Read turkana Yoana 5 Bible Online

Yoana 5 - turkana bible

Yoana 5

¹Arumoret kanguna, tolot Yesu Yerusalem losukukuu a Ngiyaudi.

²Diyete ekidor a ngamesekin alo Yerusalem, ayei abwel na a ngagulei a ngakan. Enyaritae a ngabukui a Ngieburaniae Betisasa.

³Tooma nagulei nguna, ayei asepich nakaalan a ngikadeakak eperete, ngimuduk ka ngikechodok ta ngikangwalak. [Edarito kesi ngakipi ichulumakinio.

⁴Kainyo esaa eche abuneene emalaikat a Akuj toloma nabwel ngina akichulumakin ngakipi. Itwaan cha daang ni engarenikini alomar nakipi ekisidi a akichulumakino, tangalek edeke keng daang.]

⁵Nakaneni ayei itwaan neni ni adeaka a ngikaru a ngitomwon-uni ka ngikan-kauni.

⁶Kingolik Yesu ngesi eperi, sodi toyen atamar kedeaka itwaan ngini a ngirwa ngikaalak kingit tama, “Isaki iyong kitangalekin a?”

⁷Tatachak ekadeakan ngolo tama, “Lokile lo, na ichulumakinere ngakipi, emam ayong itwaan ni kelomakini ayong nabwel, na asakea ayong alomar, kisiau itwaan iche toloma eringa ayong.”

⁸Tolimok Yesu ngesi tama, “Tonyou tolema ejemu kon, torotok.”

⁹Tojoker itwaan ngini atipei tolema ejemu keng torotok. Asubasi ngakiro nguna akolongit na a Sabato,

¹⁰ sodi tolimokis Ngiyaudi itwaan ni etangalekinio tamasi, “Erai akolongit na Sabato, nyechamitae alotal idakit iyong ejemu kon.”

¹¹Tatachu itwaan ngini tama, “Itwaan niketangalekini ayong edeke ngesi kalimokini ayong atamar atolema ejemu kang atolot.”

¹²Kingita ngesi tamasi, “Ngae kilimokini iyong atamar tolema ejemu kon tolot?”

¹³Nakaneni peayeni itwaan ni etangalekinio atamar Yesu ngesi ngae, kainyo abu Yesu torotok ani ayei asepich a ngitunga kaneni.

¹⁴Ani ekisidi, toriam Yesu ngesi alotooma akai a Akuj, tolimok tama, “Ayoro, ijoker iyong tokona. Nyiisub akisech nabo, sodi nyianyun ka ngakiro naaronok noi.”

¹⁵Sodi tolot itwaan ngini tolimok Ngiyaudi atamar Yesu ngesi etangalekini edeke keng.

¹⁶Sodi tolomakis Ngiyaudi aboliar Yesu ani asubea nguna akolongit na a Sabato.

¹⁷Tatachak Yesu kesi tama, “Esubi Apakang etich jiik, ejoikinit ayong dang asubi etich.”

¹⁸Kotere ngakiro na alimuni Yesu nguna, tasaka Ngiyaudi akiar ngesi jik. Erai ni asechea ngesi etal a Sabato sodi nabo dang tanyara Akuj Apakeng, dio kidodiu neni atamar eriyan ngesi ka Akuj.

¹⁹Sodi tatachak Yesu kesi tama, “Kalimokinit esi ngakiro na iteni dir atamar, nyesubi Lokookeng a Akuj akiroit na erai akeng a ilope pearai esubi ngesi na itee Apakeng esubi. Nguna esubi Apakeng ngesi tani esubi Lokookeng.

²⁰Kainyo emina Apa Lokookeng nabo idodikini ngesi daang naesubi ngesi alope. Idodikini ngesi ngitichisio luapolok noi lu idwangito lugu. Esubi ngesi sodi kitatalasi esi daang.

²¹Aloger alopei iteyarunea Apa ngikatoak toyara, iteyari Lokookeng ngulu esaki.

²²Kori nyirirae Apa elope itwaan, nakaneni ainaki Lokookeng agogongu daang na irira,

²³sodi kipuruut ngitunga daang Lokookeng loger lo ipuruunitotor Apa. Itwaan cha daang ni nyipuruunit Lokookeng, nyipuruunit Apa lokolong ameuni ngesi.

