Read turkana Ngitichisio 14 Bible Online

Ngitichisio 14 - turkana bible

Ngitichisio 14

¹Tosubakin na ikote napei nguna alo Ikonio, tolomasi Paulo ka Barinaba kai a Atuk kiruoro a atitinyu sodi tonupa Ngiyaudi lukaalak ka ngibukui lu nyerai Ngiyaudi ngakiro a Akuj.

²Nakaneni kichuchukis Ngiyaudi lu peanupito ngibukui lu nyerai Ngiyaudi kiteremokis ngikanupak.

³Kiboikinos ngimeanara inaa nikooyen. Kiruoro a atitinyu ngakiro a Ekapolon alo edodiuni atamar araakasi ngakiro na a ajokis a Akuj eruorosi kesi ngaka iteni ani aanyuneta kesi agogongu na esubeta ngakitoodikinet nakailiilok ka nakitalarete.

⁴Totiakas ngitunga a ere kangolo ngaarei, kibaka epewae alowae a Ngiyaudi, luche lowae a ngimeanara.

⁵Sodi ngibukui lu nyerai Ngiyaudi, imorikina ka Ngiyaudi aapei ka ngikarikok kech, totiakut atamar kiboliar ngimeanara emasa tani a ngamoru.

⁶Na eirareta ngimeanara ngakiro nguna, tonyout ikirikirasi toloto lorerea a Lusitura ka Deribe, lu eya nakwap a Lukonia ta ngakwapea nache na erikaunito ngina.

⁷Kitatama kesi kaina Ngakiro Naajokak.

⁸Alo Lusitura, ayei itwaan nikolong kidounio engwalit, nakaneni nyenyouno ngesi torotok nakanuan.

⁹Apupokinit itwaan ngini ngakiro a Paulo na etatamea. Tokienyik Paulo ngesi lokojokon ani eyenuni atamar enupit itwaan ngini epedori ajoker,

¹⁰kirema tama, “Tonyou towo!” Tonyou itwaan ngini dio arotokin.

¹¹Ani eanyungari asepich a ngitunga kangulu na asubakini Paulo, tolomakis achala a ngabukui kech eraakasi Ngalukoniae tamasi, “Ekokis ngakujo ngitunga apot niyok!”

¹²Tolimokis Barinaba ekiro be Seus, ani Paulo, tolimokis ekiro be Erimes kainyo ngesi etenikinit eruoro.

¹³ Abu emuron a akuj anasubuna be Seus ana achadakina akai keng nikalapatan a ere, yau ngimongin ka ngatur a ngikito lokidor kainyo asakete ngesi ka ngitunga alemikin ngimeanara ngakipeyos.

¹⁴Na eirareta Barinaba ka Paulo na asakete kesi asubakin, tochilichilaasi ngiworui kech tamataros tolomasi tooma nasepich a ngitunga echalasi ebalasi,

¹⁵“Nyo isubeta esi nu? Kirai sua dang ngitunga loger kus! Kiponit sua nege alimor Ngakiro Naajokak, areeun esi aloborei alu pasiek kalu pot nia Akuj ana eyari, ana kolong asubi adis ka akwap ka anam ta ngiborei daang lu eya nikech.

¹⁶Kolong kanuan, achamakinit ngesi ngitunga daang tosuba nguna ejoikinito kesi.

¹⁷Nakaneni edodiuunu ngesi ngirwa daang atamar ekoni ngesi aliwae kotere naajokak na esubeene ngesi kotere esi. Itetepi akiru anadis, eya ngirwa lu ilemeta esi ngamanat, ianyunete esi akimuj nabo talakaros ngitai kus.”

¹⁸Tani na alimunioto ngakiro nguna, ationo anikech akiratakin ngitunga ngulu nyeelemikis kesi ngakipeyos.

¹⁹Pot Ngiyaudi ngiche alore a Antiok alo a akwap a Pisidia ka ere a Ikonio. Kisupa kesi ngitunga kibaka ka kesi. Sodi kimasa kesi Paulo a ngamoru kiriyasi ngesi tochadasi alore ebaasi kori ketoana.

²⁰Nakaneni ani echununosi ngikanupak kiriama ngesi, tonyou ngesi dio tobongo lore. Akolongit na atupit ngina, tonyout ngesi ka Barinaba toloto Deribe.

²¹Kitatama Paulo ka Barinaba Ngakiro Naajokak alo Deribe sodi tonupa ngitunga lukaalak ngakiro a Yesu. Ani erumor tobongosi kesi Lusitura ka Ikonio ta lore a Antiok lo eyei nakwap a Pisidia.

²²Kitogogongo kesi ngikanupak ichikichikete atamar torubakis enupito Akuj na iteni. Kitatama kesi ebalasi, “Kianyuni ngoni ngichan lukaalak sodi atolomareta Napolou a Akuj.”

²³Toseut kesi ngikasukou alokanisae kadaang kilipanakis Akuj eroneenete, ani erumor kimiekineta kesi Ekapolon lo egienokino kesi.

²⁴Kitoro kesi nakwap a Pisidia, tanangut Pamupulia.

²⁵Arumoret akitatam alore alo enyaritae Periga, toloto kesi Atalia.

²⁶Kiwaaros a atubwa kaina tobongosi Antiok, nisek emiekinere kesi tochoik Akuj a ajokis keng kotere etich lo tokona arumorete kesi.

²⁷Na adolioto kesi Antiok, tochunakis ngitunga a ekanisa daang wapei sodi tolimokis kesi ngakiro daang na asubi Akuj anikech ka eger lo etunupea ngesi ngibukui lu nyerai Ngiyaudi ngakiro a Akuj.

²⁸Kiboikinos kesi ka ngikanupak kaneni nikooyen.