Read turkana Yoana 4 Bible Online

Yoana 4 - turkana bible

Yoana 4

¹Kiirasi Ngiparisayo atamar ibatisae Yesu ngitunga, nakaneni eyakasi ngesi ngirukitos lukaalak lu idwangito lua Yoana. (

²Nakaneni peebatisae Yesu elope, arai ngirukitos keng ebatisaate.)

³Ani iirari Yesu ngakiro nguna, torotok anakwap a Yudea tobongo Galilaya,

⁴ asaki ngesi akitor nakwap a Samaria.

⁵Sodi tanang ngesi lore a Samaria lo enyaritae Sikar, diyete amana ngina kolong ainakinit Yakobo lokookeng Yosep.

⁶Ayei akar a Yakobo neni. Kiboikin Yesu diyete akar ani aburunitor noi anisek alosio. Arai ngisaa ngikan-kapei a apaaran.

⁷Bu aberu Nasamariat akuok ngakipi. Tolimok Yesu tama, “Nakinae ngakipi atamat.” (

⁸Alosito ngirukitos a Yesu lore akigiel akimuj.)

⁹ Tatachak aberu ngina tama, “Abe irai bo iyong Eyaudit, atarai ayong Asamariat, nyo kilipitor iyong ayong ngakipi namatan?” (Alimunit kongina kainyo peachamam Ngiyaudi ka Ngisamariae peamatasi tani ngakipi.)

¹⁰Tatachak Yesu ngesi tama, “Arai toyeni iyong ainakinet a Akuj ka lo kilipit iyong ngakipi namatan, kilipit iyong sodi kiinak iyong ngakipi na a akiyar.”

¹¹Tolimok aberu ngina ngesi tama, “Lokaapaan lo, abe emam iyong bo atubwa naokiet, tarai nabo ewoi akar. Aliwae ianyunea iyong ngakipi na a akiyar nguna?

¹²Itamit iyong atamar ipolot idwangit apaakosi Yakobo a? Apaakosi Yakobo ngesi kolong kiinakini sua akar naga, nikolong tani amaseene ngesi elope nege ka ngide keng ta ngibaren.”

¹³Tatachak Yesu ngesi tama, “Itwaan cha daang ni emasi ngakipi nugu, enyami akure nabo,

¹⁴nakaneni itwaan cha daang ni emasi ngakipi na iinakini ayong ngesi, nyenyami akure jik, kainyo ngakipi na iinakini ayong ngesi eliworosi eitanit alotooma keng toit jik, nakis ngesi akiyar na nyedaun.”

¹⁵Tolimok aberu ngina ngesi tama, “Ekaapaan, nakinae ngakipi nguna sodi nyakanyam akure nabo, kori nyaabongu nege akuok.”

¹⁶Tolimok Yesu ngesi tama, “Kape, tanyarau lokile kon kirukut nege.”

¹⁷Tatachak aberu ngesi tama, “Emam ayong ekile eyei.” Tatachak Yesu tama, “Ilim iyook atamar emam ekile,

¹⁸kainyo ayakasi iyong ngikiliok ngikan, lo tokona tani irukitotor iyong meere lokile kon. Ilim iyong nguna iyook.”

¹⁹Tolim aberu ngina tama, “Ekaapaan, ayen atamar irai iyong ekadwaran a Akuj.

²⁰Elipeenete ta apaakosi Ngisamariae Akuj alomoru kalo, nakaneni ibaasi esi Ngiyaudi ejoikinit ngitunga ilipete Akuj alo Yerusalem.”

²¹Tolimok Yesu ngesi tama, “Naberu na, tonup ngakiro kang, enangi esaa lo nyilipeta ngitunga Akuj Apa alomoru kalo kori alo Yerusalem.

²²Nyiyenete esi Ngisamariae ngolo ilipito. Kiyeni sua Ngiyaudi ngolo kilipit, kainyo ebunit ayuuno Aloyaudi.

²³Nakaneni enangi esaa, tani tokona anang esaa lo ilipeta ngitunga lu ilipito Apa na iteni dir, ilipete a Etau alo iteni dir. Ilipete eger lo esaki Apa kesi ilipitotor na iteni.

²⁴Akuj ngesi Etau, erai agogongu a Etau bon ngesi epedoreta ngitunga akilip ngesi na iteni.”

²⁵Tolimok aberu ngesi tama, “Ayeni ayong atamar ebuni Kiristo. Na ebunio ngesi, kilimokini ngoni ngakiro daang.”

²⁶Tatachak Yesu tama, “Ayong ngesi lokiruoro ka iyong logo.”

²⁷Esaa lopei ngolo tobongut ngirukitos keng, tatalasi kesi ngakiro na eruorotor ngesi ka aberu, nakaneni emam tani erukitos epei lo engit aberu ngina tama, “Nyo isaki iyong?” Kori lo engit Yesu tama, “Nyo iruorotor iyong ka aberu?”

