Read turkana Yoana 6 Bible Online

Yoana 6 - turkana bible

Yoana 6

¹Arumoret kanguna, abu Yesu tobongo ekwakaye a anam a Galilaya (ngina erai ekiro eche Tiberia.)

²Kiwapak asepich a ngitunga ngesi, kainyo engolenakinete ngakitoodikinet nakailiilok na etangalenokinio ngesi ngikadeakak.

³Abu Yesu todoka kidiama moru kiboikinos ka ngirukitos keng aapei.

⁴Nabo aapuunit esukukuu a Ngiyaudi lo arai Adeparet.

⁵Nakaneni abu Yesu kingolia, taanyunga ajore nakaalan ebunit nikeng, sodi kingit Pilip tama, “Aliwae kigielea ngoni akimuj na itemokin ngitunga lugu daang?” (

⁶Alimuni ngesi nguna iningit Pilip, kainyo ayeni ngesi nguna esubakini.)

⁷Tatachak Pilip ngesi tama, “Tani kegiel ngamugati a ngadinari[1] a ngamiae a ngaarei, nyitemokin ngitunga lugu tani keanyu itwaan daang nadiochichi.”

⁸Abu epei a ngirukitos keng lo anyaritae Andirea, lokaatokeng a Simon Petero tolimok tama,

⁹“Eyei edia nege lo etingit ngamugati ngakan ka ngikolia ngiarei, nakaneni nyitemokinosi ngitunga lukaalak lugu.”

¹⁰Tolimok Yesu kesi tama, “Kisiboikisi ngitunga.” (Alibit neni noi.) Nakaneni kiboikinos ngikiliok lu araakasi ngabunge ngakan.

¹¹Sodi tolem Yesu ngamugati, kilipak ebuakinit Akuj alakara, sodi tokorak ngitunga lu ebooyete kaneni. Tokor ngikolia dang loger ngolo, taanyut ngitunga etiae lo asakete.

¹²Na emwoketa daang, tolimok Yesu ngirukitos keng tama, “Kideputu ngakimwoket na idongito, nyechakar tani apei.”

¹³Sodi kideput daang, kileleba ngategerin ngatomon ka ngaarei a akimuj ana apiyanun anamugati anasek kan anyamete ngitunga.

¹⁴Na engolikineta ngitunga ngakitoodikinet nakailiilok na asubi Yesu, apot kesi tamasi, “Iteni dir logo ngesi ekadwaran lokolong abeyo ebuni nakwap!”

¹⁵Ayeni Yesu atamar adikino kesi irumunete ngesi kitingakis aliwor Ekapolon, nakaneni abu ngesi tolot moru alopei.

¹⁶Na anangea ebong, toloto ngirukitos keng nanam,

¹⁷sodi todokasi natubwa tobongosi ekwakaye anam toloto Kaperinaum. Abu akwap kirioner eringa Yesu nyenanguna nikech.

¹⁸Esaa ngolo, tokut ekuwam lotiapolon kitukuu ngakipi.

¹⁹Apot ngirukitos taramasi atubwa ngakilomitae ngoomwon kori ngakan kingolikis Yesu elosi alokidiama ngakipi keapuu natubwa. Toema noi.

²⁰Tolimok Yesu kesi tama, “Nyieam, ayong itwaan!”

²¹Nakaneni asakete kesi ngesi tolom tooma natubwa, nakaneni tanang atubwa atipei nakwap na aloose kesi.

²²Akolongit nache, toyen ajore na ayei sek ekwakaye a anam atamar atubwa apei bon ayei neni. Ayenete kesi atamar nyirukoro Yesu ka ngirukitos keng anatubwa, erai ngirukitos keng make apot toloto.

²³Nakaneni pot ngatubwae ngache alo Tiberia tanangut lokwaas a anam diyete nisek emujea asepich a ngitunga ngamugati naelipakini Ekapolon Yesu.

²⁴Na ayenunea asepich a ngitunga atamar emam Yesu ka ngirukitos keng kaneni, todokasi kesi natubwae toloto Kaperinaum esakete Yesu.

