Read turkana Yoana 11 Bible Online

Yoana 11 - turkana bible

Yoana 11

¹Adeaka itwaan ni anyaritae Losaro ni alomit Betania. Arai Betania ere lo alomito Mariam ka Marita nakaatokeng. (

²Arai Mariam ngina nakolong ewasakini Ekapolon Yesu akimiet nakakukunyon nakejen, sodi kisuta a ngitim keng, arai lokaatokeng Losaro adeaka.)

³ Sodi apot ngikaitotoi keng tomeasi itwaan nia Yesu tama, “Ekapolon, edeak lopae kon lo imina iyong.”

⁴Ani iirari Yesu ngakiro nguna, tolim tama, “Meere edeke a Losaro lo etoanea ngesi, erai lo ipuruunere Akuj, erai edeke ngolo eanyunea Lokookeng a Akuj ekipur.”

⁵Amina Yesu Marita ka nakaatokeng ta Losaro.

⁶Nakaneni ani iirari ngesi atamar edeak Losaro, abu toper neni ngirwa ngiarei.

⁷Sodi ani ekisidi tolimok ngirukitos keng tama, “Potu atobongosi nakwap a Yudea.”

⁸Tolimokis ngirukitos keng tamasi, “Eketataman, ngoon ngirwa lupei lugu, asakete ngitunga kaina akimas iyong a ngamoru, isaki tokona iyong nabo alosit inaa?”

⁹Tatachak Yesu tama, “Erai ngisaa a apaaran ngitomon ka ngiarei, kori ai? Ani elosi itwaan naparan, nyibusokin ngesi, kainyo itee akicha a akwap kana.

¹⁰Nakaneni ani elosi itwaan nakwaare, ibusokin kainyo emam akicha anikeng.”

¹¹Tolim Yesu nguna ani erumor kiatak tama, “Ejotoe lopae yok Losaro, nakaneni alosi ayong etekienyu ngesi.”

¹²Tatachut ngirukitos keng tamasi, “Ekapolon, ani kejotoe ngesi ejoker.”

¹³Nakaneni eruoro Yesu atamar atoana Losaro dio tamasi kesi kori ejotoe.

¹⁴Sodi tolimok Yesu kesi ngakiro na ileerete tama, “Atoana Losaro.

¹⁵Nakaneni alakara ayong kotere esi anipakirukitor ayong ka ngesi, sodi tonupeta esi. Potu apana nikeng.”

¹⁶Sodi tolimok Tomas (lo enyaritae emuut) ngirukitos luche tama, “Potu daang erukosi ka Eketataman sodi atotoaketa ka ngesi aapei!”

¹⁷Na adolunio Yesu, torukou Losaro kenuk keper naliel ngirwa nguomwon.

¹⁸Aapi Betania asibit ngakilomitae ngauni alo Yerusalem,

¹⁹aponito ngitunga a Yudea lukaalak akisililing Marita ka Mariam totikokis ngitai kotere akitu alokaatokech.

²⁰Na eirarea Marita atamar ebunit Yesu, tolot kisiriamia ngesi, nakaneni kidong Mariam kai.

²¹Tolimok Marita Yesu tama, “Ekapolon, arai toyei iyong nege, peketoanit lokaatokang!

²²Nakaneni ayeni ayong atamar tani tokona dang, kiinakini Akuj iyong ibore daang ni ilipi iyong.”

²³Tolimok Yesu ngesi tama, “Eyaruni lokaatokon.”

²⁴Tatachak Marita ngesi tama, “Ayeni ayong atamar eyaruni akolongit na esal.”

²⁵Tolimok Yesu ngesi tama, “Ayong ngesi arai ayarun ka akiyar, itwaan cha daang ni eyari tonupite ngakiro kang, nyetoani jik,

²⁶nakaneni itwaan cha daang ni eyari katonupite ayong, nyetoani jik. Inupit iyong ngakiro nugu a?”

²⁷Tatachak tama, “Ee, Ekapolon, anupit ayong atamar iyong irai Kiristo, Lokookeng a Akuj, lokolong abeyo ebuni nakwap.”

²⁸Na arumorea Marita alimun nguna, tobongo dio tanyara nakaatokeng Mariam nikeng bon tolimok tama, “Eyei Eketataman nege kingita iyong.”

²⁹Na eirarea Mariam nguna, tonyou atipei tolot kisiriamia ngesi. (

³⁰Aringa Yesu nyenanguna nadakar, aringa eyei ni esiriamea Marita ngesi.)

³¹Nakaneni ngitunga lu arukito ka Mariam isililingete etikokinito etau, apot kingolikis eger lo apudorea ngesi nikalapatan atipei. Kiwapakis ngesi ebaasi kori elosi ngesi akigoro analiel.

