Read turkana Ngitichisio 10 Bible Online

Ngitichisio 10 - turkana bible

Ngitichisio 10

¹Ayei itwaan Kaisaria ni anyaritae Korinelio, arai ngesi ekarikon a ngasigerea ana anyaritae “Ajore a Italia.”

²Arai ngesi itwaan ni erichakinit ngitalio a Akuj nabo kilipito ka ngitunga a awi keng daang Akuj. Engaranakini ngesi noi Ngiyaudi lukebootok nabo elipeene Akuj jiik.

³Areet a akolong apei, ngisaae ngikan-koomwon, taanyunga ngesi akisingolikinet a Akuj. Anakisingolikinet kangina, taanyunga emalaikat a Akuj elomuni tanyara ngesi tama, “Korinelio!”

⁴Tokienyik ngesi emalaikat ngolo ebulit, kingit tama, “Nyo Ekapolon?” Tatachak emalaikat tama, “Elakara Akuj noi kotere akilipit kon ka apatanu na iinanakinea iyong ngikebootok ngiboro, nakaneni kitam ngesi iyong tokona.

⁵Tomea tokona ngitunga Yopa tanyaraut itwaan ni enyaritae Simon Petero.

⁶Epeyonit ngesi anawi a ekasuban ngilowi enyaritae Simon alo elomit lokwaas a anam.”

⁷Ani na arotokinio emalaikat, tanyarau Korinelio ngikasubak etich a awi keng ngiarei ka epei a ngasigerea ana eyokiyete ngesi, itwaan ni erichakinit etal a Akuj.

⁸Tolimok kesi na asubakinosi dio tomea kesi Yopa.

⁹Akolongit na a ngaarei na alooso kesi alorot taapiyasi Yopa, todoka Petero kidiama akai naparan lotingilan esaki akilip.

¹⁰Tanyam ngesi akoro kiitan akimuj nanyamat. Ani eringa akimuj ipoo, taanyunga ngesi akisingolikinet a Akuj.

¹¹Taanyunga ngesi adis kengaar, totiyaun ibore ni ikoni awaru naapolon iyoliunitoe a ngiwaitin a nguomwon kwap.

¹²Ayakasi nawaru ngina ngitieng ngigelagelae lu eloose a ngakejen a ngoomwon ka lu eliato ta ngikieny lu alomoding.

¹³Tolimok etoil ngesi tama, “Tonyou Petero taar sodi tanyam!”

¹⁴Nakaneni tolim Petero tama, “Mam, Ekapolon! Nyenyama ayong nakanuan ibore ni nyitaleunitoe kori ni inyasuna.”

¹⁵Tolimok nabo ngesi etoil tama, “Wara nyiitama ibore ni ebala Akuj ejok be inyasuna.”

¹⁶Asubakinosi nguna ngasubakinet ngauni sodi tobuarae awaru ngina nadis.

¹⁷Ani eringa Petero engayat atamar nyo eger a akisingolikinet kangina, kepot ngitunga lu ameunit Korinelio kingitut awi a Simon. Awaasi kesi esaa ngolo alokidor a awas.

¹⁸Kiremasi kesi tanyaras ebaasi, “Eyei epeyonon nege enyaritae Simon Petero a?”

¹⁹Ani eringa Petero esaki akiyen eger a akisingolikinet kangina, tolimok Etau a Akuj ngesi tama, “Topupok a, eya ngikiliok nguuni nege kisakete iyong.

²⁰Tonyou tokona totiyaar kwap. Wara nyiiwou akirukor ka kesi kainyo ayong ameunit kesi.”

²¹Sodi totiyaar Petero tolimok ngitunga ngulu tama, “Ayong ngesi itwaan ni isakete esi. Anukiro iponitotor esi nege?”

²²Tatachut kesi tamasi, “Ekarikon a ngasigerea kosi lo enyaritae Korinelio ngesi kimeunit sua. Erai ngesi itwaan niajokon ni ilipit Akuj nabo erimasi ngesi ngitunga daang a Ngiyaudi lokojokon. Alimokini ngesi emalaikat a Akuj atamar kipeyou iyong nawi keng sodi kiirarea ngesi ngakiro na ilimuni iyong.”

²³Kilom Petero ngitunga ngulu nawi topero neni akwaar ngina. Ani iwalari, tonyou ngesi kirukosi ka kesi ta ngikanupak ngiche lu alomito Yopa.

²⁴Akolongit nache, tananga Kaisaria. Edarit Korinelio ngesi kaina, erukito aapei ka ngiyenet keng ta ngipaalon lu epeyeunit ngesi.

²⁵Ani elomuni Petero nawi, kisiriamia Korinelio tadakakin kwap diyete ngakejen keng, kijuuru esibit ilipit ngesi.

