Read turkana Yoana 12 Bible Online

Yoana 12 - turkana bible

Yoana 12

¹Ani eringa ngirwa ngikan-kapei tanang esukukuu lo enyaritae Adeparet, abu Yesu tolot Betania, ni ebooyo Losaro losek eteyaruni Yesu anakitu.

²Kidorokinoe ngesi akimuj kaneni, akoranakini Marita ngitunga akimuj. Arukito Losaro ka ngipeyok lu emujete ka Yesu alomeesa.

³Sodi tolem Mariam akimiet nakakukunyon elalak ngaropiyae egielere enyaritae nardo*g** tobukok nakejen a Yesu, dio akisutar a ngitim keng. Tokukunyu akimiet ngina alokai awadaang.

⁴Nakaneni epei a ngirukitos a Yesu lo enyaritae Yuda Isikariote, ngolo arikokini ngesi ngitunga, tolim tama,

⁵“Nyo peagialarere akimiet nakakukunyon naga a ngadinari[2] a ngamiae a ngakan-kapei, sodi nakinae ngikebootok?”

⁶ Pealimunit ngesi nguna ani esienitotor ngikebootok, eruoro ngesi nguna ani araakar ekokolan. Akodit ngesi echue lo a ngaropiyae, alemanari ngaropiyae alochue kangolo.

⁷Tolim Yesu tama, “Kimiekisi ngesi! Kimiekisi kiwaa naetingit kotere akolongit nakanukere ayong.

⁸ Irukito esi ka ngikebootok jiik, nakaneni nyikiruki ayong ka esi jiik.”

⁹Kiira asepich a ngitunga atamar eyei Yesu Betania, toloto kesi daang inaa. Pealoose kesi inaa aanyun Yesu bon, asakete tani aanyun Losaro lo eteyaruni Yesu anakitu.

¹⁰Sodi totuko Ngimurok Luapolok akiar Losaro dang,

¹¹kainyo kotere ngesi, angerete Ngiyaudi lukaalak kesi sodi tonupa ngakiro a Yesu.

¹²Akolongit na a ngaarei, kiira asepich a ngitunga alu aponito Losukukuu lo anyaritae Adeparet atamar ebunit Yesu Yerusalem.

¹³ Sodi toyeput kesi ngangolea toloto kisiriamiasi ngesi echalasi ebalasi, “Kipuruunoe Akuj! Topia Akuj ngolo ebunit a ekiro a Ekapolon a Isirael!”

¹⁴Taanyu Yesu itasikiria todoka kidiama keng loger lo igiritae nagiran kona,

¹⁵ “Nyieam ngitunga a ere a Sion! Ekapolon kus logo ebunit, edokit itasikiria.”

¹⁶Peetamunito ngirukitos keng akiroit ngina akolongit ngina, nakaneni na ayarunea Yesu a apolou a Akuj, apot kitamut atamar egiritae nguna nagiran loger ngolo, na nguna ngesi asubeta kesi ngesi.

¹⁷Kisisata ngitunga lu arukito ka Yesu na anyaraa Losaro analiel kiteyaru, ngakiro daang na asubasi

¹⁸kotere ngakiro nguna, tolot asepich a ngitunga kisiriama Yesu, kainyo eirarete atamar asubi ngesi akitoodikinet nakaililon ngina.

¹⁹Apot Ngiparisayo tolimokinos make tamasi, “Taanyungasi tokona eger lo angopea ngoni ibore nikisubi. Kingolikisi a! Ewapakis ngitunga daang ngesi!”

²⁰Arukito Ngigirik ngiche ka ngitunga lu aloose Yerusalem akilip Akuj akolongit na esukukuu.

²¹Toloto kesi nia Pilip (alo erai itwaan a Betisaida ana a akwap a Galilaya), tolimokis tamasi, “Ekile, kisaki sua aanyun Yesu.”

²²Tolot Pilip tolimok Andirea, sodi toloto kesi kwasiarei tolimokis Yesu.

²³Tatachu Yesu tama, “Adol tokona esaa lo eanyunea Lokookeng a Itwaan apolou naapolon noi.

²⁴Kalimokinit ayong esi ngakiro na iteni dir atamar, idongi ekinyamit a ngakanoi erai ekinyamit, erai pekitakin nalup totoan! Ani ketoana, erupuni tokon talalar.

²⁵Itwaan cha daang ni emina akiyar keng, ebukor, nakaneni ni eremokin akiyar keng anakwap kana, irichuni anakiyar ana nyedaun.

²⁶ Itwaan cha daang ni esaki akisub etich kang, ejoikinit kewapi ayong, sodi min ekasuban etich kang ni ayei ayong. Nabo ani kesub itwaan etich kang, ipuruuni Apakang ngesi.

