Read turkana Ngitichisio 13 Bible Online

Ngitichisio 13 - turkana bible

Ngitichisio 13

¹Ayakasi ngikadwarak a Akuj ka ngiketatamak lokanupak lu eya Antiok. Araakasi kesi Barinaba ka Simeon lo enyaritae nabo Lokirion ka Lukio lo abuni alo Kurene ka Manaen losek apolounete ka ekapolon Erode ta Saul.

²Ani na asubeeneta kesi etich a Akuj toroneenete akimuj, tolimok kesi Etau a Akuj tama, “Tosekinae ayong Barinaba ka Saul tosuba etich lo anyarakinit ayong kesi.”

³Toroneeneto kesi akimuj sodi kilipa, kidokokis ngakan nakies kech epiarito ani erumor kimiekis toloto.

⁴Na amearea Etau a Akuj Barinaba ka Saul, toloto kesi Seleukia. Kiwaaros a atubwa kaina tananga lokwar lo elukakina kiding anam na enyaritae Kupuro.

⁵Na adolioto Salami, kitatama akiroit a Akuj anakais a Atuk. Arukito kesi ka Yoana Mariko engarakinit kesi etich.

⁶Kitoro kesi kiding ekwar lo elukakina kiding anam ngina tanangut ni anyaritae Papo. Toriamut kesi ekekerian kaneni lo anyaritae Bari-Yesu, arai ngesi Eyaudit lo etingakina atamar arai ngesi ekadwaran a Akuj.

⁷Arai ngesi lopae keng a ekapolon a ekwar kangolo lo anyaritae Serigio Paulo, alo arai itwaan nikooson noi. Tanyarau ekapolon ngolo Barinaba ka Saul ni ayei ngesi kainyo asaki ngesi akiirar akiroit a Akuj.

⁸Nakaneni kitopeg kesi ekekerian enyaritae Elimas (enyaritae ngesi kongina a Ngagirik,) asaki ngesi ekapolon ngolo nyereeun toliwor Ekiristoit.

⁹Nakaneni Saul lo enyaritae nabo dang Paulo, tokienyik ekekerian ngolo lokojokon ileleba Etau a Akuj.

¹⁰Sodi tama, “Iyong lokookeng a Ekipe lo iremokino ibore daang ni ejok! Irono iyong noi imodeana, nabo isaki jiik akiloch ngakiro a Ekapolon na iteni toliworos alioko!

¹¹Kirirae iyong Ekapolon tokona, imudukani iyong sodi nyianyunga akicha a apaaran a ngirwa.” Tarap ibore ni ikoni aribu ka eloch ngakonyen keng atipei, torotok ngesi itwapi tasak itwaan ni eriki ngesi akan.

¹²Na aanyungarea ekapolon ngolo na asubakin, tonup ngakiro a Akuj kainyo atalarito ngesi noi ngakiro na Ekapolon na etatamio.

¹³Ani alo Papo, todokasi Paulo ka ngirukitos keng natubwa kiwaaros tananga lore a Periga lo ayei Pamupulia. Toisik Yoana Mariko kesi kaneni sodi tobongo Yerusalem.

¹⁴Tonyout alo Periga tanangut lore a Antiok lo eyei Pisidia, ani akolongit na a Sabato, tolomasi kai a Atuk kiboikinos.

¹⁵Ani erumorete akisomare ngakiro Alotal a Musa ka ngagiran a ngikadwarak a Akuj, tomeasi ngikarikok a akai a Atuk itwaan nikech ebaasi, “Ngikaitotoi, kisaki sua esi kiruoro ka ngitunga keyei akiroit adio na ingarakineta esi kesi.”

¹⁶ Tonyou Paulo kikea akan keng esaki ngitunga kililinga dio tolomak ekiruor tama, “Ngitunga kang a Isirael ka daang lu nyerai Ngiyaudi lu eya nege taraakas lu ilipito Akuj, topupokisi ngakiro kang!

¹⁷Aseuni Akuj a Ngisirael ta apayok kitogogong kesi noi na ebooyoto alo Misiri ana arai meere akwap kech. Kipud Akuj kesi anakwap a Misiri a agogongu keng,

¹⁸tanaik ngesi ngakiro kech anariet a ngikaru a ngitomwon-omwon.

¹⁹Tomunya ngesi ngibukui ngikan-kaarei lu aya nakwap a Kanaan dio akitiliwor ngitunga keng ngikulepek a akwap kangina.

²⁰ Asubasi ngakiro nguna daang a ngikaru a ngamiae a ngoomwon ka ngitomwon-kan. “Ani erumor, tosek kesi ngikatubok ngakiro tanang ngirwa lua ekadwaran a Akuj Samuel.

²¹Ani na atamareta kesi kisaki ekapolon, tosek Akuj kesi Saul lokookeng a Kichi lo a ekitela a Benjamen, toliwor ekapolon kech a ngikaru a ngitomwon-omwon.

²²Alemaret kangolo, kitiliwo Akuj Daudi ekapolon kech. Tolim Akuj ngakiro a Daudi tama, ‘Aanyu ayong atamar erai Daudi lokookeng a Yese itwaan ni amina ayong. Erai ngesi itwaan ni esubi daang na asaki ayong tosub.’

²³Yesu lo arai ales a Daudi ngesi etiliwori Akuj Ekayuunan a Ngisirael loger losek echikakinitor ngesi.

²⁴Ani eringa Yesu nyisiakina etich keng, etatami Yoana Ngisirael daang atamar ejoikinit ereunosi alosech kech sodi kibatisae.

²⁵ Ani na adikino Yoana erumorea etich keng, kingit ngitunga tama, ‘Ibalasi esi kori ayong ngesi ngae? Meere ayong ngesi lo idarito esi. Nakaneni topupokisi! Ebuni ngesi ekisidi kang, nabo nyitemokino ayong tani aliwor ekedalan keng atobutuunu ngamuk keng.’

