Read turkana Yoana 7 Bible Online

Yoana 7 - turkana bible

Yoana 7

¹Arumoret kanguna, alosi Yesu alo Galilaya. Peerimit ngesi akwap a Yudea, kainyo asakete Ngiyaudi akiar ngesi.

²Nabo aapikinit Esukukuu a Ngiyaudi lo anyaritae Ngikalea,

³nakaneni apot ngikaitotoi keng tolimokis ngesi tamasi, “Tonyou kane torotok anakwap kana, tolot nakwap a Yudea, sodi taanyuneta ngirukitos kon ngitichisio lu isubi iyong.

⁴Emam itwaan idait na esubi erai kesaki ngesi katoyenikin. Kona isubea iyong ngakiro nugu, kimiek ngitunga daang a ngakwapea toyena!” (

⁵ Peanupito tani ngikaitotoi keng ngakiro keng.)

⁶Tolimok Yesu kesi tama, “Eringa akolongit kang na etenoono nyedolo. Akolongit daang etenoono anikus.

⁷Nyikiremokinosi esi ngitunga a akwap, nakaneni karemokinosi ayong kainyo etoodenakini ayong kesi atamar erono eboyor kech.

⁸Kapesi esi losukukuu, nyalosi ayong losukukuu ngolo kainyo eringa akolongit kang na etenoono nyedolo.”

⁹Tolim ngesi nguna ani erumor tasal alo Galilaya.

¹⁰Ekisidi a alosiet a ngikaitotoi keng losukukuu, abu Yesu dang tolot edukit peeyenio.

¹¹Tasaka ngikapolok a Ngiyaudi ngesi losukukuu, ingitanarosi ebalasi, “Nyaali ngesi?”

¹²Engainga asepich a ngitunga noi ebala epewae, “Erai ngesi itwaan niajokon,” tamasi ngiche, “Mam”, tamasi nabo ngiche, “Ibatarit ngesi ngitunga.”

¹³Nakaneni emam itwaan ni eruoro ngakiro keng ileerete, kainyo aemito kesi ngikapolok a Ngiyaudi.

¹⁴Na anangea kiding Esukukuu, tolot Yesu tooma kai a Akuj, tolomak akitatam ngitunga.

¹⁵Tatalasi Ngiyaudi ngakiro nguna tolimut tamasi, “Ekoe! Ikoni itwaan en eyeni ngakiro nakaalak nugu toringa ngesi nyitatama ai?”

¹⁶Tatachak Yesu kesi tama, “Naetatami ayong meere ngakang, eponito ani a Akuj ana kameuni ayong.

¹⁷Itwaan cha daang ni esaki akisub na esaki Akuj, eyenuni keraakasi ngakiro na etatami ayong nia Akuj eponitotor kori atamar eruoro ayong na eraakasi ngakang a ilope.

¹⁸Itwaan ni iruoro ngakiro na eraakasi ngakeng bon, esaki kepuruun. Nakaneni ni esaki kipuruunoe lokolong ameuni ngesi, etenoono eboyor keng, nabo emam ngesi amodeanut.

¹⁹Kiinak kolong Musa esi etal, kori ai? Nakaneni emam tani ipei kus ni erichak etal a Musa. Nyo tokona isaketa esi akiar ayong?”

²⁰ Sodi tatachu asepich a ngitunga tama, “Kibapit karika iyong Ekipe. Ngae esaki akiar iyong?”

²¹Tatachak Yesu tama, “Asubakini ayong akitoodikinet nakaililon apei, nakaneni kitatalasi esi daang ngakiro nguna.

²²Kidungokini kolong Musa esi atamar kilengera ngide kus: (nakaneni meere kolong Musa esiakini ngakiro nguna, araakasi ta apaakus esiakinete), ilengerenete esi ikoku nisapat akolongit na a Sabato.

²³Ani kilengerio ikoku nisapat akolongit na a Sabato nyinyasunor etal a Musa, nyo bo kingoikinitotor esi ayong ani etojokea itwaan akolongit na Sabato?

²⁴ Nakaneni nyiirirata ana iteete, kirirata ana eraakasi ngaka iteni.”

²⁵Apot ngitunga epewae luayakasi Yerusalem tamasi, “Ekoe! Meere itwaan ni esakete ngikapolok akiar en a?

²⁶Kingolikisi a! Iruoro ngakiro keng daang epupete ngitunga, emam tani itwaan ipei ni alimuni akiroit naaronon anikeng! Kori eyenete robo ngapolon dir atamar erai ngesi Kiristo?

