Read turkana Yoana 20 Bible Online

Yoana 20 - turkana bible

Yoana 20

¹Jumapili nataparach elilim eringa eribokinit, kiswakak Mariam Magadalene. Tanang naliel kingolik amoru naapolon kelemar anakituk a aliel.

²Tamatar ngesi tanang nia Simon Petero ka erukitos loche, erukitos lo amina Yesu. Tolimok ngesi kesi tama, “Kelemar akwaan a Ekapolon analiel, nyikiyeni nikiwaakin!”

³Torotok Petero ka erukitos loche ngolo kiwapakis erot toloto naliel.

⁴Kipiirioto daang kwasiarei, nakaneni kipiiri erukitos loche ngolo lokojokon kilany Petero, kingarenik kisiau naliel.

⁵Tokudokin ngesi toripak, kingolik ngawarui eperete, nakaneni nyelomara ngesi tooma.

⁶Todolu Simon Petero lo ewapit ngesi, tolot toloma tooma naliel kingolik ngawarui eperete,

⁷nakaneni peaperi awaru nasek elogakinitae nakou a Yesu ka ngawarui nache. Ayei nikeng bon achadakina, nabo tobilakina.

⁸Sodi toloma erukitos loche dang losek esiauni naliel kingolik, tonup dir. (

⁹Nakaneni aringa kesi nyeyana ngagiran na egiritae atamar ejoikinit eyaruni.)

¹⁰Sodi torotokis ngirukitos ngulu toloto nawiyei kech.

¹¹Nakaneni awei Mariam anikalapatan a aliel igoro. Ani na egoror, tokudokin toripak tooma aliel.

¹²Sodi kingolik ngimalaikae ngiarei lu anapito ngiworui luakwaak ibooyete. Ebooyi epei alowae alo a akou, kibooye loche alowae alo a ngakejen, anisek anukakinitae akwaan a Yesu.

¹³Kingita kesi ngesi tamasi, “Akimat, nyo igoror iyong?” Tatachu tama, “Abe kelemar bo akwaan a Ekapolon kang, nakaneni nyayeni ayong nikiwaakin!”

¹⁴Na alimunio ngesi nguna, torei kingolia kaku, kingolik Yesu ewei kaneni, peayeni ngesi atamar Yesu ngesi ngolo.

¹⁵Kingit Yesu ngesi tama, “Akimat, nyo igoror iyong? Ngae isaki iyong?” Abala Mariam kori erai itwaan ngini eketeon a amana, tolimok tama, “Lokaapaan lo, ani kerai iyong ilemarit ngesi, tolimokinae ni iwaakinit sodi atolot ayong atolema ngesi.”

¹⁶Tanyara Yesu tama, “Mariam!” Torei ngesi tolim a ngabukui a Ngieburaniae tama, “Raboni!” (Eger keng atamar, “Eketataman.”)

¹⁷Tolimok Yesu ngesi tama, “Nyikiting, kainyo eringa ayong nyebongo nika Apakang. Nakaneni tolot lokaitotoi kang, tolimok kesi atamar alosi ayong nawi ka Apakang, kangolo erai Apa kus, Akuj kang, nabo tarai Akuj kus.”

¹⁸Tolot Mariam Magadalene tolimok ngirukitos a Yesu atamar engolik ngesi Ekapolon. Sodi tolimok Mariam kesi ngakiro na alimokini Yesu ngesi.

¹⁹Atabong a Jumapili, eriamiriamito ngirukitos a Yesu tooma kai, egolito ngidorin daang ani aemitotor kesi ngikapolok a Ngiyaudi. Bu Yesu towo alokiding kech, tolimok tama, “Ekisil min nikus.”

²⁰Ani erumori alimun ngakiro nguna, kidodik kesi ngakan keng ka esiep keng. Talakaros ngirukitos a Yesu noi na engolikineta Ekapolon.

²¹Tolimok Yesu kesi nabo tama, “Ekisil min nikus. Kona kolong kameunea ayong Apakang, kameari ayong dang esi.”

²²Na alimunio ngesi nguna, dio kiangak kidiama kech, tolimok tama, “Taanyutu Etau a Akuj.

²³ Ngitunga daang lu irimakinete esi ngasechesea kech, erimakinio, ngulu daang nyirimakinete esi ngasechesea kech, nyerimakinio.”

²⁴Pearukito Tomas (lo enyaritae Emuut) lo arai epei a ngirukitos alutomon ka ngiarei a Yesu ka luche na abunio Yesu.

²⁵Sodi tolimokis ngirukitos luche Tomas tamasi, “Kianyunga sua Ekapolon!” Tolimok Tomas kesi tama, “Ani pekaanyunga ngaporos a ngisumarea anakan keng, sodi atatap neni a ekimoin kang, nyanupi ayong.”

²⁶Adaunet a ngirwa a ngikan-kauni, ayakasi nabo ngirukitos keng tooma kai arukito ka Tomas dang. Bu Yesu egolol ekidor towo alokiding kech, tolimok tama, “Ekisil min nikus.”

²⁷Sodi tolimok Yesu Tomas tama, “Kiwaak ekimoin kon nege tatap ngakan kang, sodi kitorwaa tani akan kon tatap esiep kang. Nyiiliwor itwaan nikangayan, toliwor nikanupan!”

²⁸Tolim Tomas tama, “Ekapolon kang! Akuj kang!”

²⁹Tolimok Yesu Tomas tama, “Inup tokona iyong ani kingolikinea ayong a? Epiaritae noi lu enupete ngakiro kang eringa nyingolikina ayong!”

³⁰Asubi Yesu ngakitoodikinet nakailiilok ngache nakaalak alongaren ngirukitos keng, nyigiritae ngakiro nguna nakitab naga.

³¹Nakaneni igiritae nugu tonupeta esi atamar Yesu erai Kiristo Lokookeng a Akuj, sodi ani kinupa esi ngakiro keng, taanyut akiyar anikeng.