Read turkana Yoana 3 Bible Online

Yoana 3 - turkana bible

Yoana 3

¹Ayei itwaan ni arai ekapolon a Ngiyaudi anyaritae Nikodemo, lo arai Eparisayot.

²Akolongit apei tolot nia Yesu nakwaare tolimok tama, “Rabi, kiyeni atamar irai iyong eketataman lo ibuni ani a Akuj, kainyo emam itwaan ni esubi ngakitoodikinet nakailiilok na isubi iyong nugu, peerukito ngesi ka Akuj.”

³Tatachak Yesu ngesi tama, “Kalimokinit ngakiro na iteni dir atamar, ani pekidoun itwaan na a ngaarei, nyeanyuni Apolou a Akuj.”

⁴Kingit Nikodemo tama, “Ikokini itwaan idounio kerau ekasukout ai? Elomari nakook a itiokeng kidounoe na a ngaarei a?”

⁵Tatachak Yesu ngesi tama, “Kalimokinit iyong ngakiro na iteni atamar, ani pekidoun itwaan a ngakipi ka Etau a Akuj, nyelomari Napolou a Akuj.

⁶Idounio itwaan eyei apakeng ka itiokeng, nakaneni ni idounio a agogongu a Etau, erai ika Etau.

⁷Nyikitalasi ngakiro nugu ani kalimokinitor atamar ejoikinit kidounio na a ngaarei.

⁸Ekusi ekuwam lowae locha ekutari, nakaneni ipupi iyong ekuse keng, nakaneni nyiyeni ni ekutunitor kori ni ekutarit. Aloger alopei kangolo, ikoni neni itwaan daang ni idounio na a ngaarei kotere agogongu a Etau a Akuj.”

⁹Kingit Nikodemo ngesi tama, “Ikokinete ngakiro nugu esubakin ai?”

¹⁰Tatachak Yesu ngesi tama, “Ikwa nyiyeni tani iyong lo irai eketataman loapolon alo Isirael ngakiro nugu a?

¹¹Kalimokinit ngakiro na iteni dir atamar, kiruoro sua na kiyeni ka na kingolik, nakaneni nyechamuna esi nakilimok sua esi.

¹²Nakalimokinea ayong esi ngakiro na a ngakwapea kanu, nyiinupa esi, ikokinete esi inupete kalimok ngakiro na eponito anadis ai?

¹³ Emam itwaan iche alot kidiama nadis, pearai Lokookeng a Itwaan bon lo atiyaun anadis.”

¹⁴Loger lokolong ekearea Musa emun lo a asuat kiwaak nakitoe anariet, loger lopei ngolo, ejoikinit Lokookeng a Itwaan ikeario,

¹⁵sodi itwaan daang ni enupi ngesi, taanyu akiyar na nyedaun.

¹⁶Kona kolong aminar Akuj ngitunga a anakwap, tolemik ngesi Lokookeng lo edounitoe erai epei bon, sodi ani itwaan daang ni enupi ngakiro keng, nyeebukor, nakaneni toriam akiyar na nyedaun.

¹⁷Kainyo peameuni Akuj Lokookeng lotunga a akwap toliwor ekeriran kech, pearai toliwor Ekayuunan kech.

¹⁸Itwaan cha daang ni enupit Lokookeng a Akuj nyirirao, ani cha daang ni nyenupit, erirae tani tokona, kainyo nyenupa ngesi Lokookeng a Akuj lo erai epei bon.

¹⁹Ikoni eriras nege: abu akicha nakwap, nakaneni tominakis ngitunga aribu kisidwanga akicha, kainyo asubete kesi ngakiro naaronok.

²⁰Itwaan daang ni esubi ngakiro naaronok, eremokino akicha kori nyebuni nakicha, kainyo nyesaki eboyor keng loaronon ileereuni.

²¹Nakaneni itwaan cha daang ni esubi ngakiro na a iteni, ebuni nakicha, sodi kitatakanuut ngakiro na esubi ngesi atamar enupit ngesi Akuj.

²²Arumoret kanguna, toloto Yesu ka ngirukitos keng nakwap a Yudea. Kiboyoto mono ka kesi kaina, ibatisae ngitunga.

²³Ebatisae Yoana dang ngitunga alo Ainoni ani aapi alo Salim. Kona ayakatar ngakipi nakaalak inaa, toloto ngitunga nikeng kibatisa ngesi. (

²⁴ Ngirwa ngulu, aringa Yoana nyeenikina lojela).

²⁵Tolomakis ngirukitos ngiche a Yoana apega ka Eyaudit epei kotere ngakiro a etal alo ilotare.

²⁶ Sodi toloto nia Yoana tolimokis tamasi, “Eketataman, itamunit iyong itwaan ningoon iyakasi ka iyong ekwakaye a angolol a Yorudan, dio kiruor iyong ngakiro keng a? Abe ibatisae ngesi ngitunga tokona, nabo alot ngitunga daang nikeng!”

²⁷Tatachak Yoana tama, “Emam itwaan eriamuni ibore pearai ni einakini Akuj ngesi.

²⁸Iyenete esi ngikulepek atamar alimuni ngoon ayong sek atama, ‘Meere ayong Kiristo, nakaneni kameunio ayong engareniu ngesi.’

²⁹Ekeutan ngesi elope a ateran, nakaneni elakar lopae keng a ekeutan na epupio ekeutan iruoro. Nguna kesi etemokis alakara kang.

³⁰Ejoikinit ngesi eyenikinio dio atoliwor ayong lo nyekayenikinitae.”

³¹Lo ebunit alokidiama, epolot noi idwangit daang. Lo ebunit anakwap, erai eboyor keng eka akwap, nabo iruoro ngakiro a akwap. Ni ebunit anadis ngesi epolokinit daang.

³²Iruoro ngesi na engolik ka na eira, nakaneni emam itwaan tani ipei ni echamunit ngakiro keng.

³³Nakaneni itwaan cha daang ni echamunit ngakiro keng, idodiunit ngesi atamar Akuj ngesi erai aka iteni.

³⁴Iruoro lo ameuni Akuj ngakiro a Akuj, kainyo ilelebi Akuj ngesi Etau keng peitemit.

³⁵Emina Apa Lokookeng, nabo ainaki ngesi ibore daang.

³⁶ Ni enupit Lokookeng eyei ngesi akiyar na nyedaun, ni nyenupit Lokookeng nyeanyuni akiyar, nakaneni emini anyunyura a Akuj nikeng.