Read turkana Yoana 18 Bible Online

Yoana 18 - turkana bible

Yoana 18

¹Na alimunio Yesu ngakiro na elipitor nguna, torotokis ka ngirukitos keng totenikis ekipor lo enyaritae Kediron. Ayei neni amana, tolomasi Yesu ka ngirukitos tooma mana ngina.

²Ayeni Yuda lo arikokini Yesu ngitunga neni, kainyo aloseenete Yesu ka ngirukitos keng inaa jiik.

³Toloto Yuda ka ngasigerea a Ngiroma ta ngasigerea ngache naeyokiyete akai a Akuj, kirukosi mana. Ameunito kesi ngimurok luapolok ka Ngiparisayo. Atingito ngitunga ngulu ngiboro daang luejie ka ngataae ta ngakinwaket.

⁴Kona ayenea Yesu ngakiro daang na esubakinio anikeng, dio tachadun ngaren ani ayakasi luche kingit kesi tama, “Ngae isakete esi?”

⁵Tatachut tamasi, “Yesu lo a Nasaret, ngesi kisaki.” Tolim tama, “Ayong lo.” Awei Yuda lo arikokini Yesu ngitunga ka kesi aapei.

⁶Na alimokinea Yesu kesi tama, “Ayong lo,” kiyotosi kaku sodi tadakakinos kwap.

⁷Kingit Yesu kesi nabo tama, “Ngae isakete esi?” Tolimut tamasi, “Yesu lo a Nasaret ngesi kisaki.”

⁸Tolimok Yesu kesi tama, “Abe kalimok bo tete ayong esi atamar ayong lo. Ani kisakete esi ayong, kimiekisi luche lugu toloto.” (

⁹Alimuni ngesi nugu sodi kiyookinotor ngakiro nasek alimuni ngesi ebala, “Apa, emam lukolong kiinakini iyong ayong luachaka tani ipei.”)

¹⁰Tout Simon Petero ekileng lo atingit kitel ekedalan epei a Emuron a Loapolon a akai a Akuj nakit na aloteten. Anyaritae ekedalan ngolo Malko.

¹¹ Tolimok Yesu Petero tama, “Kirepak ekileng kon nisek eyei! Itamit iyong atamar nyamasea ayong ekopo lo aboliaro lokainaki ayong Apakang loa?”

¹²Apot ngasigerea a Ngiroma ka ekapolon kech ta ngasigerea a Ngiyaudi kirumut Yesu toena,

¹³torikosi ngesi mono ekingaren nia Anas kainyo arai ngesi lokamuran a Kayapa alo arai Emuron Loapolon ekaru ngolo.

¹⁴ Arai Kayapa losek etutuki Ngiyaudi atamar ejoikinit itwaan ipei etoani kotere ngitunga daang.

¹⁵Ewapito Simon Petero ka erukitos eche Yesu. Kona ayenea Emuron Loapolon a akai a Akuj erukitos loche ngolo, tolomasi ngesi ka Yesu tooma nalaar a akai a Emuron a Loapolon kangolo.

¹⁶Kidong Petero towo anikalapatan a ekidor. Sodi tobongo erukitos loche ngolo tani lokidor kisuruorik apese na eyoki ekidor dio arikor Petero tooma.

¹⁷Kingit apese na eyoki ekidor Petero tama, “Meere iyong epei a ngirukitos a Yesu a?” Tatachak Petero tama, “Mam, nyarai ayong.”

¹⁸Kona alilimuunitor akatorot, kinokakis ngikasubak etich ka ngasigerea akim. Eriamito kesi akim ipiarasi. Sodi tolot Petero dang towo kaneni kipier akim.

¹⁹Kingitana Emuron Loapolon a akai a Akuj Yesu ngakiro a ngirukitos keng ka ngakitatamet keng.

²⁰Tatachak Yesu tama, “Kiruoro ayong ka itwaan daang ngakiro na ileerete, ngirwa daang etatami ayong anakais a Atuk ka akai a Akuj dang ni eriameenete Ngiyaudi daang. Emam akiroit alim ayong emunonit.

