingolikini iyong Etau a Akuj etiyaun min kidiama keng ngesi ibatisae a Etau a Akuj.’

³⁴Engolik ayong, nakaneni kalimokinit atamar ngesi erai Lokookeng a Akuj.”

³⁵Akolongit na atupit ngina, awaasi Yoana ka ngirukitos keng ngiarei aapei.

³⁶Sodi kingolik ngesi Yesu elosi, Tolim tama, “Kingolikisi a! Imesek a Akuj ngin.”

³⁷Kiirasi ngirukitos luarei ngulu ngakiro na eruoro ngesi, sodi kiwapakis Yesu.

³⁸Toreun Yesu kingolik kesi iwapito ngesi kingit tama, “Nyo isakete esi?” Tatachut tamasi, “Rabi, aliwae ibooyo iyong?” (Akiroit be Rabi ngesi atamar, “Eketataman”.)

³⁹Tatachak tama, “Potu taanyutu.” (Arai ngisaae ngitomon a asonget a akolong.) Kirukosi ka ngesi taanyut ni ebooyo, kiboyoto ka ngesi akwaar ngina.

⁴⁰Epei aluarei apupete ngakiro a Yoana sodi kiwapakis Yesu ngesi Andirea lokaatokeng a Simon Petero.

⁴¹Kiriamun ngesi ka Simon lokaatokeng atipei tolimok tama, “Kianyu lo iwasakinitae akimiet.” (Ngesi atamar, “Kiristo”.)

⁴²Sodi toriko ngesi Simon nia Yesu. Tokienyik Yesu ngesi tolimok tama, “Iyong kinyaritae Simon lokookeng a Yoana, kinyarao iyong ekiro be Kepa.” (Ekiro be Kepa ngesi atamar Petero kori “ataaba”.)

⁴³Akolongit na atupit ngina, asaki Yesu alosit Galilaya. Kiriamun ka Pilip dio tolimok tama, “Kiwapakinae!” (

⁴⁴Arai Pilip itwaan a ere a Betisaida, alo alomito Andirea ka Petero).

⁴⁵Kiriamun Pilip ka Nasaniel tolimok ngesi tama, “Kianyu sua itwaan nikolong egiri Musa ngakiro keng nakitab a etal, nabo egirete ngikadwarak dang ngakiro keng. Erai ngesi Yesu, lo a Nasaret, lokookeng a Yosep.”

⁴⁶Kingit Nasaniel tama, “Ekoe! Eyei ibore idio kajokon ebuni anakwap a Nasaret a?” Tolimok Pilip ngesi tama, “Bua taanyu.”

⁴⁷Ani ingolikini Yesu Nasaniel ebunit nikeng tolim ngakiro keng tama, “Kingolikisi a! Erai itwaan en Isiraelit dir lo emam amodeanut anikeng!”

⁴⁸Kingit Nasaniel ngesi tama, “Ikokini iyong kiyeni ayong ai?” Tatachak Yesu tama, “Ani eroko Pilip nyenyara iyong, na iyakar iyong kwap ekitoe lo ikwaan ka emeyan, ketee ayong iyong.”

⁴⁹Tatachu Nasaniel tama, “Eketataman, iyong ngesi irai Lokookeng a Akuj! Iyong ngesi irai Ekapolon a Isirael!”

⁵⁰Tolim Yesu tama, “Tokona inupitor iyong ni abalar ayong kengolikini iyong alokwap ekitoe lo ikwaan ka emeyan a? Ianyungari iyong ngakiro naapolok noi na idwangito nugu!”

⁵¹ Sodi alimokin kesi tama, “Kalimokinit ngakiro na iteni dir atamar, ingolikinete adis engaar, nabo ngimalaikae a Akuj edokete kidiama ka atiyaun nia Lokookeng a Itwaan.”