²⁵Ani eriamunete ngitunga Yesu a ekwakaye anam, kingita tamasi, “Eketataman, ibuni iyong nege ori?”

²⁶Tatachak Yesu tama, “Kalimokinit esi ngakiro na iteni dir atamar, kisakete esi ayong kotere ngamugati na inyamete esi kimwoko, meere kotere ngakitoodikinet nakailiilok.

²⁷Nyiisuba etich kotere akimuj na inyasun, tosuba etich kotere akimuj na a akiyar ana nyedaun. Lokookeng a Itwaan ngesi kiinakini esi akimuj ngina, kainyo ewaak Akuj Apa emachar lo eminar ngesi nikeng.”

²⁸Sodi kingita ngesi tamasi, “Kikoni tokona sua kisubi ngitichisio a Akuj ai?”

²⁹Tatachak Yesu tama, “Etich a Akuj logo, tonupa ngakiro alo kolong ameuni Akuj.”

³⁰Tatachakis tamasi, “Akitoodikinet ani nakaililon isubakini iyong sodi engolikisi sua atonupeta ngakiro kon? Nyo isubakini iyong?

³¹ Anyamete ta apaakosi akimuj anyaritae manna anariet loger lo igiritere nagiran kona, ‘Ainakini ngesi kesi akimuj na abuni anadis tanyama.’ ”

³²Tolimok Yesu kesi tama, “Kalimokinit ayong esi ngakiro na iteni dir atamar, ‘Ibore nikiinakini esi Musa, meere akimuj na abuni anadis, Apakang ngesi kiinakini esi akimuj na iteni dir naebunit anadis.’

³³Kainyo akimuj nakiinakini esi Akuj ngesi lokolong abuni anadis, sodi nak ngitunga a akwap akiyar.”

³⁴Tolimokis tamasi, “Ekapolon, nanakinae sua akimuj naga jiik.”

³⁵Tolimok Yesu kesi tama, “Ayong ngesi arai akimuj na a akiyar, ni ebuni nikang, nyenyami akoro, ni enupi ngakiro kang, nyenyami akure jik.

³⁶Tokona a, kalimokini ayong esi atamar, kianyungasi esi ayong nakaneni nyinupito ngakiro kang.

³⁷Itwaan cha daang nikainakini ayong Apakang, ebuni nikang. Nyangeri ayong itwaan tani ipei ni ebuni nikang,

³⁸kainyo peabuni kolong ayong anadis akisub na asaki ayong, abuni akisub na esaki lokolong kameuni ayong.

³⁹Nakaneni nyesaki lokolong kameuni ayong atamar atachaka tani ipei kangulu kainaki ngesi ayong, nakaneni ejoikinit eteyaruni daang toyara akolongit na esal.

⁴⁰Kainyo na esaki Apakang ngesi atamar ngitunga daang luanyungarete Lokookeng a Akuj sodi tonupa ngakiro keng, eanyunete akiyar na nyedaun, nabo eteyaruni ayong kesi akolongit na esal.”

⁴¹Nakaneni apot Ngiyaudi kingunungunokis ani abalar ngesi, “Ayong arai akimuj na abuni anadis.”

⁴² Sodi tamasi kesi, “Ikwa meere itwaan en Yesu lokookeng a Yosep lo kiyeni ngoni apakeng ka itiokeng a? Nyo tokona ebalar ngesi abe abuni anadis?”

⁴³Tatachak Yesu kesi tama, “Toisikisi akingununguno make.

⁴⁴Emam itwaan tani ipei ni ebuni nikang mati kiriu Apa ngesi nikang, Apa lokolong kameuni ayong. Eteyaruni ayong itwaan ngini akolongit na a esal.

⁴⁵Egirete ngikadwarak kona, ‘Itatami Akuj ngitunga daang.’ Itwaan daang ni epupi ngakiro ka Apa, nabo kitatami anikeng, ebuni nikang.

⁴⁶Nyidodiunit ibore ngini atamar eyei itwaan engolik Apa, ngolo ebunit ani a Akuj ngesi bon engolik Apa.

⁴⁷Kalimokinit esi ngakiro na iteni dir atamar, ngini enupit ngakiro a Akuj eyei akiyar na nyedaun.