²⁶“Ngisirael, lu iraakasi ales a Aburaam ka ngibukui daang lu nyerai Ngiyaudi lu eya nege ilipito Akuj. Erai niyok ngesi eyaunitae akiroit na ayuuno naga!

²⁷Kainyo peayenete ngitunga lu alomito Yerusalem ka ngikarikok kech atamar erai ngesi Ekayuunan. Kori nyeyana kesi tani ngakiro na a ngikadwarak a Akuj na isomaanete ngirwa daang lua Sabato. Dio kiyookis kesi ngakiro na a ngikadwarak a Akuj ani erirata Yesu.

²⁸Ani tani na angopikinea kesi ibore ni elimuneto atamar taarae ngesi, apot kesi tolimokis Pilato atamar taar ngesi.

²⁹Ani na asubeta kesi ngakiro daang na igiritae atamar esubere ngesi, totiyaut ngesi anapir sodi tonuka.

³⁰Nakaneni kiteyaru Akuj ngesi,

³¹tatakanuunu ngesi a ngirwa alukaalak ani eya lu kolong aloseenete ka ngesi alo Galilaya tanang Yerusalem. Eraakasi tokona kesi ngikaanyunak keng alotunga a Isirael.

³²Kiya tokona sua nege alimokin esi Ngakiro Naajokak nakolong echikakini Akuj ta apayok atamar asubakini,

³³ asubaki tokona ngesi aniyok alu kirai ngalesea keng ani eteyarunea Yesu. Loger lo igiritere lokidor lo a ngiarei a akitab a ngieosio kona, ‘Irai iyong Lokookang, aliwor ayong Apakon akolongit na.’

³⁴ Ngakiro nu ngesi alimuni Akuj kotere akiteyarun ngesi nyiinyasun, ‘Kapiari ayong esi dir a eger alo italeuno tarai lo a iteni, alo kolong echikakinit ayong Daudi.’

³⁵Aloger alo igiritere nagiran ngache atamar, ‘Nyichamuni iyong ekasuban etich kon lo etenoono inyasun.’

³⁶Kainyo asubi Daudi ibore daang ni asaki Akuj tosub eringa eyari. Ani erumor totoan, tonukakinae nalielin kata a apaakeng, tobos akwaan keng analiel kinyasun.

³⁷Nakaneni nyesubakina nguna ani alo eteyaruni Akuj.

³⁸Toyena dir ngikaitotoi kang atamar, erai Yesu ngesi kitatamere esi ngakiro na a arimakino ngasechesea.

³⁹Nabo itwaan daang ni enupi ngakiro keng, elachakinio dir alosech kadaang alu peadikino etal a Musa kilachakinea esi.

⁴⁰Tochoikinos robo sodi nyeesubakin na alimunete ngikadwarak a Akuj anikus ebalasi,

⁴¹ ‘Abala ayong esi ngikemenyak a! Kitalarete esi ngakiro nu tobukoros! Kainyo ngakiro na tokona asubi ayong eraakasi na nyinupete esi, tani kisisak esi itwaan!’ ”

⁴²Ani epudorete Paulo ka Barinaba anakai a Atuk, kimaimaa ngitunga kesi ebalasi tobongut nabo a Sabato na atupit ngina sodi tolimokineta kesi nabo ngakiro nguna.

⁴³Ani na arotokinioto ngitunga alo kiriam kangolo, apot Ngiyaudi lukaalak ka ngibukui lu nyerai Ngiyaudi, lu areeun lodin a Ngiyaudi kiwapakis Paulo ka Barinaba. Kisuruoro kesi ngimeanara ingarakinito ebalasi echamit erubakinete akiboi anajokis a Akuj.

⁴⁴Akolongit a Sabato na a ngaarei, pot ngitunga lukaalak noi alore kangolo akiirar ngakiro a Akuj.

⁴⁵Na engolikineta Ngiyaudi asepich a ngitunga ngina, toting kesi etereku noi. Kiyenya kesi Paulo nabo kitopega ngakiro keng daang.

⁴⁶Sodi kiruoro jik Paulo ka Barinaba a atitinyu tamasi, “Achamit akiroit a Akuj kilimokinio mono esi ekingaren. Nakaneni kona ingeritotor esi nabo itusubuna nyejoikinit esi ianyunete akiyar na nyedaun, kiisikini sua esi atoloto ni eya ngibukui lu nyerai Ngiyaudi.

⁴⁷ Kainyo etal logo ngesi kichikak sua Ekapolon Akuj kona, ‘Kaseu ayong esi kikokis akicha alobukui alu nyerai Ngiyaudi, toliworos erot a ayuuno a ngiwaitin kadaang a akwap.’ ”

⁴⁸Na eirareta ngikubui lu nyerai Ngiyaudi ngakiro nguna, talakaros sodi kipuruut akiroit a Akuj. Ani lu aseunitae kotere akiyar na nyedaun, toliworos ngikanupak.

⁴⁹Tokeikin akiroit a Ekapolon lowaitin daang a akwap kangina.

⁵⁰Nakaneni kichuchukis Ngiyaudi ngikapolok a ere ka ngaberu nayanat na elipeenete Akuj na araakasi ngaka ngibukui alu nyerai Ngiyaudi. Tolomakis aboliar Paulo ka Barinaba kitwarakis anakwap kech.

⁵¹Tokurosi ngimeanara ngulu ngalup a ngakejen akamaluwot, kidodiu ibore ngini atamar esechito kesi dio toloto Ikonio.

⁵² Alakara noi ngikanupak lu aya Antiok eleleba Etau a Akuj.