Read turkana Yoana 19 Bible Online

Yoana 19 - turkana bible

Yoana 19

¹Sodi Pilato atamar torikoroe Yesu kidetae a amunyororo.

²Kidanyakis ngasigerea apukot na a ngiikwa, tobutokis nakou keng, kitanapa ngesi eworu lokooyen lopus-kirion.

³Sodi pot nikeng kimalata tamasi, “Ekapolon a Ngiyaudi toyei!” Sodi toloto kibapanasi ngesi.

⁴Topudo Pilato nikalapatan nabo tolimok asepich a ngitunga tama, “Abala ayong esi a! Arikuni ayong itwaan en nikus, kedodik esi atamar emam akiroit naaronon na aanyu ayong anikeng.”

⁵Sodi topud Yesu nikalapatan enapit apukot a ngiikwa, ta eworu lokooyen lopus-kirion. Tolimok Pilato kesi tama, “Kingolikisi a! Itwaan ngesi en!”

⁶Na engolikineta Ngimurok Luapolok ka ngasigerea a akai a Akuj ngesi, tachalut tamasi, “Taramakisi ngesi napir! Taramakisi ngesi napir!” Tolimok Pilato kesi tama, “Torikosi robo esi taramakis napir, emam robo ayong akiroit naaronon erira ngesi.”

⁷Tatachut Ngiyaudi tamasi, “Eyei sua etal lo igiritae atamar ejoikinit ngesi etoani kainyo abala ngesi arai Lokookeng a Akuj.”

⁸Na eirarea Pilato kesi elimunete akiroit ngina, tobul ngesi noi.

⁹Toloma Pilato nabo tooma akai naapolon kingit ngesi Yesu tama, “Aliwae ibunitor iyong?” Nakaneni kililing Yesu.

¹⁰Tolimok Pilato ngesi tama, “Iwounit iyong ekiruor ka ayong a? Nyiyeni iyong atamar eyei ayong agogongu nakalachakinea iyong kori nakaramakinea iyong napir a?”

¹¹Tatachak Yesu tama, “Emam iyong agogongu tani nadiochichi anikang, pearai nakiinakini iyong Akuj, nakaneni itwaan nikarikokini ayong iyong ngesi esechit noi.”

¹²Na eirarea Pilato ngakiro nguna, tasak lokojokon alachakin Yesu, nakaneni apot Ngiyaudi tachalakis tamasi, “Ani kilachak iyong ngesi, meere iyong lopae keng a ekapolon a Ngiroma! Itwaan daang ni ebala abe arai ngesi ekapolon, erai ngesi emoit a ekapolon a Ngiroma!”

¹³Na eirarea Pilato nguna, abu toriko Yesu nikalapatan, kiboikin ngesi lokicholong lotubet ekies ani enyaritae “Amoru etokokino,” (kori a ngabukui a Ngieburaniae anyaritae “Gabasa.”)

¹⁴Arai naparan lotingilan a akolongit ana ingareni esukukuu lo a Adeparet. Tolimok Pilato Ngiyaudi tama, “Kingolikis a! Ekapolon kus lo!”

¹⁵Tachalut tamasi, “Taara! Taara kare! Taramakisi napir!” Kingit Pilato kesi tama, “Isakete esi ayong ataramak ekapolon kus napir a?” Tatachakis Ngimurok Luapolok a akai a Akuj tamasi, “Ekapolon a Ngiroma bon ngesi erai ekapolon kosi!”

¹⁶Sodi torikok Pilato Ngiyaudi Yesu esaki taramakis napir. Sodi torikosi kesi Yesu.

¹⁷Topudo ngesi eriongit apir keng tanang ni enyaritae, “Akulului a Akou.” (Enyaritae a ngabukui a Ngieburaniae “Gologota.”)

¹⁸Taramakis ngesi ka ngitunga ngiche ngiarei neni, ipei lokwaas epei, ipei nabo lokwaas loche, Yesu kiding.

¹⁹Kigir Pilato ngakiro na ikote nege dio atamar taramakinae napir, “Yesu lo a Nasaret, ekapolon a Ngiyaudi.”

²⁰Nakaneni apot Ngiyaudi lukaalak kisomata ngakiro nguna, kainyo aapi ni aramakinitae Yesu alore. Egiritae ngakiro nguna a ngabukui a Ngieburaniae ka Ngiroma ta Ngigirik.

²¹Tolimokis Ngimurok Luapolok a akai a Akuj Pilato tamasi, “Nyiigir atamar, ‘Ekapolon a Ngiyaudi, kigir atamar ngesi lo abala arai ekapolon a Ngiyaudi.’ ”

²²Tatachak Pilato tama, “Egir ayong nguna loger lo egir.”

