Read turkana Ngitichisio 11 Bible Online

Ngitichisio 11 - turkana bible

Ngitichisio 11

¹Kiirasi ngimeanara ka ngikanupak luche lu aya lowaitin daang a Yudea atamar aanyut ngibukui lu nyerai Ngiyaudi dang akiroit a Akuj.

²Na alosio Petero Yerusalem, kisuburata ngitunga lu abaasi ejoikinit ngibukui lu nyerai Ngiyaudi ilengerio tamasi,

³“Ipeyonit iyong anawi a ngibukui alu nyilengeritae nabo nyerai Ngiyaudi, be kimuja iyong tani ka kesi!”

⁴Sodi kisisak Petero kesi ngakiro daang na asubakin napei anakisiakinet tama,

⁵“Naelipitor ayong alore a Yopa, ataanyunga akisingolikinet a Akuj. Ataanyunga ayong ibore etiyaun, ekoni ibore ngini awaru naapolon, eyoliunitoe alowaitin a nguomwon anadis, sodi towo alo diyete kang.

⁶Esemok ayong tooma lokojokon sodi engolik ngibaren ka ngitieng a moding ka lu eliato ka ngikieny lu alomoding.

⁷Eira ayong etoil kalimokini tama, ‘Petero, tonyou taar sodi tanyam!’

⁸Nakaneni atolim ayong atama, ‘Emam, Ekapolon! Nyenyama ayong nakanuan akimuj na nyitaleunitoe kori na inyasuna.’

⁹Tolim etoil nabo anadis tama, ‘Wara nyiitama ibore ni ebala Akuj ejok be inyasuna.’

¹⁰Tosubakin ngakiro nguna ngasubakinet ngauni, sodi tobuarae ngiboro ngulu daang nadis.

¹¹Esaa lopei ngolo, todolut ngikiliok nguuni lu ameunitae nikang alo Kaisaria tanangut kai na ebooyo ayong.

¹²Katolimok ayong Etau a Akuj atamar kirukosi ka kesi nyiiwou alosit. Erukosi ayong ka ngikanupak lukan-kapei lu alo Yopa tanang Kaisaria. Sodi atolomasi sua daang kai a Korinelio.

¹³Kisisak ngesi sua eger lo aanyungarea ngesi emalaikat ewei alokai keng dio tama, ‘Tomea itwaan tolot Yopa ni eyei itwaan enyaritae Simon Petero.

¹⁴Kilimokini ngesi iyong ngakiro na kiyuunete iyong ka ngitunga a awi kon daang.’

¹⁵Ani na alomakinea ayong akiruor, tolom Etau a Akuj nikech loger lokolong alomunea niyok anakisiakinet.

¹⁶Sodi etamu ayong nakolong alimuni ekapolon ebala, ‘Ebatisae Yoana a ngakipi, nakaneni kibatisao esi a Etau a Akuj.’

¹⁷ Kileereu dir atamar ainakini Akuj ngibukui lu nyerai Ngiyaudi ngulu ainakinet napei kiinakini ngoni na kinupea ngoni Ekapolon Yesu Kiristo. Arai ayong ngae, dikino asaki akiratakin Akuj?”

¹⁸Na eirareta kesi nguna, tojongoto akiburare dio kipuruut Akuj ebaasi, “Ikwa keinaki Akuj bo tani ngibukui lu nyerai Ngiyaudi alolom na elungeta ngasechesea kech sodi toyara!”

¹⁹Toloto ngikanupak ngiche lu ealarosi kotere aboliaro na esiakini na aarere Sitepano tananga Poinike ka Kupuro ta Antiok itatamete ngakiro nguna ani eya Ngiyaudi make.

²⁰Nakaneni aya ngikanupak ngiche lu apote alo Kupuro ka Kurene, toloto kesi Antiok kitatama ani aya ngibukui lu nyerai Ngiyaudi dang, elimonokinete kesi Ngakiro Naajokak a Yesu Kiristo.

²¹ Arukito kesi ka agogongu a Ekapolon, tonupa ngitunga lukaalak noi toreunos nia Ekapolon.

²²Kiirasi ngikanupak lu aya Yerusalem ngakiro nguna. Sodi tomeasi kesi Barinaba tolot Antiok.

²³Ani na adolio ngesi neni, sodi torukau Akuj kepia ngitunga, talakar ngesi noi kimaima kesi ebala torubakis jik iwapito Ekapolon na a iteni.

²⁴Arai Barinaba itwaan niajokon ni eleleba Etau a Akuj nabo tonupite noi ngakiro a Akuj. Tachamut ngitunga lukaalak Ekapolon.

²⁵Sodi tolot Barinaba Tariso tasaka Saul.

²⁶ Ani na eriamunotor ka ngesi, toriko Barinaba Saul toloto Antiok. A ekaru a epei, kiriamuunun kesi luarei ka ngikanupak, sodi kitatama ngitunga lukaalak. Antiok ngesi esiakinere anyarare ngikanupak Ngikiristoi.

²⁷Ngirwa ngulu, tonyout ngikadwarak a Akuj ngiche alo Yerusalem toloto Antiok.

²⁸Tonyou epei kech enyaritae Agabo todwar a agogongu a Etau a Akuj ebala emini eron a akoro nakwap wadaang. (Min akoro ngina na araakar Kilaudio ekapolon a Ngiroma.)

²⁹Totiakut ngirukitos a Yesu atamar ejoikinit ipei kech daang elemuni ibore ni epedori alemun sodi kingarakinere ngikanupak lu alomito Yudea.

³⁰Tosubakis kesi nguna loger ngolo. Ani erumor, nakis Barinaba ka Saul ngaropiyae tamasi inasi ngikasukou a ekanisa alo Yudea.