Read turkana Yoana 10 Bible Online

Yoana 10 - turkana bible

Yoana 10

¹Tolim Yesu tama, “Kalimokinit esi ngakiro na iteni dir atamar itwaan ni nyelomari nanok a ngamesekin kitor lokidor, nakaneni kitor wache, ngesi ekokolan nabo erukoot.

²Itwaan ni elomari kitor lokidor ngesi erai ekeyokon.

³Engakini ekagolon ngesi ekidor, epupete ngamesekin etoil keng, enyarae ngesi ngamesekin a ngirora kech, kitwara nikalapatan.

⁴Na itwarunea ngesi ngamesekin nikalapatan, ingarenikini ngesi sodi kiwapakis ngamesekin kainyo eyenete etoil keng.

⁵Nyiwapakinete kesi epeyonon, nakaneni ematarosi, kainyo nyeyenete kesi ngitoilio a ngipeyok.”

⁶Tolimok Yesu kesi akisikwaanet naga, nakaneni nyeyena kesi ngakiro na alimunit ngesi.

⁷Sodi tolim Yesu nabo tama, “Kalimokinit ngakiro na iteni dir atamar ayong arai ekidor a ngamesekin.

⁸Ngitunga daang lukolong kengareniunete ayong, araakasi ngikokolak ka ngirukooi, nabo apot ngamesekin nyiirasi kesi.

⁹Ayong arai ekidor, itwaan cha daang ni elomuni kitoru nikang, eyuunio, elomuni nabo topudo, dio kitanae.

¹⁰Erai ebunitor ekokolan akoko ka akiar ta akinyasun. Abuni ayong sodi toriamuneta esi akiyar, akiyar na erai aka dir.

¹¹“Ayong arai ekeyokon loajokon lo ajalit akiyar kang kotere ngamesekin.

¹²Na ingolikinea ekedalan epeot ebunit, imiekini ngesi ngamesekin kipiiri, kainyo meere ngesi ekeyokon lo erai ngamesekin ngakeng. Nakaneni erwakin epeot ngamesekin totiakatiaka kiala.

¹³Ematar ekedalan kainyo ngesi ekedalan, nakaneni nyekachit ngakiro a ngamesekin.

¹⁴Ayong arai ekeyokon loajokon, ngulu eraakasi ngikang, ayeni, nabo ngulu eraakasi ngikang, kayenete ayong.

¹⁵Loger lopei kayenea ayong Apakang, atoyeni ayong dang Apakang. Nakaneni alemun ayong atajal akiyar kang kotere ngamesekin.

¹⁶ Eyakasi ngamesekin kang ngache na emam ananok kana. Ejoikinit ayong ayauni kesi dang kiirasi etoil kang, sodi toliwor esipanit epei ka ekeyokon epei.

¹⁷“Kamina ayong Apakang anialemunor ayong atajal akiyar kang, sodi ataanyunea nabo akiyar ngina.

¹⁸Emam itwaan elemari akiyar anikang. Ajali ayong elope loger lo asakitor. Apedori ayong akijal, apedori ariamun nabo. Nguna ngesi kadungoki ayong Apa atamar atosub.”

¹⁹Nakaneni totiakas ngitunga nabo kotere ngakiro nguna.

²⁰Apot ngikaalak kech tamasi, “Ekoporit ngesi Ekipe! Ikeripikinit itwaan en. Nyo ipupeto esi ngakiro keng?”

²¹Nakaneni abalasi ngiche, “Nyiruoro itwaan ni ekoporit Ekipe kona! Ikokini Ekipe engaari ngakonyen a emuduk ai?”

²²Ngirwa lu akiporo, ayei Esukukuu lo ilipakinitere Akai a Akuj alo Yerusalem.

²³Alosi Yesu alokai a Akuj ani a ngagulei a Solomon,

²⁴pot ngitunga kiriama ngesi kingita tamasi, “Kitangayae iyong sua tanang ori: tolimokinae sua ngakiro na ileerete dir kirai iyong Kiristo?”

²⁵Tatachak Yesu tama, “Kalimok tete ayong esi, nakaneni nyenupa esi ngakiro kang. Ngitichisio lu asubi ayong a agogongu ka Apakang, kesi idodiunito atamar ayong arai ngesi,

²⁶nakaneni nyinupito esi kainyo meere esi ngamesekin kang.

²⁷Epupete ngamesekin kang etoil kang, nakaneni ayeni ayong kesi, nabo kewapuunete kesi ayong.

²⁸Ainakini ayong kesi akiyar na nyedaun, nyechakarosi kesi jik, nabo emam itwaan kademari ayong anakan kang.

²⁹Apakang lo kainakini ayong idwangit daang, nabo emam itwaan ni epedori akopor anakan ka Apakang.

³⁰Ayong ka Apakang kirai ngipei.”

³¹Kideput ngitunga nabo ngamoru tasaka akimas ngesi.

³²Tolimok Yesu kesi tama, “Asub ayong ngitichisio lukaalak luajokak anikus, lu eponito ani ka Apa. Alotichisio kangulu kadaang a, ali isaketa esi akimas ayong a ngamoru?”

³³ Tatachakis tamasi, “Nyikisaki sua akimas iyong a ngamoru a etich a loajokon, pearai kisaki akimas iyong ani imenya iyong Akuj! Abe irai bo iyong itwaan, nyo isakea iyong aliwor Akuj!”

³⁴Tatachak Yesu kesi tama, “Igiritae Lotal kus atamar ebala Akuj, ‘Iraakasi esi ngakujo.’

³⁵Kiyeni atamar eraakasi na igiritae ngaka iteni jik, sodi tanyara Akuj ngitunga ngulu ngakujo, ngitunga lukolong alimokinio ngakiro nguna.

³⁶Ani lo erai ayong, kaseu ayong Apakang katomeu nakwap. Nyoni bo tokona ibaatar esi emenyi ayong Akuj ani abalar arai ayong Lokookeng a Akuj?

³⁷Nyiinupa robo ngakiro kang erai pekasubi ayong ngitichisio luesaki Apakang atosub.

³⁸Nakaneni ani kasub ayong ngitichisio, tonupa kesi erai tani pakinupete ngakiro kang. Sodi toyeneta esi dir atamar eyei Apa nikang, nabo ayei ayong nika Apa.”

³⁹ Tasaka kesi nabo akirumun Yesu, nakaneni tobuchar ngesi anikech.

⁴⁰Tobongo Yesu nabo ekwakaye a angolol a Yorudan nikolong sek esiakinea Yoana akibatisare ngitunga, dio kiboikin neni.

⁴¹Toloto ngitunga ngikaalak nikeng, tolimut tamasi, “Nyesuba Yoana ngakitoodikinet nakailiilok, nakaneni ngakiro daang na itwaan kaen na eruoro ngesi, eraakasi iteni.”

⁴²Sodi tonupa ngitunga lukaalak ngakiro keng kaneni.