Read turkana Yoana 15 Bible Online

Yoana 15 - turkana bible

Yoana 15

¹“Ayong ngesi arai ekitoe a emusabib lo a iteni lo akoniuni ageor, Apakang ngesi eketan.

²Echakari ngesi ateni daang na eyei tooma kang na nyekoneene, nabo igiaragiarari ngesi ateni daang na ekoneene, sodi kilijaunea tokonio nabo ageor ache.

³Isegeta esi a ngakitatamet ana ketatam ayong esi.

⁴Kiboikinos nikang, eboikin ayong nikus atarata ngipei. Nyekoniuni ateni bon, ekoniuni erai kemin lokitoe, aloger alopei kangolo, nyikoniunete esi ageor pekipean nikang.

⁵“Ayong ngesi ekitoe, esi ngaten. Itwaan cha daang ni iboikin tooma kang, nabo ayong tooma keng, ekoniuni ageor nakaalan, kainyo emam ibore isubete esi amam ayong.

⁶Itwaan cha daang ni nyiboikin tooma kang, echakario loger a ateni toon. Ngaten na aoko ikote nguna, echununio tachakakinae nakim, kinomae.

⁷Ani kipena esi tooma kang, nabo pena ngakiro kang tooma kus, kilipas ibore daang ni isakete nakaneni kiinakinio.

⁸Kotere nguna, ipuruunio Apakang ani ikoniuneto esi ageor nakaalan, nabo aloger kangolo, iraunete esi ngirukitos kang dir.

⁹Kamina ayong esi loger lo kaminar ayong Apakang, kiboikinos namina kang.

¹⁰ Ani kirichakis esi ngitalio kang, kaminakini ayong esi dir loger lo ewapitor ayong ngitalio ka Apakang sodi katominak ngesi ayong.

¹¹“Kalimok ayong esi nugu sodi minio alakara kang nikus, nabo talakaros esi noi.

¹²Etal lokadungokinit ayong esi ngesi lo, tominakinos make loger lokaminar ayong esi.

¹³Emam amina naapolon na idwangit na ejalea itwaan akiyar keng kotere ngipaalon keng.

¹⁴Iraakasi esi ngipaalon kang erai kisuba nakadungok ayong.

¹⁵Nyakanyarae tokona nabo esi ngikasubak etich jik, kainyo nyeyeni ekasuban etich na esubi ekapolon keng. Nakaneni iraakasi tokona esi ngipaalon kang, ani kalimokinea ayong esi ngakiro daang na eira ayong ani ka Apakang.

¹⁶Nyeseuna esi ayong, kaseu ayong esi sodi atama toloto lotich, tokoniut ageor nakaalan na nyedaun. Sodi kiinakinea Apa esi ibore daang ni ilipasi esi a ekiro kang.

¹⁷Kadungok ayong esi nugu atamar tominakinos esi make.

¹⁸“Ani kiremokin esi ngitunga a akwap, toyena atamar karemokinosi ayong kolong sek ekingaren.

¹⁹Arai taraakas esi ngitunga a akwap, kiminasi esi ngitunga kainyo ikote esi kesi. Nakaneni kaseuni ayong esi anakwap kana, meere esi ngitunga a akwap kana, erai ibore ngini ngesi kiremokinotor esi ngitunga a akwap.

²⁰Kitamutu nakolong kalimokini ayong esi abala, ‘Emam ekasuban etich lo idwangit ekapolon keng.’ Ani kaboliatotor kesi ayong, kiboliatar esi dang, ani kirichakinito ngakitatamet kang, irichakinete nakus dang.

²¹Nakaneni esubete kesi nugu daang anikus ani iraakatar esi ngitunga kang, nakaneni nyeyenete kesi lo kameuni ayong.

²²Arai nyaabu ayong esiruor kesi, pekeyan kesi atamar kisechit. Nakaneni nyelimunete tokona kesi atamar emam kesi akisech eyei.

²³Itwaan cha daang nikaremokino ayong, eremokino tani Apakang.

²⁴Arai nyaasub ayong anikech ngakiro na emam itwaan iche asub nakanuan, kemam kesi akisech. Kona engolikineta kesi na asubi ayong, karemokinosi ayong ka Apakang aapei.

²⁵ Nakaneni asubakinosi nugu kiyookinotor nakolong igiritae Lotal kech kona, ‘Karemokinosi kesi ayong pas.’

²⁶“Ebuni Ekengarakinan, Etau a Akuj, lo idodiuni ngakiro a Akuj na a iteni nabo ngesi ebunit ani ka Apa. Ameuni ayong ngesi ani ka Apa, iruoro ngesi ngakiro kang.

²⁷Iruorosi esi dang ngakiro kang kainyo kirukit ayong dang ka esi napei anakisiakinet.