²¹Nyo tokona kingichingicha iyong ayong? Kingita ngitunga lungoon eirasi ngakiro kang atamar abala ayong ai. Eyenete kesi ngakiro na eruoro ayong.”

²²Na alimunio Yesu nguna, abu asiger apei kibap ngesi tama, “Nyo isuruorea iyong Emuron Loapolon a Akuj kona?”

²³Tatachak Yesu tama. “Ani kasechit ayong, tolimok iyong ngitunga ibore ni asechit ayong. Ani pekasechit ayong, nyo kibapea iyong ayong?”

²⁴Sodi tama Anas torikosi ngesi eringa eenen nia Kayapa, Emuron Loapolon a akai a Akuj.

²⁵Aringa Petero ewei kaina ipiara. Sodi kingita luche tamasi, “Meere iyong dang epei a ngirukitos a itwaan kangini a?” Topeg Petero tama, “Mam, nyarai ayong.”

²⁶Tolim ekedalan epei a Emuron a Loapolon a akai a Akuj lo arai eyenet a itwaan ani eteli Petero akit tama, “Abe esibit bocha ketee ayong iyong alomana ka ngesi?”

²⁷Tolim Petero nabo tama, “Mam”, sodi toruk ekokoroit atipei.

²⁸Nataparach elilim, torikoroe Yesu alokai a Kayapa totenere kai naapolon a Ekapolon a Ngiroma aloochi enyaritae Pilato. Nyelomara ngikapolok a Ngiyaudi tooma kai ngina kainyo asakete kesi akitaleun tanyameta akimuj a esukukuu alo enyaritae Adeparet.

²⁹Sodi topudo Pilato nikalapatan kingit kesi tama, “Anukiro ititakinitotor esi itwaan en?”

³⁰Tatachakis tamasi, “Arai nyesubite ngesi naaronok, pekirikunit ngesi nikon.”

³¹Tolimok Pilato kesi tama, “Kasiosi robo esi torikosi ngesi kititata loger a etal kus.” Tatachakis Ngiyaudi tamasi, “Nyikichamakinitae sua kititae itwaan ataara.” (

³² Asubakinosi nguna sodi kiyookinotor ngakiro na alimuni Yesu idodiunit atamar akitu ikoni ai, etoani ngesi.)

³³Tobongo Pilato tooma kai naapolon tanyara Yesu kingit ngesi tama, “Iyong ngesi irai ekapolon a Ngiyaudi a?”

³⁴Tatachak Yesu kingit tama, “Eraakasi ngakiro nakingisit iyong ayong nugu ngakiro kon a ilope, kori ngitunga ngiche kilimokinete iyong ngakiro kang?”

³⁵Tatachak Pilato kingit tama, “Esibit iyong arai ayong Eyaudit a? Eraakasi ngitunga kon ka Ngiyaudi ta Ngimurok Luapolok a akai a Akuj kesi kirikunete iyong nikang. Nyo isubit iyong?”

³⁶Tolim Yesu tama, “Nyerai apolou kang aka akwap kana. Arai tarai apolou kang aka akwap kana, kejito ngirukitos kang kotere ayong, nakaneni pekerumunito ayong Ngiyaudi. Nyerai apolou kang dir aka akwap kana!”

³⁷Sodi kingit Pilato Yesu tama, “Ikwa irai iyong ekapolon a?” Tatachak Yesu tama, “Ilimu iyong atamar arai ayong ekapolon. Abuni kolong ayong kedoun anakwap kana kotere ibore ipei, atamar eruor ngakiro na iteni. Itwaan cha daang ni emina ngakiro na iteni, epupi ngakiro kang.”

³⁸Kingit Pilato tama, “Nyo erai iteni?” Ani kelimu nguna kerumor, tobongo Pilato nia Ngiyaudi tolimok tama, “Emam akisech tani edit na aripu ayong anitwaan kaen na etita ngesi.

³⁹Nakaneni echamakina alotal kus alachanakini ayong jiik ngirwa lu a Esukukuu a Adeparet itwaan ipei ni eenitae. Isakete esi atalachak ekapolon a Ngiyaudi a?”

⁴⁰Tachalut kesi tamasi, “Mam, meere ngesi, kisaki talachak Baraba!” (Arai Baraba erukoot.)