²⁶Nakaneni kitonyou Petero ngesi tolimok tama, “Tonyou, arai ayong dang itwaan.”

²⁷Torubak Petero iruorosi ka Korinelio eloose alomar kai. Ani elomarete tooma kai, torukaut ngitunga ngikaalak echunakina.

²⁸Tolimok kesi tama, “Iyenete esi daang atamar alotalio alu echikakini Akuj Ngiyaudi, nyechamitae Eyaudit epeyonete kori irukete ka ngibukui lu nyerai Ngiyaudi. Nakaneni kedodik ayong Akuj atamar nyejoikinit ayong abala nyitaleuno, kori inyasuna itwaan iche.

²⁹Kotere nguna, na imeuneta esi ngitunga anyarare ayong, atacham ayong abunere. Kengisit tokona ayong esi, nyoni imeunitotor esi ngitunga nikang?”

³⁰Tolim Korinelio tama, “Arai esaa lo tokona lo, ngirwa nguuni kolong adaun, ngesi elipitor ayong alo kai kang ngisaae ngikan-koomwon areet a akolong. Napei ngina, towo itwaan ni anapit ngiworui lu akwaak alongaren kang,

³¹tolim tama, ‘Korinelio, eira Akuj akilip kon nabo engolik apatanu kon na iinanakinea iyong ngikebootok ngiboro.

³²Tomea itwaan Yopa ni eyei itwaan ni enyaritae Simon Petero. Epeyonit ngesi a nawi a Simon alo erai ekasuban ngilowi, alo elomit lokwaas a anam.’

³³Sodi atomeu ayong ngitunga nikon atipei. Ejok noi ani ibunio. Kiya tokona sua daang nege ngaren Akuj, kisaki akiirar nakidungok iyong Ekapolon atamar tolim.”

³⁴Tolomak Petero ekiruor tama, “Ayen tokona iteni dir atamar nyetiakit Akuj ngitunga.

³⁵Itwaan cha daang ni ilipit ngesi ka akisub na eteniyete, echamuni ngesi peekachit atamar erai ebukut ali.

³⁶Iyenete esi akiroit na ayaari Akuj lotunga a Isirael, itatami Ngakiro Naajokak a ekisil ani a Yesu Kiristo.

³⁷Iyenete esi akiroit nateno na etatamio awadaang a akwap a Yudea napei esiakinea alo Galilaya na arumorea Yoana akitatam ngakiro a akibatiso.

³⁸Iyenete esi Yesu lo a Nasaret lo aseuni Akuj kilelebik Etau a Akuj ka agogongu. Aloseene ngesi wadaang, esubi naajokak ka akitojok daang lu aenit Ekipe a agogongu keng, kainyo arukito Akuj ka Yesu.

³⁹Kirai sua ngikaanyunak a ngakiro kadaang ana asubi ngesi anakwap a Ngiyaudi ka Yerusalem. Taara ngesi taramakis napir.

⁴⁰Nakaneni kiteyaru Akuj ngesi akolongit na a ngauni kidodiu ngesi,

⁴¹meere alotunga kadaang, nakaneni kidodiu anikosi alu kolong kiseuni Akuj atoliworos ngikaanyunak. Ngulu kesi lu emujete ka akimat ka ngesi ekisidi a ayarun keng.

⁴²Kidungokini ngesi sua atamar etatama ngitunga ngakiro naajokak nabo atolimosi atamar ngesi lo aseu Akuj aliwor ekatubon ngakiro a ngulu eyarete ka ngulu atoaka.

⁴³ Eruorosi ngikadwarak a Akuj daang ngakiro keng ebaasi itwaan daang ni enupi ngesi, erimakinio ngasechesea keng kotere agogongu a ekiro keng.”

⁴⁴Ani eringa Petero iruoro, toloma Etau a Akuj lotunga lu apupete ngakiro nguna.

⁴⁵Nakaneni tatalasi ngikanupak Luyaudi lu apote alo Yopa ngakiro na etaanyunea Akuj ngibukui lu nyerai Ngiyaudi dang ainakinet a Etau keng.

⁴⁶Kainyo eirarete kesi iruorosi a ngabukui anagelayek ipurosi apolou a Akuj. Dio Petero tolim tama,

⁴⁷“Aanyut ngitunga lu Etau a Akuj loger lo kianyunea ngoni. Eyei tokona itwaan iratakini kesi nyiibatisae a ngakipi a?”

⁴⁸Sodi todung ngesi atamar kibatisae kesi a ekiro a Yesu Kiristo. Dio tolimokis kesi Petero atamar topeyono ka kesi a ngirwa a ngidi.