⁴⁸Ayong ngesi arai akimuj na akiyar.

⁴⁹Anyamete ta apaakus akimuj na anyaritae manna anariet, totoaka.

⁵⁰Nakaneni itwaan ni enyami akimuj ngina ebunit anadis, nyetoani jik.

⁵¹Ayong ngesi arai akimuj na a akiyar na abuni anadis. Ani kenyam itwaan akimuj ngina, nyetoani jik. Akwaan kang ngesi erai akimuj na alemuni ayong kotere akiyar a ngitunga a akwap.”

⁵²Tolomakis Ngiyaudi apega make ebalasi, “Ikokini itwaan en kiinakini ngoni akwaan keng be atanyama ngoni ai?”

⁵³Tolimok Yesu kesi tama, “Kalimokinit ngakiro na iteni dir atamar, ani pekinyam esi akwaan a Lokookeng a Itwaan, nabo tamata ngaakot keng, nyianyunete esi akiyar.

⁵⁴Itwaan cha daang ni enyami akwaan kang nabo tamat ngaakot kang, eanyuni akiyar na nyedaun, nabo eteyaruni ayong ngesi akolongit na esal.

⁵⁵Kainyo akwaan kang ngesi erai akimuj na iteni, nabo ngaakot kang kesi erai namatan dir.

⁵⁶Itwaan cha daang ni enyami akwaan kang, nabo tamat ngaakot kang, iboikin tooma kang, nabo eboikin ayong tooma keng.

⁵⁷Apa lo eyari ngesi kameuni ayong, nabo ayari tani ayong dang kotere ngesi. Aloger alopei kangolo eyari tani nikanyami ayong.

⁵⁸Nakaneni akimuj naga ngesi na abuni anadis, nyikoni ngamugati nakolong anyamete ta apaakus sodi totoaka. Itwaan ni enyami akimuj naga eyari jik.”

⁵⁹Eruoro Yesu ngakiro nguna alotooma akai a Atuk na etatamea ngesi ngitunga alo Kaperinaum.

⁶⁰Na eirareta ngirukitos keng lukaalak ngakiro nguna, apot tamasi, “Abe etiono akitatamet na noi. Ngae epupokini?”

⁶¹Nakaneni toyen Yesu atamar ingunungunosi ngirukitos keng kotere akiroit ngina, sodi tolimok kesi tama, “Akiroit naga kironik esi a?

⁶²Ikokinete esi arai kingolikis Lokookeng a Itwaan ebongori kidiama nikolong ayei ngesi ekingaren ai?

⁶³Etau a Akuj ngesi eyauni Akiyar. Emam ibore esubakini agogongu a itwaan. Ngakiro nakalimok esi nugu kesi eraakasi Etau a Akuj ka akiyar.

⁶⁴Nakaneni eya ngiche kus lunyenupito.” (Kainyo ayeni Yesu anakisiakinet atamar tangae nyenupete, nabo ngae erikokini ngesi ngitunga.)

⁶⁵Sodi keatak tama, “Ngakiro nguna ngesi kalimokinitor esi atamar emam itwaan ni ebuni nikang mati kiriu Apa ngesi.”

⁶⁶Tobongosi ngirukitos a Yesu lukaalak toisikis ngesi kotere ngakiro nguna.

⁶⁷Sodi kingit Yesu ngirukitos lutomon ka ngiarei tama, “Ani bo esi, isakete esi dang alosit a?”

⁶⁸Tatachak Simon Petero ngesi tama, “Ekapolon, nika ngae kilosi? Eya iyong ngakiro na a akiyar ana nyedaun.

⁶⁹ Nakaneni kinup sua, nabo kiyen atamar iyong irai lo italeuno a Akuj.”

⁷⁰Tatachak Yesu tama, “Kaseu ayong esi iraakasi ngitomon ka ngiarei, kori ai? Nakaneni ekipeik tokona epei kus!”

⁷¹Eruoro ngesi ngakiro a Yuda, lokookeng a Simon Isikariote. Kainyo Yuda lo arai epei a ngirukitos alutomon ka ngiarei, adikino erikokini Yesu ngitunga.