Read turkana Ngitichisio 12 Bible Online

Ngitichisio 12 - turkana bible

Ngitichisio 12

¹Ngirwa lupei ngulu, tolomak ekapolon a akwap a Palestina lo enyaritae Erode, aboliar Ngikiristoi ngiche.

²Tolim ngesi atamar kichumae Yakobo lokaatokeng a Yoana a ekileng sodi taarae.

³Ani na engolikinea ngesi atamar ajoikis Ngiyaudi ngakiro nguna, dio ngesi atamar kirumutu Petero dang. (Asubasi ngakiro nguna ngirwa lu esukukuu a Ngamugati Anapadok.)

⁴Na erumunere Petero, toinikinae lojela ni eyokiyoto ngajorei ngoomwon a ngasigerea, aya ngitunga nguomwon najore apei a ngasigerea. Asaki Erode akirirare ngesi alongaren ngitunga adaunet a esukukuu a Adeparet.

⁵ Sodi toinikinae Petero lojela, nakaneni elipito ngitunga a ekanisa Akuj lokojokon kotere ngesi.

⁶Nakwaare a akolongit ana adikino Erode ipudunio ngesi toriko ngaren ngitunga, aperi Petero alokiding ngasigerea ngaarei. Aenitae ngesi a ngiriko a ngiarei, nakaneni ayakasi ngasigerea nache lokidor a awas a ejela iyokiyete.

⁷Napei ngina, towo emalaikat a Akuj alo diyete keng. Tokwangu akicha alojela. Toting emalaikat eseget a Petero kitokienyu tama, “Tonyou atipei!” Talachunos ngiriko anakan a Petero tachakakinos kwap.

⁸Tolim emalaikat tama, “Toen aruba kon dio tanap ngamuk kon.” Kikok Petero neni. Dio tolimok ngesi emalaikat tama, “Kilogak eworu nakwaan kon bu kiwapak ayong.”

⁹Kiwapak Petero ngesi topudosi alojela peeyeni atamar erai dir ibore ngini emalaikat, abala ngesi kori etee ngakisingolikinet a Akuj.

¹⁰Kitoro kesi lokidor lo ekingaren alotooma ejela, kitoro tani lo a ngiarei, tanangut jik lokidor lo a ngasua lo epudorere nikalapatan tolomarere lore. Tangaar ekidor ngolo bon topudosi kesi nikalapatan. Kiwapakis kesi erot, ani napei ngina, toisik emalaikat Petero.

¹¹Sodi toyen Petero ngakiro na asubakin anikeng tolim tama, “Ayen tokona atamar eraakasi ngakiro nu iteni! Ameuni Ekapolon emalaikat keng ayuun ayong nyekawan Erode kori nyeechanyu ibore daang ni esakete Ngiyaudi atamar katosubakinere ayong.”

¹²Na ayenea ngesi nguna, tolot nawi a Mariam, itiokeng a Yoana Mariko. Achunakina ngitunga lukaalak inaa ilipito.

¹³Kidongodongok Petero ekidor lo anikalapatan, sodi bu apese na arai akedalan a awi kangina anyaritae Roda angaar ekidor.

¹⁴Toyen ngesi etoil a Petero talakar noi tamatar tooma nyengaara ekidor, tolot tolimok ngitunga atamar ewei Petero anikalapatan.

¹⁵Tolimokis ngitunga ngesi tamasi, “Ekoe, abe kikoporito iyong ngikerep!” Nakaneni torubak ngesi ebala erai iteni. Sodi tatachut kesi tamasi, “Erai emalaikat keng.”

¹⁶Nakaneni torubak Petero jik idongidongi ekidor. Ani engaarete kesi ekidor, kingolikis ngesi sodi tatalasi kesi ngakiro nguna.

¹⁷Kikea ngesi akan esaki kesi kililinga. Sodi kisisak kesi eger lo epudunio ngesi Ekapolon alojela. Tolim tama, “Tolimokisi nugu Yakobo ka ngikanupak luche.” Dio torotok ngesi toten wache.

¹⁸Na ewalarea, tobul noi ngasigerea tolomasi angaya ebalasi, “Ekoe, anukiro kesubakin ani a Petero?”

¹⁹Todung Erode atamar tasakunae ngesi nakaneni tongop ngesi jik. Sodi tama ngesi kingichingichae ngasigerea ani erumor dio adungun atamar taarae. Arumoret kanguna, torotok Erode alo Yudea tolot akiboi mono alo Kaisaria.

²⁰Angoikinit Erode ngitunga a ngirerea a Tiro ka Sidon. Sodi toloto kesi aapei aanyun ngesi, kisiaut mono kesi kisila ka Bilasito lo eyoki akai a ekapolon, esakete ngesi kingarak kesi. Dio toloto nia Erode tamasi kisaki esila ka ngesi kainyo aanyunete ngitunga a akwap kech akimuj anakwap ka Erode.

²¹Akolongit na aseunitae atamar iriemere, tanap Erode ngiworui lu eraakar ngesi ekapolon, kiboikin ngesi lokicholong lo eraakar ngesi ekapolon. Kisuruorik ngesi ngitunga.

²²Tachalut ngitunga tamasi, “Meere itwaan iruoro, erai akuj.”

²³Kitedekak emalaikat a Akuj Erode atipei tadakakin kwap kainyo nyitiliworo ngesi ekipur ngolo eka a Akuj. Tanyama ngesi ngikur totoan.

²⁴Nakaneni torubak akiroit a Akuj ekeikina akwap daang kiatakin noi.

²⁵Tobongut Barinaba ka Saul alo Yerusalem na arumoreta etich kech. Kirukut kesi ka Yoana Mariko.