Read turkana Yoana 2 Bible Online

Yoana 2 - turkana bible

Yoana 2

¹Akolongit na a ngauni, eutae alore a Kana anakwap a Galilaya. Ayei itiokeng a Yesu neni.

²Anyaraunitae Yesu dang ka ngirukitos keng nakuuta ngina.

³Ani edaun emuna lo epuritoe, tolimok itiokeng a Yesu ngesi tama, “Adaun emuna kech lo epuritoe.”

⁴Tatachak Yesu itiokeng tama, “Akimat, ibala tokona iyong ekokini ayong ai? Eringa esaa kang nyenanga.”

⁵Tolimok itiokeng a Yesu ngikasubak etich tama, “Tosuba daang na kilimokini ngesi esi.”

⁶Ayakasi neni ngamoti nalupei ngakan-kapei na eraakasi ngadepe ngaarei kori ngauni ilelebitae. Ewaakinitae neni eraakasi ngakilotanaret loger lo echamakinitor etal a Ngiyaudi.

⁷Tolimok Yesu ngikasubak etich tama, “Kileleba ngamoti nugu ngakipi.” Apot kileleba kipichunos,

⁸tolimok Yesu kesi tama, “Tookutu nakis ekapolon a akuuta.” Nasi kesi ngesi ngakipi,

⁹na apot kibelos toliwor emuna lo epuritoe nguna, nakis ekapolon kiir. Peayeni ngesi ni etoruni emuna ngolo, (nakaneni ayenete ngikasubak etich lu aokunete ngakipi ni etoruni), sodi tanyara ekapolon ekeutan,

¹⁰tolimok tama, “Ekoreene itwaan daang emuna loajokon ekingaren, ani eupi ngitunga lokojokon, tokor ngesi loapenan. Nakaneni irichu iyong emuna loajokon tani tokona!”

¹¹Akitoodikinet nakaililon ngina ngesi erai na a ekingaren na asubi Yesu alore a Kana anakwap a Galilaya. Sodi kidodiu ngesi apolou keng, nabo tonupa ngirukitos keng ngesi.

¹² Arumoret nguna, toloto Yesu ka itiokeng, ka ngikaitotoi keng, ta ngirukitos keng Kaperinaum, kiboikinos inaa ngirwa ngidikidio.

¹³Kona aapikinitor ngirwa a esukukuu a Adeparet, tolot Yesu Yerusalem.

¹⁴Toriam ngesi ngitunga lu agialanarete ngaatuk, ka ngamesekin ka ngakurio ta ngulu ebwangete ngaropiyae ibooyete alokai a Akuj.

¹⁵Tosubak ngesi amunyororo sodi kitwarak ngibaren daang alotooma akai a Akuj, ngamesekin ka ngaatuk. Tobuko ngesi ngaropiyae alu abwangete ngaropiyae, nabo kibelukwaa ngimeesae kech.

¹⁶Sodi tolimok ngitunga lu agialanarete ngakurio tama, “Kipudosi ngiborei lugu kane! Nyiitiliwosi Akai ka Apakang akai nagielet ngiboro!”

¹⁷ Kitamut ngirukitos keng atamar igiritae nagiran kona, “Eger lo aminar ayong akai kon, kanomit ayong loger a akim!”

¹⁸Kingita ngikapolok a Ngiyaudi Yesu tamasi, “Ani kitoodikinet nakaililon isubakini iyong kidodik sua atamar kichamakinitae iyong dir isubi ngakiro nugu?”

¹⁹ Tatachak Yesu tama, “Tobwanga Akai na a Akuj naga dio atodukok ayong atorumo a ngirwa a nguuni.”

²⁰Kingita kesi ngesi tamasi, “Ekoe! Akai na adukio a ngikaru ngitomwon-omwon ka ngikan-kapei, ngesi ibala iyong idukokini a ngirwa a nguuni a?”

²¹Nakaneni arai akai na alimit Yesu ngakiro a akwaan keng.

²²Na ayarunea ngesi, kitamut ngirukitos keng atamar abala kolong neni, sodi tonupa ngagiran ka ngakiro na alimuni Yesu.

²³Na ayakar Yesu Yerusalem ngirwa lua esukukuu a Adeparet, tonupa ngitunga lukaalak ngakiro keng kotere ngakitoodikinet nakailiilok na asubi ngesi.

²⁴Nakaneni peamuno Yesu kesi, kainyo ayeni ngesi ngitamen a ngitunga kadaang lokojokon.

²⁵Peasaki ngesi itwaan tolimok ngesi ngakiro a ngitunga, kainyo ayeni ngesi na eya lotai kech.