Read turkana Yoana 14 Bible Online

Yoana 14 - turkana bible

Yoana 14

¹Tolimok Yesu kesi tama, “Kiapakisi ngitai kus, nyialolong, tonupa ngakiro a Akuj, tonupa nakang dang.

²Eyakasi ngakais nakaalak nawi ka Apakang, arai tamam, pekalimokinit ayong esi atamar alosi ayong inaa atosubak ngawiyei kus.

³Ani kalot ayong asubakin ni ilomete esi, abonguni nabo katoriko esi ni amini ayong, sodi ni ayei ayong, pena esi dang.

⁴Iyenete esi erot lo idiri ni ateni ayong.”

⁵Tolim Tomas tama, “Ekapolon, nyikiyeni sua ni ilosi iyong, kikokini sua kiyeni erot lokinangea inaa ai?”

⁶Tatachak Yesu tama, “Ayong ngesi arai erot, ayong ngesi arai akiyar, nabo ngakiro kang kesi eraakasi ngaka iteni, nyelosi itwaan nika Apa mati kitoru nikang.”

⁷Tolimok kesi tama, “Kona tokona kiyeneta esi ayong, iyena esi tani Apakang. Napei tokona jik, iyena esi ngesi nabo ingolikis dang.”

⁸Tolimok Pilip Yesu tama, “Ekapolon, kidodikinae sua Apa, nguna make kitemunete sua.”

⁹Tolimok Yesu ngesi tama, “Pilip, ikwa ngirwa lukirukitor ayong ka esi daang, eringa iyong nyeyena ayong a? Itwaan cha daang ni kengolik ayong, engolik tani Apakang, nyo bo tokona ibalar iyong, ‘Kidodikinae Apa?’

¹⁰Ikwa nyinupit iyong Pilip atamar ayei ayong nika Apa, nabo eyei Apa nikang a?” Tolimok Yesu ngirukitos keng tama, “Meere ngakiro nakalimok ayong esi ngakang a ilope, Apakang lo ibooyi alotooma kang ngesi esubi etich keng.

¹¹Tonupa ngakiro kang nakalimokinea atamar ayei ayong tooma Apa, nabo eyei Apa tooma kang, ani pekinupa kotere nguna, tonupa ngakiro kang kotere ngitichisio luasubi ayong.

¹²“Kalimokinit esi ngakiro na iteni dir atamar, itwaan cha daang ni enupi ngakiro kang, esubi ngitichisio luasubi ayong, esubi tani luapolok noi lu idwangito lukang, kainyo alosi ayong nika Apa.

¹³Ianyunete esi ibore daang ni ilipasi a ekiro kang, sodi tatakanuunea apolou ka Apa ani a Lokookeng.

¹⁴Ibore cha daang ni ilipasi esi ilimito ekiro kang, kainakini ayong esi.

¹⁵“Ani kiminasi esi ayong, irichakinete ngitalio kang.

¹⁶Elipi ayong Apa, kiinak esi Ekengarakinan lo ibooyete ka esi jiik.

¹⁷Erai ngesi Etau a Akuj lo idodiuni ngakiro na iteni na a Akuj. Nyechamunete ngitunga a akwap kainyo nyingolikinete kori nyeyenete, nakaneni iyenete esi ngesi kainyo irukito ka esi nabo emini ngesi tooma kus.

¹⁸“Nyakaisikini ayong esi ikokianito, abonguni nikus.

¹⁹Eringa cha mono wadiochichi ani erumor nyekengolikinete ayong ngitunga a akwap, nakaneni kingolikinete esi ayong, nabo kotere ni ayarea ayong, iyarete esi dang.

²⁰Na enangea akolongit ngina, iyenunete esi atamar ayei ayong nika Apakang, nabo iyakasi esi nikang loger lo ayakar ayong nikus.

²¹“Itwaan cha daang ni achamu ngitalio kang nabo kiwapite, ngesi kamina ayong. Eminakini Apakang itwaan cha daang nikamina ayong, aminakini ayong dang ngesi nabo edodiun anikeng.”

²²Tolim Yuda (meere Isikariote) tama, “Ekapolon, ikokini iyong idodiun anikosi, meere alotunga a akwap ai?”

²³Tatachak Yesu tama, “Itwaan cha daang nikamina ayong, irichakini ngakitatamet kang. Eminakini Apakang ngesi, nabo kiponi ayong ka Apakang eboikinos nikeng.

²⁴Itwaan cha daang ninyakamina ayong, nyirichakinit ngakitatamet kang. Nakaneni meere ngakitatamet na iirasi esi nugu ngakang, eponito anika Apakang alo kameuni ayong.

²⁵“Kalimokinit ayong esi nguna eringa kirukit ka esi.

²⁶Kitatami esi Ekengarakinan, lo erai Etau a Akuj ngakiro daang, emeuni Apa ngesi alokiro kang. Kisitamuni tani ngesi esi daang nakalimok ayong esi.

²⁷“Kemiekinea ayong esi ekisil, erai ekisil ngolo ekang, nyikoni ekisil lo a ngitunga a akwap. Kiapakisi ngitai kus nyialolongo, kori nyieam.

²⁸Iirasi esi kalimokini ayong esi abala, ‘Alosi ayong nakaneni abonguni nikus.’ Arai kitominas esi ayong, kilakarosi kainyo alosi ayong nika Apa alo epolot kedwangit ayong.

²⁹Kalimok tokona ayong esi nguna eringa nyesubakina, sodi ani naesubakinotor, tonupa.

³⁰Nyikiruoro ayong ka esi nikooyen, kainyo ebunit ekapolon a akwap kana. Nakaneni emam ngesi agogongu anikang,

³¹nakaneni ejoikinit ngitunga a akwap eyenete atamar amina ayong Apa, ngakiro nguna ngesi asubea ayong ngakiro daang loger lo kadungokinitor ngesi ayong atamar atosub. Tonyoutu atoloto kane.