²⁸Sodi toisik aberu ngina alupe keng na a ngakipi, tolot lore tolimok ngitunga kaina tama,

²⁹“Potu mono esi taanyutu itwaan nikalimokini ayong ngakiro daang nakolong asubi ayong. Ekoe, meere ngesi erai Kiristo a?”

³⁰Sodi torotokis kesi alore toloto nia Yesu.

³¹Kimaimaa Yesu ngirukitos keng tamasi, “Eketataman, kimuj kare!”

³²Nakaneni tatachak tama, “Eyei ayong akimuj nanyamat na nyiyenete esi.”

³³Sodi kingitanaros ngirukitos keng make tamasi, “Ekoe! Eyei itwaan kebu inu ngesi akimuj adio a?”

³⁴Tolimok Yesu kesi tama, “Akimuj kang ngesi akiwap naechamit lokolong kameuni ayong, nabo erikak etich keng.

³⁵Ikwa nyitamanarete esi, ‘Idongit ngilapio nguomwon sodi tolemikinae ngamanat a?’ Abala ayong esi a! Kingolikisi mono esi ngamanat, akoko kesi etemokin akilem!

³⁶Loger lo eriamunea ekaleman ngaropiyae na etachio ngesi nabo tochunak ngimomwa keng, ikote ngikanupak elomarete nakiyar na nyedaun neni, sodi talakaros eketan ka ekaleman aapei.

³⁷Kainyo eka iteni ekiruor lo ebeyo, ‘Itae itwaan ipei sodi tolem niche.’

³⁸Kamea ayong esi toloto tolema ngamanat na nyitakina esi, asubete ngiche etich nakaneni iyara esi kotere etich lo esubete kesi.”

³⁹Tonupa Ngisamariae lukaalak luayakasi lore ngolo ngakiro a Yesu kotere ngakiro na alimuni aberu ngina tama, “Kalimoki ayong Yesu ngakiro daang nakolong asubi.”

⁴⁰Pot Ngisamariae kimaimaa Yesu atamar kiboikinos ka kesi, kiboikin Yesu neni ngirwa ngiarei.

⁴¹Tonupa ngitunga ngiche lukaalak kotere akitatamet keng,

⁴²sodi tolimokis aberu tamasi, “Meere tokona ngakiro kon make kinupitor sua, kiira tani sua dang, nakaneni kiyen dir atamar ngesi dir erai Ekayuunan a ngitunga a akwap.”

⁴³Adaunet a ngirwa aluarei kangulu, torotok Yesu kaneni tolot Galilaya.

⁴⁴Kainyo alimuni sek Yesu elope tama, “Nyipuruunitoe ekadwaran a Akuj anakwap ana erai akeng a elope.”

⁴⁵ Na anangunea Yesu Galilaya, kitepeyono ngitunga a akwap kangina niajokon kainyo alosito sek kesi Losukukuu a Adeparet, lo ayei Yerusalem. Eteete sek kesi alo Yerusalem ibore daang niasubi Yesu alosukukuu.

⁴⁶Sodi tobongo nabo Yesu Kana, na a akwap a Galilaya, ni ebeleo ngesi ngakipi taraut emuna lo epuritoe. Ayei ekapolon a arieng neni lo adeaka lokookeng alo Kaperinaum.

⁴⁷Ani iirari ngesi atamar abu Yesu anakwap a Yudea anangu Galilaya, tolot kimaima atamar tolot Kaperinaum kitangalek lokookeng lo adikino etoani.

⁴⁸Tolimok Yesu ngesi tama, “Ani pekingolikis ngakitoodikinet nakailiilok ka nakatalarak, nyinupete jik.”

⁴⁹Tatachak ekapolon ngolo ngesi tama, “Ekapolon, bua kare apana eringa lokookang nyetoana.”

⁵⁰Tolimok Yesu ngesi tama, “Kape, eyari lokookon!” Sodi tonup ekapolon ngolo ngakiro na alimokini Yesu ngesi, dio tolot.

⁵¹Ani eringa elosi nawi, kisiriama ngikasubak etich keng ngesi tolimokis tamasi, “Ajoker tokona lokookon!”

⁵²Kingit ngesi kesi esaa lo esiakinea ajoker. Sodi tolimokis tamasi, “Been ngisaa a apaaran ngikan-kaarei adaunor elekes keng.”

⁵³Sodi kitam apakeng a edia kangolo atamar esaa ngolo alimokinea Yesu ngesi tama, “Eyari Lokookon.” Sodi tonupa ngesi ka ngiyenet keng daang ngakiro a Akuj.

⁵⁴Arai nguna ngakitoodikinet nakailiilok na a ngaarei na asubi Yesu na abunio anakwap a Yudea elosi Galilaya.