Read turkana Yoana 16 Bible Online

Yoana 16 - turkana bible

Yoana 16

¹“Kalimok esi ngakiro nugu sodi nyiwolioreta esi ananupit kus.

²Kitwarakinio esi anakais a Atuk. Nabo enangi ngirwa lu itamea itwaan daang nikiari esi atamar kori asubakinit Akuj etich lotiajokon.

³Kisubeta esi ngitunga ngakiro nguna kainyo eringa kesi nyeyena Apakang kori ayong.

⁴Nakaneni kalimok ayong esi nguna sodi ani na enangeta ngirwa lu kisubeta kesi esi ngakiro nguna, toyeneta esi atamar abu kolong sek ayong katolimok. “Pekalimokini ayong esi nguna kolong anakisiakinet kainyo aringa ngoni kirukit.

⁵Nakaneni alosi tokona ayong ni eyei lokolong kameuni ayong, nakaneni emam tani ipei kus ni kengisi ayong atamar aliwae alosi ayong.

⁶Kona tokona kalimokinea ayong esi nugu, ialolongo esi noi.

⁷Nakaneni kalimokinit ngakiro na iteni dir atamar ejok anikus alosi ayong, kainyo ani pekalot ayong, nyebuni Ekengarakinan nikus. Nakaneni ani kalot ayong, ameuni ayong ngesi nikus.

⁸Ani kebu ngesi, idodikini ngitunga a akwap atamar ichwangakinito kesi ngakiro a akisech, ka ngakiro na eteniyete ta ngakiro a eriras a Akuj.

⁹Ichwangakinito kesi ngakiro a akisech kainyo nyenupito ngakiro kang,

¹⁰ichwangakinete kesi ngakiro na eteniyete kainyo alosi ayong nika Apakang, nakaneni nyikingolikinete esi ayong nabo jik,

¹¹ichwangakinito kesi ngakiro a eriras kainyo erirae kolong ekapolon a akwap kana.

¹²“Eringa eya nakaalak asaki ayong alimokin esi, nakaneni alalaketa tokona noi nyitamunete daang.

¹³Na ebunio Etau a Akuj lo idodiuni ngakiro na iteni a Akuj, kiteyenuni ngesi esi ngakiro daang na iteni. Nyiruoro ngesi naeraakasi ngakeng a ilope, kilimokini esi na eira ngesi, nabo kilimokini esi ngakiro na eponito.

¹⁴Kepuruuni ngesi ayong, kainyo iropori ngesi ngakiro naeraakasi ngakang kitolimok esi.

¹⁵Ibore daang ni etingit Apa erai ikang, ngesi kalimokinitor atamar iropori Etau a Akuj ngakiro na eraakasi ngakang kitelimok esi.

¹⁶“Eringa cha mono wadiochichi ani erumor nyikingolikinete esi ayong nabo jik, nabo ani ekisidi cha wadio kingolikis esi ayong.”

¹⁷Kingitanaros ngirukitos keng ngiche make tamasi, “Ekoe! Nyo tokona eger a ngakiro kanu? Anukiro nugu ebala ngesi eringa cha mono wadiochichi ani erumor nyikingolik ngoni ngesi, nabo ani ekisidi cha wadiochichi engolikisi ngoni ngesi. Nabo dang ebala ngesi, ‘Erai ni alosio ayong nika Apa.’

¹⁸Nyo tokona eger a ibore be ‘eringa cha mono wadiochichi’ kaen? Kikuruwosi ngakiro na iruoro ngesi!”

¹⁹Toyen Yesu atamar asakete kesi akingit ngesi ngakiro, dio tolimok tama, “Abala tete ayong, ‘Eringa cha mono wadiochichi ani erumor nyikingolikinete esi ayong, nabo ani ekisidi cha wadiochichi kingolikinete esi ayong.’ Ngakiro nugu kesi ingitanarosi esi a?

²⁰Kalimokinit esi ngakiro na iteni dir atamar ikalounete esi tosutonokis, nakaneni elakarosi ngitunga a akwap, emini esi esinyoi, esi nakaneni ibelo asinyit kus toliwor alakara.

²¹Na apikinea aberu akidoun, ialolongi ngesi kainyo adol esaa lo a ariaba, na idounio ngesi ikoku, imuriakini ngesi ariaba keng, elakar ngesi kainyo edou ikoku apudu nikalapatan.

²²Ikote ngakiro neni anikus, ialolongete esi tokona, nakaneni kaanyuni ayong esi nabo, sodi talakaros ngitai kus noi, alakara ngina, emam itwaan epedori alemar anikus.

²³“Naenangea akolongit ngina, emam ibore kilipete esi ayong. Kalimokinit ngakiro na iteni dir atamar, kiinakini esi Apa ibore daang ni ilipete esi ilimito ekiro kang.

²⁴Emam ibore ilipasi esi ilimito ekiro kang tanang tokona, kilipas nakaneni ianyunete sodi kitemokin alakara kus.

²⁵“Kalimok tokona ayong esi ngakiro nugu a ngakisikwaanet, nakaneni edoli ngirwa lu nyikiruoror ayong ka esi a ngakisikwaanet, nakaneni kalimokini ayong esi ngakiro ka Apa na ileerete.

²⁶Na enangea ngirwa ngulu, ilipete esi ngesi ilimito ekiro kang, nyalimuni ayong atamar elipi ayong ngesi ibore kotere esi.

²⁷Kainyo Apa alope ngesi kimina esi. Kimina ngesi esi kainyo kiminasi esi ayong, nabo inupa esi atamar abuni ayong ani a Akuj.

²⁸Abuni ayong ani ka Apa abu nakwap, nakaneni aisikini tokona ayong akwap atolot nika Apa.”

²⁹Sodi tolimokis ngirukitos keng ngesi tamasi, “Abe iruoro bo tokona iyong ngakiro na ileerete, nyiruoro a ngakisikwaanet.

³⁰Kiyeni tokona sua atamar iyeni iyong ngakiro daang. Emam tani ibore ejoikinitor itwaan kingisi iyong akiroit. Kitunup sua ibore ngini atamar ibunit iyong ani a Akuj.”

³¹Kingit Yesu tama, “Inupa esi tokona a?

³²Abala ayong esi a! Enangi esaa, anang tani tokona esaa lo ialarotor esi, itwaan daang elosi nawi keng, kimiekis ayong bon, nakaneni nyedongi ayong bon kainyo kirukit ayong ka Apakang.

³³Kalimok ayong esi nugu sodi kisileta ani irauneta esi ngipei ka ayong. Kiboliatar esi ngitunga a akwap. Nakaneni totitinyoketa! Epiu ayong ngakiro a akwap!”