Read turkana Yoana 13 Bible Online

Yoana 13 - turkana bible

Yoana 13

¹Arai akolongit apei edongit tanangea esukukuu lo anyaritae Adeparet. Ayeni Yesu atamar adol esaa lo erotokinio ngesi anakwap kana tolot nika Apakeng. Amina ngesi jiik ngitunga lu eraakasi ngikeng anakwap kana, tasak tokona ngesi akidodikin kesi atamar amina kesi tanang losal.

²Emujete Yesu ka ngirukitos keng akimuj naka ebong. Alomarit Ekipe lotau a Yuda, lokookeng a Simon Isikariote, edodikinit ngesi atamar torikok Yesu ngitunga.

³Ayeni Yesu atamar kainaki ngesi Apakeng agogongu daang, ayeni tani atamar abunit ngesi ani a Akuj, nabo abongori nia Akuj.

⁴Sodi tonyou Yesu ani ayei emeesa, talachu eworu keng lo a alokidiama tolem ataulo kilogak naabor.

⁵Sodi tobukok ngakipi natubwa, tolomak akilotar ngakejen a ngirukitos keng, ani erumor, kisuta a ataulo ana elogakinit naabor.

⁶Ani enanguni nia Simon Petero kingit ngesi Yesu tama, “Ekapolon, ilotari cha iyong dir ngakejen kang a?”

⁷Tatachak Yesu ngesi tama, “Nyiyeni tokona iyong na asubi ayong, iyenuni iyong ekisidi.”

⁸Tolimok Petero ngesi tama, “Emam esaa tani epei lo ilotarea iyong ngakejen kang jik!” Tatachak Yesu ngesi tama, “Ani pekelota ayong ngakejen kon, nyiliwor nabo iyong erukitos kang jik!”

⁹Tolimok Simon Petero tama, “Ekapolon, nyiilota robo ngakejen kang make, kilotarae ngakan ka akou dang!”

¹⁰Tolimok Yesu tama, “Itwaan ni elota akwaan keng daang eseg ngesi. Nyesaki akilotar nabo mati kerai akilotar ngakejen make. Isegak esi daang, isegak esi daang mati epei bon.” (

¹¹ Ayeni Yesu itwaan ni erikokini ngesi ngitunga, ngesi abalar, “Isegak esi daang mati epei kus bon.”)

¹²Na arumorea Yesu akilotar ngakejen kech tanap eworu keng lo alokidiama tolot kiboikin ni ayei emeesa. Kingit kesi tama, “Iyena esi ngakiro nakasubea ayong esi a?

¹³Kinyarito esi ayong Eketataman ka Ekapolon, iyookinito esi nguna, kainyo ayong ngesi ngolo.

¹⁴Elota tokona ayong Ekapolon kus ka Eketataman kus ngakejen kus. Ejoikinit ilotanarosi esi dang ngakejen kus make.

¹⁵Kedodikinit tokona ayong esi ekitetemes logo sodi tosubeta esi na tokona kasubea ayong esi.

¹⁶Kalimokinit ayong esi ngakiro na iteni dir atamar, emam ekasuban etich lo idwangit ekapolon keng, nabo emam emeanara lo idwangit ngolo emearit ngesi.

¹⁷ Iyenut esi nugu tokona, ani kisuba kongina, ilakarosi!

¹⁸“Nyalimunit ngakiro nugu kotere esi daang, ayeni ayong ngulu aseu, sodi kiyookinotor ngagiran na igiritae kona, ‘Itwaan nikimori ka ayong akimuj kang, kanyoiki karemokin.’

¹⁹Kalimokinit tokona ayong esi nugu eringa ngakiro nguna nyesubakina, sodi ani kesubakin, tonupeta esi atamar, ‘Erai Ayong Lo erai Ayong.’

²⁰ Kalimokinit esi ngakiro na iteni atamar, itwaan cha daang ni itepeyoni itwaan ni ameari ayong, ketepeyon tani ayong, ni ketepeyoni ayong, etepeyon tani lokameuni ayong.”

²¹Alimunet a Yesu nguna, tonoma ngakiro etau, tolimok kesi ngakiro na ileerete tama, “Kalimokinit ngakiro na iteni dir atamar, karikokini epei kus ayong ngitunga.”

²²Tatalasi ngirukitos a Yesu ngakiro nguna tokianyanakinos peeyenete atamar ngae abala ngesi.

²³Epei a ngirukitos a Yesu, ngolo amina ngesi, ebooyi alo diyete Yesu.

²⁴Sodi toketu Simon Petero ngesi tama, “Kingit ngesi atamar ngakiro a ngae iruoro ngesi.”

²⁵Sodi kirudar erukitos ngolo diyete Yesu kingit tama, “Ekapolon, ngae ibala iyong?”

²⁶Tatachak Yesu tama, “Itwaan ngini ainakini ayong amugati na elumokini tooma natubwa ngesi ngini.” Tolem ngesi amugati nak Yuda lokookeng a Isikariote.

²⁷Ani napei ediaunea Yuda amugati, toloma Esiitan nikeng. Tolimok Yesu ngesi tama, “Kiburuburak atipei na isaki akisub!”

²⁸Emam tani ipei alu emujete ani ayei emeesa ni ayeni ibore alimunio Yesu ngakiro nguna.

²⁹Kona araakar Yuda itwaan ni atingit echue a ngaropiyae, kitama ngirukitos luche atamar kori alimokinit Yesu ngesi atamar tolot togiel akimuj a esukukuu, kori elimokinit ngesi atamar, nak ngikebootok ngaropiyae.

³⁰Kidiau Yuda amugati dio arotokin. Arai akwap akwaar.

³¹Na arotokinio Yuda, tolim Yesu tama, “Itatakanuunio tokona apolou a Lokookeng a Itwaan, tani tokona dang atakanuu apolou a Akuj anikeng.

³²Ani ketakanuu apolou a Akuj anikeng, itatakanuuni Akuj alope apolou a Lokookeng a Itwaan anikeng, kitatakanu atipei.

³³Ngide kang, eringa cha mono wadiochichi kirukit ayong ka esi. Kisakete esi ayong, nakaneni kalimokini tokona ayong esi nakolong alimokini ngikapolok a Ngiyaudi atamar, ‘Nyiloose esi ni alosi ayong.’

³⁴Nakaneni kainakini tokona esi etal lokitetet tominakinos make loger lokaminar ayong esi, tominakinos esi kongina.

³⁵ Ani kiminakinosi esi make, eyenete ngitunga daang atamar esi ngirukitos kang.”

³⁶Kingit Simon Petero ngesi tama, “Ekapolon, aliwae ilosi iyong?” Tatachak Yesu tama, “Nyikiwapakini iyong ayong anialosi ayong tokona, nakaneni kiwapakini iyong ayong ekisidi.”

³⁷Kingit Petero ngesi tama, “Ekapolon nyo pekewapakinea ayong iyong tokona a? Alemuna ayong atoanere kotere iyong!”

³⁸Tatachak Yesu tama, “Ilemuna iyong dir atoanere kotere ayong a? Kalimokinit ayong iyong ngakiro na iteni dir atamar, ani eringa ekokoroit nyerukino, ilimuni iyong ngalimunet ngauni atamar nyikiyeni ayong.”