²⁴“Kalimokinit esi ngakiro na iteni dir atamar, itwaan cha daang ni eira ngakiro kang nabo tonup ngolo kolong kameuni ayong, eyei akiyar na nyedaun. Nyirirao ngesi, nakaneni etor nakitu toloma nakiyar.

²⁵Kalimokinit ngakiro na iteni dir atamar, monan ngicherwa, tani tokona adol ngirwa ngulu, iirarete ngikatoak etoil a Lokookeng a Akuj, nakaneni ngulu iirarete, eyarete.

²⁶Kona eraakar Apa akisiakinet a akiyar, aloger alopei kangolo, etiliwo ngesi Lokookeng akisiakinet a akiyar.

²⁷Nabo ainaki ngesi Lokookeng agogongu na irira ngitunga, kainyo erai ngesi Lokookeng a Itwaan.

²⁸Warasi ngakiro nugu nyikitalasi, enangi monan ngirwa lu iirareta ngikatoak daang etoil keng,

²⁹ tolomut analielin kech, ngulu esubete naajokak iteyarunio, toyara, ngulu esubete naaronok iteyarunio, kirirae.

³⁰ “Emam ibore asubi ayong a apolou kang a ilope. Erirae ayong loger lokalimokinitor Akuj, sodi toliwor akirirare kang na etenoono, kainyo nyasaki ayong akisub na achamit ayong, pearai naechamit lokolong kameuni ayong.

³¹“Ani kalim ayong ngakiro na eraakasi ngakang a ilope, nyenupio ngakiro na alimuni ayong atamar eraakasi ngaka iteni.

³²Nakaneni eyei eche lo iruoro ngakiro kang, nabo ayeni ayong atamar ngakiro kang na iruoro ngesi eraakasi ngaka iteni.

³³Imearito esi ngitunga nia Yoana sodi kiruoror ngesi ngakiro na iteni.

³⁴Meere atamar egeno ayong ngakiro na elimunete ngitunga, alimunit nugu sodi toyuunotor esi.

³⁵Ekoni Yoana ataa na enoki nabo kimaunite, talakaros esi wadio kotere akicha keng.

³⁶Nakaneni alimoro kang epolot noi idwangit na a Yoana. Kainyo ngitichisio lukedodik ayong Apa atamar atorumo, ngitichisio ngulu ngesi asubi ayong tani tokona, kesi elimorito atamar Apa kameuni ayong.

³⁷Nabo Apa lokolong kameuni ayong ngesi kalimorit ayong. Nyiirara esi nakanuan etoil keng, kori nyingolikina esi ereet keng.

³⁸Nyinupete esi ngakiro keng kainyo nyinupito lokolong ameuni ngesi.

³⁹Isemeete esi ngagiran kainyo itamito esi atamar kori ianyunete akiyar na nyedaun anikech, nakaneni igiritae ngakiro kang nagiran nguna!

⁴⁰ Nakaneni nyichamito esi aponere nikang taanyut akiyar.

⁴¹“Nyasaki ayong kepuruut ngitunga.

⁴²Nakaneni ayeni ayong atamar esi kesi ta ngae. Ayeni ayong atamar nyiminasi esi Akuj alotai kus.

⁴³Abu ayong a apolou ka Apakang, nakaneni nyechamuna esi ngakiro kang. Ani kebu itwaan iche a ekileenu keng a ilope, ichamunete esi ngakiro keng.

⁴⁴Iminasi esi akipuro make, nakaneni nyisakete esi ekipur lo a Akuj ana erai apei bon, ikokinete tokona esi inupete ai?

⁴⁵Nyiitamasi robo kori ayong ketitakini esi ani ka Apakang. Musa lopei igenosi esi ngesi kititakini esi.

⁴⁶Arai tonupito esi dir ngakiro a Musa, kinupito tani nakang, kainyo egiri Musa ngakiro kang.

⁴⁷Nakaneni kona nyinupitotor esi ngakiro na egiri ngesi, ikokinete inupete ngakiro kang ai?”