²³Na arumoreta ngasigerea aramakin Yesu napir, tolemut ngiworui keng totiaka ngatiaket ngoomwon, tolema asiger apei atiaket apei. Tolemut tani eworu keng lokooyen lo ebutubutaara napei alokidiama tanang kwap, amam atorosit na elachanarere.

²⁴ Tolimokinos ngasigerea tamasi, “Nyikichilichil, elekisi ngisigira ataanyutu kerauni eka ngae.” Asubete kongina sodi kiyookinotor ngagiran nakolong egirio atamar, “Atiakete ngiworui kang, kileeto eworu kang ngisigira.” Ngakiro napei nguna kesi asubete ngasigerea.

²⁵Itiokeng a Yesu ka nakaatokeng a itiokeng a Yesu, ka Mariam aberu a Kilopa ta Mariam Magadalene kesi awaasi alo diyete apir a Yesu.

²⁶Kingolik Yesu itiokeng ka erukitos lo amina ngesi ewaasi kaneni. Tolimok ngesi itiokeng tama, “Akimat, kingolik a, lokookon lo.”

²⁷Ani erumor, tolimok Yesu erukitos ngolo tama, “Kingolik a, itiokon naga.” Napei ngina jik, toriko erukitos ngolo akimat ngina nawi keng.

²⁸ Ayeni Yesu atamar arumor tokona ngakiro daang. Kona asakea ngesi kiyookinos ngakiro nakolong egirio, tolim ngesi tama, “Kanyam akure.”

²⁹Ayei atubwa neni na eleleba emuna lo epuritoe loadwaran, sodi kirepakis ibore niyebuk tooma emuna loadwaran ngolo, nabo todupakis ibore ngini ngaren akitoe a isopo,*g** kikekis ngesi kiwaakis lopon keng.

³⁰Ani emasi Yesu emuna loadwaran ngolo, tolim ngesi tama, “Arumor.” Sodi kijuuru totoan.

³¹Sodi tolimokis ngikapolok a Ngiyaudi Pilato atamar tobilae ngakejen a ngitunga alu aramakinitae napirio sodi totiyaunere kesi anapirio. Asakete kesi tosubae kongina kainyo arai akolongit ngina Ijumaa, nakaneni peachamito kesi ngawat epete napirio akolongit na enyaritae Sabato. Arai sabato ngina na Esukukuu alo a Adeparet.

³²Sodi torotokis ngasigerea tobila ngakejen a itwaan ani a ekingaren ka loche, lu aramakinitae ka Yesu napirio.

³³Na anangeta nia Yesu, toriamut ketoana, nyebila kesi ngakejen keng.

³⁴Nakaneni kichum ngesi asiger apei losiep, tobukun ngaakot ka ngakipi atipei. (

³⁵Eruor lo aanyuni ngakiro nguna esubakinosi, sodi tonupeta esi ngakiro keng. Eraakasi ngakiro na alimuni ngesi ngaka iteni, nabo eyeni ngesi atamar iruoro ngakiro na iteni.)

³⁶Asubasi nugu sodi kiyookinotor ngakiro na igiritae kona, “Emam akoit keng ngina ebilio.”

³⁷ Nabo igiritae ngagiran ngache kona, “Ingolikinete ngitunga ngesi lokolong echumete.”

³⁸Ani erumor ngakiro nguna, tolot Yosep lo arai itwaan a akwap ka Arimatea nia Pilato atamar asaki akwaan a Yesu. (Arai Yosep a Yesu nakaneni peayenete ngitunga kainyo aemit ngesi ngikapolok a Ngiyaudi.) Tolimok Pilato ngesi atamar tolema akwaan a Yesu, sodi tolot ngesi tolema.

³⁹Kirukosi Nikodemo ka Yosep, Nikodemo ngolo ngesi lokolong abunit nia Yesu nakwaare. Atingit ngesi ngakiloi esibit ngatomwon-uni a echuchuka ka ekinyaate lokaakunyon emorikina wapei.

⁴⁰Tolemasi kesi akwaan a Yesu, toena a ngawarui, nabo kiwaakis ekitoe lokakukunyon ngolo tooma ngawarui keng, kainyo arai etal a Ngiyaudi akisub kongina na esaketa akinuk itwaan.

⁴¹Ayei amana ni aramakinitae Yesu. Tooma amana ngina ayei aliel nakitetet na aringa itwaan nyenukakina a ache.

⁴² Tonukakis Yesu neni kainyo arai akolongit ngina na ingareni Sabato, tarai nabo dang aapi aliel ngina alo diyete kaneni.