²⁷“Eriebete tokona ngakiro etau kang, ekoe atamari tokona ai? Ekoe, atamari, ‘Apa, toyuunae alochan alu a esaa kalo a’? Nakaneni abe erai bo kolong ibore abunio ayong ngini sodi atanaikinea ngichan lu esaa kalo.

²⁸Apa, yau ekipur lokiro kon!” Sodi tolim etoil anadis ebala, “Etiliwo ayong ngolo lo ipuruunitoe, nakaneni ekokini neni nabo.”

²⁹Kiira asepich a ngitunga alu awaasi kaneni etoil ngolo, tamasi ngiche kech arai agirokin, tabalasi nabo ngiche, “Emalaikat esuruori ngesi!”

³⁰Tolimok Yesu tama, “Peeruoro etoil ngolo kotere ayong, eruoro kotere esi.

³¹Adol tokona esaa lo iriraare ngitunga a akwap kana, iritario tokona ekapolon a akwap kana.

³²Ani nakekearere ayong kidiama anakwap, eriuni ngitunga daang nikang.” (

³³Analimun nguna, edodiunit ngesi eger a akitu ana etoani ngesi.)

³⁴ Tatachakis ngitunga tamasi, “Igiritae Lotal atamar eyari Kiristo jik. Nyoni bo ibalar iyong ejoikinit Lokookeng a Itwaan ikeario? Lokookeng a Itwaan ngolo ngesi ngae?”

³⁵Tatachak Yesu tama, “Eringa cha mono wadio irukito esi ka akicha. Torubakisi iloose eringa akicha eyei, sodi nyikidol esi aribu. Itwaan ni elosi nakwaare nyeyeni ni eteni.

³⁶Tonupa ngakiro a akicha eringa eyakasi, sodi taraut esi ngitunga a akicha.” Na alimunio Yesu nguna, dio arotokin toduk nyeanyuneta ngitunga.

³⁷Tani na asubea ngesi ngakitoodikinet nakailiilok nguna alotunga, nyenupa kesi ngakiro keng.

³⁸ Asubasi nguna sodi kiyookinotor ngakiro nakolong alimuni ekadwaran Isaya ebala: “Ekapolon Akuj, ngae anupi ngakiro nakilimuni sua? Ngae edodik Ekapolon agogongu keng?”

³⁹Nakaneni nyenupa kesi kainyo abala Isaya nabo ngakiro ngache kona,

⁴⁰ “Ekokis kesi ngitunga lu etumudukan Akuj ngakonyen kech, nabo agol Akuj ngitamen kech, sodi nyingolikineta a ngakonyen kech, kori nyeyenuneta kesi a ngitamen kech, nakaneni nyereunosi nikang, ebala Akuj, sodi etangalek ayong kesi.”

⁴¹Alimuni Isaya nugu kainyo engolikini apolou a Yesu, sodi kiruor ngakiro keng.

⁴²Tani kikote neni, tonupa ngikapolok a Ngiyaudi lukaalak ngakiro a Yesu. Nakaneni kotere ni aemitotor Ngiparisayo, nyelimoro kesi, kainyo akerito atamar nyikitwarakin alokai a Atuk.

⁴³Kainyo aminasi kesi ekipur a ngitunga akidwang ekipur a Akuj.

⁴⁴Kirema Yesu tama, “Itwaan cha daang ni enupit ngakiro kang, enupit tani ngakiro alo kameuni ayong, meere nakang make.

⁴⁵Itwaan cha daang nikaanyunga ayong, aanyunga tani lokolong kameuni ayong.

⁴⁶Abu ayong nakwap ekoni akicha, sodi ani itwaan cha daang ni enupi ngakiro kang, nyidongi naribu.

⁴⁷Ani kiira itwaan ngakitatamet kang nyiiwapak, nyerirae ayong ngesi. Peabuni kolong ayong akirirare ngitunga a akwap, abuni ayuun.

⁴⁸Itwaan cha daang ni kangeri ayong, nyeechamu ngakitatamet kang, eyei ngesi ekeriran. Ngakiro na eruoro ayong ngesi iriraate ngesi akolongit na a esal!

⁴⁹Eraakasi na eruoro ayong ngaka iteni kainyo nyeruoro ayong naeraakasi ngakang a ilope, erai Apakang lo kameuni ayong, ngesi adungu ngakiro na ejoikinit alimuni kana ejoikinit eruoro.

⁵⁰Nabo ayeni ayong atamar eyaunito ngakiro na adungu ngesi akiyar na nyedaun. Na alimuni ayong kesi nakalimoki Apakang atamar tolim.”