³²Todol Mariam ni ayei Yesu napei engolikinea, kibusokin diyete ngakejen keng tama, “Ekapolon, arai toyei ngoon iyong nege, peketoanit lokaatokang!”

³³Kingolik Yesu ngesi igoro, kingolik tani eger lo egorotor ngitunga lu ewapito ngesi, toriabakin Yesu kialolong noi.

³⁴Kingit kesi tama, “Aliwae inukakinito esi ngesi?” Tatachut tamasi, “Ekapolon, bua taanyunga.”

³⁵Kikalou Yesu.

³⁶Tamasi ngitunga, “Taanyungasi mono esi eger lokeminar ngesi!”

³⁷Nakaneni apot epewae kech tamasi, “Ekoe! Abe angaari bo ngoon ngakonyen a emuduk. Peadikino ngesi iratakini akitu a Losaro a?”

³⁸Tolot Yesu naliel erubakinit ialolongi. Arai aliel ataaba na abokitae tarapakinae amoru nakituk.

³⁹Todungok Yesu kesi tama, “Tolemasi amoru!” Tatachu Marita nakaatokeng kangolo atoanit tama, “Ekapolon, iwuaruni niabosan kainyo aper tokona naliel ngirwa nguomwon!”

⁴⁰Tolimok Yesu ngesi tama, “Pekalimokinit tete ayong iyong atamar ani kinup, ingolikini apolou a Akuj a?”

⁴¹Apot tolemasi amoru, tokienyia Yesu kidiama tama, “Apa, kabuakinit ayong iyong alakara ani kipupio iyong ayong.

⁴²Ayeni atamar kipupi iyong ayong ngirwa daang. Nakaneni alimunit nugu kotere ngitunga lugu, sodi tonupeta kesi atamar iyong kimeuni ayong.”

⁴³Alimunet nguna, kirema tanyara tama, “Losaro, topud nikalapatan!”

⁴⁴Topud ekatoan ngolo nikalapatan, einikinitae ngakan keng ka ngakejen ngiworui lu aliel, nabo abutarit eworu ereet keng. Tolimok Yesu kesi tama, “Talachasi kimiekis tolot.”

⁴⁵Na engolikineta ngitunga lukaalak luaponito nia Mariam na asubi Yesu, apot tonupa.

⁴⁶Nakaneni tolot epewae kech nia Ngiparisayo alimokin na asubi Yesu.

⁴⁷Sodi tochunakinos Ngimurok Luapolok a akai a Akuj ta Ngiparisayo Natuk tamasi, “Ekoe, kikoni ai? Kingolikisi mono esi ngakitoodikinet nakailiilok esubi itwaan en!

⁴⁸Ani kiisik ngoni ngesi esubi nugu, enupete ngitunga daang ngakiro keng, sodi epote Ngiroma kinyasut akai a Akuj ka ngitunga a akwap yok!”

⁴⁹Tolim epei kech lo enyaritae Kayapa, lo arai Emuron Loapolon ekaru ngolo tama, “Ibangaaka mono esi a?

⁵⁰Nyiyenete esi atamar ejoikinit itwaan ipei etoani kotere ngitunga luche sodi nyinyasunotor ngitunga a akwap daang a?”

⁵¹Nakaneni, peeruoro ngesi ngakiro na eraakasi ngakeng a ilope. Kona araakar ngesi Emuron Loapolon ekaru ngolo, adwari ngesi atamar etoani Yesu kotere Ngiyaudi,

⁵²meere kotere Ngiyaudi make, nakaneni echunakini wapei ngide a Akuj daang lu ialara taraut ngipei.

⁵³Akolongit napei ngina jik, totuko ngikapolok a Ngiyaudi eger lo eareta Yesu.

⁵⁴Sodi abu Yesu nyelot ileere anakwap a Yudea, nakaneni torotok kaneni tolot nakwap na ayei diyete ariet, sodi tanang lore lo anyaritae Epiraim, kiboikinos ka ngirukitos keng neni.

⁵⁵Nakaneni aapikinit ngirwa a esukukuu a Ngiyaudi alo a Adeparet. Torotokis ngikaalak anamanat toloto Yerusalem akitosega loger a etal a Musa, eringa akolongit a esukukuu nyenanga.

⁵⁶Asakete kesi Yesu, ani na eriamitotor kesi kai a Akuj, kingitanaros make ebalasi, “Esibit esi kwaai? Ebuni ngesi Losukukuu kori emam?”

⁵⁷Adungunito Ngimurok Luapolok a akai a Akuj ta Ngiparisayo akiroit atamar, ani keyei itwaan ni eyeni ni eyei Yesu, ejoikinit elimori sodi kirumuneta kesi ngesi.