²⁷Nakaneni na ebunio Kiristo, emam itwaan eyeni ni ebunio. Abe kiyeni bo sua daang ni ebunitor itwaan en.”

²⁸Na etatamea Yesu alokai a Akuj, kirema tama, “Kiyenete esi ayong dir a? Iyenete esi tani ni abunitor ayong a? Peabuni ayong a apolou kang a ilope. Ngolo kameuni ayong erai lo a iteni, nakaneni nyiyenete esi ngesi.

²⁹Ayeni ayong ngesi, kainyo abuni anikeng, nabo ngesi kameuni ayong.”

³⁰Sodi tasaka akirumun ngesi, nakaneni emam itwaan abu tatap ngesi kainyo aringa esaa keng nyedolo.

³¹Nakaneni tonupa ngitunga lukaalak ngesi tamasi, “Naebunio Kiristo, esubi ngesi ngakitoodikinet nakailiilok nakaalak na idwangito na asub itwaan en a?”

³²Kiirasi Ngiparisayo asepich a ngitunga ingaingaa ngakiro a Yesu, sodi tomeasi kesi ka Ngimurok Luapolok a akai a Akuj ngasigerea akirumun Yesu.

³³Tolim Yesu tama, “Eringa cha wadio kirukit ka esi aapei, sodi atolot nia alo kolong kameuni ayong.

³⁴Kisakete esi ayong nakaneni nyikianyunete kainyo nyiloose esi ni ateni ayong.”

³⁵Kingitanaros Ngiyaudi make ebalasi, “Aliwae niti edikino ngesi elosi ni nyikianyunea ngoni ngesi nege? Elosi ngesi lorerea a Ngigirik lu ibooyoto Ngiyaudi, sodi kitatam Ngigirik a?

³⁶Ebala ngesi kisaki ngoni nakaneni nyikianyuni. Ekoe, eger tokona a ngakiro kanu ngesi nyo?”

³⁷Akolongit naapolon na arai na esal a Esukukuu, tonyou Yesu kirema tama, “Itwaan cha daang ni enyamit akure, bu nikang tamat.

³⁸Loger lo igiritere nagiran atamar, ‘Itwaan cha daang ni enupi ngakiro kang, eleleunete ngangololin a ngakipi ana akiyar alotau keng.’ ”

³⁹ Alimunit Yesu nguna kotere Etau a Akuj lo eanyunete daang lu enupete ngakiro keng. Ngirwa ngulu, aroko Etau a Akuj nyipotoro, kainyo aringa Yesu nyeyaruna kipuroe.

⁴⁰Ani iirarete epewae a ngitunga ngakiro nguna, tamasi, “Erai itwaan en dir ekadwaran a Akuj!”

⁴¹Tamasi ngiche, “Erai ngesi Kiristo!” Nakaneni tamasi ngiche, “Nyebuni Kiristo alo Galilaya.

⁴²Igiritae nagiran atamar erai Kiristo ales a ekapolon Daudi, nabo idounio alo Betleem alore alo kolong ebooyo Daudi.”

⁴³Sodi totiak asepich a ngitunga kotere Yesu.

⁴⁴ Asakete epewae kech akirumun ngesi, nakaneni amam tani ipei abu kirum ngesi.

⁴⁵Na abongoreta ngasigerea, kingita Ngimurok Luapolok a Akai a Akuj ka Ngiparisayo tamasi, “Nyo peirikunioto esi ngesi?”

⁴⁶Tatachut ngasigerea nguna tamasi, “Emam itwaan nakanuan ni eruoro eger lo iruoror itwaan en!”

⁴⁷Kingita Ngiparisayo tamasi, “Kingal ngesi esi dang a?

⁴⁸Eyei itwaan tani ipei ni iirasi esi alokapolok a Ngiyaudi kori Ngiparisayo atamar anup ngakiro keng a?

⁴⁹Nyeyeni asepich a ngitunga na etal a Musa, kotere nguna, ilamit kesi Akuj!”

⁵⁰Epei a Ngiparisayo enyaritae Nikodemo, lokolong sek alosit nia Yesu, tolimok kesi tama,

⁵¹ “Nyikipedori ngoni Alotal yok akirirare itwaan eringa mono nyiirara ngakiro keng, sodi toyenae ibore ni esubit ngesi.”

⁵²Tatachut kesi tamasi, “Aawa, ikwa ibunit iyong dang alo Galilaya a? Kiseme ngagiran lokojokon taanyu atamar emam ekadwaran a Akuj lo ebuni alo Galilaya.”