Read turkana Yoana 17 Bible Online

Yoana 17 - turkana bible

Yoana 17

¹Na arumorea Yesu alimun ngakiro nguna, kingolia kidiama tolim tama, “Apa, adol esaa. Kipuruu iyong Lokookon dio kipuruu Lokookon iyong.

²Kainyo iinak iyong ngesi apolou na epolokinio ngitunga daang, sodi nak ngesi lu iinak iyong ngesi, akiyar na nyedaun.

³Akiyar na nyedaun ngesi kiyeneta ngitunga iyong Akuj na iteni na irai apei bon, nabo toyenuneta Yesu Kiristo lokolong imeuni iyong.

⁴Edodik ayong ngitunga apolou kon kanege anakwap, nabo arumo ayong etich lokiinakini iyong ayong akisub.

⁵Ee Apa! Kipuruunoe tokona ayong anikon. Kipuruunoe a ekipur alo kolong kirukitor ka iyong eringa akwap nyesubuna.

⁶“Keteyen iyong ngitunga lukolong kiinakini iyong ayong anakwap kana. Araakasi kesi ngikon sodi kiinak iyong ayong. Ewapakis kesi akiroit kon,

⁷nakaneni ayan tokona kesi atamar ibore daang nikiinakini iyong ayong ebunit anikon.

⁸ Alimok ayong kesi ngakitatamet nakilimokini iyong ayong, nakaneni achamut kesi. Ayena kesi iteni dir atamar abuni ayong anikon, nabo anupa atamar kimeuni iyong ayong.

⁹“Elipakinit ayong kesi. Nyelipakinit ayong ngitunga a akwap, elipakinit lukiinakini iyong ayong, kainyo eraakasi kesi ngikon.

¹⁰Ngitunga daang lueraakasi ngikang, eraakasi ngikon, nabo daang lueraakasi ngikon, eraakasi ngikang, sodi kidodiun apolou kang anikech.

¹¹Abunit tokona ayong nikon. Nyeringa tokona nabo ayong ayei nakwap, nakaneni eringa kesi eyakasi nakwap. Ee Apa Lo italeuno, tochoik iyong kesi lokojokon kotere agogongu a ekiro kon, ekiro lokolong kiinakini iyong ayong, kitiliwo kesi ngipei loger lokiraakar ngoni ngipei.

¹²Nakirukitor ka kesi, achoikinit ayong kesi a agogongu a ekiro kon, ekiro ngolo kiinakini iyong ayong. Achoik ayong kesi, emam tani ipei ni achakar, mati lokolong aseunio tachakar, sodi kiyookinotor ngagiran.

¹³Abunit tokona ayong nikon, alimunit ayong ngakiro nugu kanege anakwap sodi talakarotor kesi noi.

¹⁴Ainak ayong kesi akiroit kon, aremokinosi ngitunga a akwap kesi, kainyo meere kesi ngitunga a ngakwap.

¹⁵Nyekelipit iyong atamar tolema kesi anakwap, kelipit iyong atamar tochoik kesi Alokipe.

¹⁶Meere kesi ngika akwap, loger lo nyaraakar ayong dang itwaan a akwap.

¹⁷Kitaleu kesi anakiroit ana iteni, akiroit kon ngesi erai iteni.

¹⁸Aloger alo kolong kimeunea iyong ayong nakwap, amea ayong dang kesi nakwap.

¹⁹Etaleun ayong anikon kotere kesi, sodi kitaleunos kesi dang anakiro ana iteni.

²⁰“Nyelipakinit ayong kesi make, elipakinit tani luenupete ngakiro kang kotere ngakitatamet a ngikanupak.

²¹Elipit ayong atamar taraut kesi ngipei. Ee, Apa! Loger lo iyakar iyong nikang, ayong dang ayei nikon, pena kesi dang niyok, sodi tonupa ngitunga a akwap atamar iyong kimeuni ayong.

²²Ainakini ayong kesi ekipur lopei kiinakini iyong ayong, sodi taraut kesi ngipei loger lokiraakar ngoni ngipei.

²³Amini ayong nikech, min iyong nikang, sodi toliworotor kesi ngipei jik, sodi toyenuneta ngitunga a akwap atamar iyong kimeuni ayong, nabo imina iyong kesi loger lokiminar ayong.

²⁴“Ee Apa! Kiinak iyong kesi ayong, nakaneni asaki ayong eruko ka kesi ani amini ayong, sodi kingolikineta kesi ekipur kang lokiinakini iyong ayong, kainyo kimina iyong ayong tani kolong eringa akwap nyesubakina.

²⁵Ee Apa lo eteniyete ngakiro! Nyikiyenete iyong ngitunga a akwap, nakaneni kayeni ayong iyong, nabo ayan ngitunga lugu atamar iyong kimeuni ayong.

²⁶Ketaanyu ayong iyong kesi nakaneni arubakini akikwaanakin neni, sodi minio amina nakiminar iyong ayong nikech, nabo aminio ayong dang nikech.”