Read turkana Yoana 21 Bible Online

Yoana 21 - turkana bible

Yoana 21

¹Ani erumor nguna, kidodiun Yesu nabo alorukitos keng na ayakatar nanam na enyaritae Tiberia. Ekokini ngesi idodiun nege.

²Ayakasi ngitunga lugu wapei, Simon Petero ka Tomas (lo anyaritae Emuut,) Nasaniel (lo arai itwaan a akwap a Kana ana eyei Galilaya,) ka talokookeng a Sebedayo, ta ngirukitos ngiche ngiarei nabo.

³Tolimok Simon Petero luche tama, “Alosi ayong akichiem.” Tolimut luche tamasi, “Kirukori tani sua dang ka iyong.” Toloto kesi akichiem edokito atubwa. Nakwaare kiiya, emam ibore erumut kesi.

⁴Ani nataparach ipiripiruuni akolong, bu Yesu towo alokwaas a ngakipi. Nakaneni nyeyana ngirukitos keng atamar ngesi ngolo.

⁵ Sodi kingit Yesu kesi tama, “Ngikiliok! Eyei ibore idio irumut esi a?” Tatachut tamasi, “Emam jik.”

⁶Tolimok Yesu kesi tama, “Tachakakisi epuute kus lowae lo a aloteten a atubwa, irumunete esi ngikolia.” Tachakakis epuute kech neni sodi kirumut ngikolia lukaalak noi, kipiyo tani akirikin tooma natubwa.

⁷Tolimok erukitos lo amina Yesu Petero tama, “Erai ngesi Ekapolon!” Na eirarea Petero atamar erai ngesi Ekapolon, kilogakin eworu keng lodapal, (kainyo amam ibore anapit ngesi ekingaren) dio toloma nakipi.

⁸Pot ngirukitos luche tanangut lokwaas a atubwa, irito epuute lo eleleba ngikolia, kainyo aapiyete kesi alokwaas a ngakipi araakasi ngamitae amiat apei.

⁹Na ananguneta nikalapatan, kingolikis ngatotol na anokete, eya ngikolia kidiama kech ka ngamugati dang.

¹⁰Tolimok Yesu kesi tama, “Yautu epewae a ngikolia alu tokona irumunete esi.”

¹¹Todoka Simon Petero natubwa, kiriu epuute lo eleleba ngikolia luapolok luaraakasi amiat apei ka ngitomwon-kan ka nguuni. Tani na alalaketa kongina, nyechila epuute ngolo jik.

¹²Tolimok Yesu kesi tama, “Potu kimuja.” Emam tani epei a ngirukitos keng lo asak akingit ngesi tama, “Ngae iyong?” Kainyo ayenete kesi atamar erai ngesi Ekapolon.

¹³Sodi tolot Yesu tolem ngamugati, nak kesi, dio nabo nak ngikolia dang kongina.

¹⁴Arai atakanuunet a Yesu na a ngauni alorukitos keng ngina, ekisidi a ayarunet keng.

¹⁵Na erikareta kesi akimuj, kingit Yesu Simon Petero tama, “Simon Lokookeng a Yoana, kimina iyong ayong noi idwangit lugu a?” Tatachak tama, “Ee, Ekapolon, iyeni iyong atamar kamina ayong iyong.” Tolimok Yesu ngesi tama, “Kitan ngimesekin kang.”

¹⁶Kingit na a ngaarei tama, “Simon Lokookeng a Yoana, kimina iyong ayong a?” Tatachak tama, “Ee, Ekapolon, iyeni iyong atamar kamina ayong iyong.” Tolimok Yesu ngesi tama, “Tochoik ngamesekin kang.”

¹⁷Kingit Yesu nabo na a ngauni tama, “Simon lokookeng a Yoana, kimina iyong ayong a?” Kialolong Petero ani engisea Yesu ngesi na a ngauni ebala, “Kimina iyong ayong a?” Sodi tolimok ngesi Yesu tama, “Ekapolon, iyeni iyong ngakiro daang, nabo iyeni iyong atamar kamina ayong iyong!” Tolimok Yesu ngesi tama, “Kiyok ngamesekin kang.

¹⁸Kalimokinit ngakiro na iteni dir atamar, kolong eringa iyong isorokona, isubanakin iyong tonyou tolot ni isaki alosit. Na imojongea iyong, ikeari iyong ngakan, bu itwaan niche kitoenik iyong ngiworui sodi kitoriko ni nyisakit iyong alosit.” (

¹⁹Alimuni Yesu nguna erai eger a akitu ana etoani Petero yaunea ekipur nia Akuj.) Ani erumor, tolimok Yesu ngesi tama, “Kiwapakinae!”

²⁰Torei Petero kingolik erukitos loche iwapit kesi, erukitos ngolo ngesi lo amina Yesu, lo erudakina nia Yesu na emujeta akimuj naka ebong, kingit tama, “Ekapolon, ngae kirikokini iyong ngitunga?”

²¹ Na engolikinea Petero erukitos ngolo, kingit Yesu tama, “Ekapolon, ani bo logo, ikokini ai?”

²²Tatachak Yesu ngesi tama, “Ani kasaki ayong ngesi toyar tanang ayong abuni, nyo kon nguna? Kiwapakinae iyong ayong!”

²³Tokeikin akiroit ngina lorukitos a Yesu daang atamar nyetoani erukitos ngolo. Nakaneni pealimunit Yesu atamar nyetoani ngesi, arai abala, “Ani kasaki ayong ngesi toyar tanang na abunio ayong, nyo kon nguna?”

²⁴Erukitos a Yesu ngolo ngesi eruoro ngakiro nugu sodi kigir dang. Kiyeni atamar eraakasi ngakiro na alimuni ngesi ngaka iteni.

²⁵Eyakasi ngitichisio lukaalak lu asubi Yesu. Arai kigirae daang angapei-pei, kelalaketa ngakitabea pekitemokin tani akwap daang.