Read turkana Ngitichisio 15 Bible Online

Ngitichisio 15 - turkana bible

Ngitichisio 15

¹Pot ngitunga ngiche alo Yudea tanangut Antiok dio tolomakis akitatam ngikanupak ebalasi, “Nyikiyuunio esi jik mati kilenger loger lo igiritere Lotal a Musa.”

² Kiburata kesi noi ka Paulo ta Barinaba kotere ngakiro nguna. Sodi totiakunae atamar ejoikinit Paulo ka Barinaba ta ngikanupak lu a Antiok epewae eloose Yerusalem sodi taanyut ngimeanara ka ngikasukou kotere ngakiro nguna.

³Tomeasi kesi ngitunga a ekanisa. Ani na alooso kesi itorito Poinike ka Samaria, tolimosi eger lo areunotor ngibukui lu nyerai Ngiyaudi nia Akuj. Talakaros ngikanupak noi kotere ngakiro nguna.

⁴Na adolunioto kesi Yerusalem, kipeyout kesi ngitunga a ekanisa ka ngimeanara ka ngikasukou a ekanisa. Tolimokis Paulo ka Barinaba kesi ngakiro daang na asubete kesi ka Akuj aapei.

⁵ Nakaneni tonyout ngikanupak ngiche lu eraakasi ngika a atukuoru a Ngiparisayo tamasi, “Ejoikinit ngibukui lu nyerai Ngiyaudi ilengerio, dio tolimokinae atamar kiwapa etal a Musa.”

⁶Tochunakinos ngimeanara ka ngikasukou aripun akiroit ngina.

⁷Arumoret a ekiruor alokooyen, tonyou Petero towo tama, “Ngikaitotoi kang, iyenete esi atamar ngirwa lukaalak ngoon adaunosi, kaseuni ayong Akuj anikus sodi etatam Ngakiro Naajokak alobukui alu nyerai Ngiyaudi sodi kiirareta kesi ngakiro a Akuj tonupa.

⁸Sodi Akuj na eyeni ngitamen a itwaan kadaang, kidodiu atamar ejoikinit ngibukui lu nyerai Ngiyaudi dang enupete ani etaanyunea kesi Etau a Akuj loger lo kitaanyunea ngoni.

⁹Nyetiaka ngesi ngoni ka kesi, arimakini ngesi ngasechesea kech ani anupeta Ngakiro a Akuj.

¹⁰Nyo tokona isaketa esi akining Akuj ani iaseta ngakiro nakagogongok ikote eegos lokanupak? Ikwa kolong peakuruworete ta apayok ka ngoni dang akirichun ngakiro na ikote eegos nguna?

¹¹Meere kongina! Kinupi ngoni ngakiro a Akuj sodi kitoyuun a ajokis a Ekapolon Yesu, loger lo enupeta kesi dang.”

¹²Kililinga ngitunga daang alokiriam chek epupokinito Paulo ka Barinaba isisaunito ngakiro daang nakailiilok ka nakitalarete na asubete kesi ka Akuj aapei alobukui alu nyerai Ngiyaudi.

¹³Na arumoreta kesi ekiruor, kiruorik Yakobo tama, “Topupokisi mono esi ngakiro kang ngikaitotoi kang!

¹⁴Esisau tokona Simon eger lo esiaunea Akuj kidodiu amina keng alobukui alu nyerai Ngiyaudi ani aseunea anikech ngitunga lu eliworosi ngikeng.

¹⁵Nakaneni eraakasi ngakiro a ngikadwarak a Akuj ngapei ka nguna, loger lo igiritere kona,

¹⁶ ‘Ebala Ekapolon, arumoret kanguna, abonguni, sodi atobuu apolou a Daudi. Adukokini akai keng na enyasun, sodi etenik nabo togogonger.

¹⁷Sodi poneta ngitunga daang nikang, ngibukui daang lu nyerai Ngiyaudi lu anyarau ayong tarata ngikang.

¹⁸Ebala Ekapolon neni lo kolong etaanyuni ngitunga ngakiro nu a angorot.’ ”

¹⁹Keatak Yakobo tama, “Tokona, engolikinit ayong atamar ejoikinit pekichani ngibukui lu nyerai Ngiyaudi lu ereeunosi nia Akuj.

²⁰Nakaneni egirakisi kesi abarua atamar nyeenyam akimuj daang na inyasuna ani eraakar aka amuronot. Tochoikinos alomalaanu ka elomit. Nyeenyam etiengit lo amiedio. Nyeenyam ngaakot.

²¹ Kainyo esomae etal a Musa nikooyen anakais a Atuk ngirwa daang a Sabato nabo etatam ngakiro a etal alorerea kadaang.”

²²Apot ngimeanara ka ngikasukou a ekanisa ta ngitunga daang a ekanisa, totiakut atamar kiseuni ngitunga alokiriam kangolo sodi tomearae kirukosi ka Paulo ta Barinaba toloto Antiok. Toseut kesi ngikiliok ngiarei lu ayenikinitae alokanupak, araakasi kesi Yuda lo anyaritae Barisaba ta Sila.

²³Tomeasi kesi nakis abarua na egiritae kona, “Sua ngimeanara ka ngikasukou a ekanisa lu kirai talokaatokus, kimalae esi ngikaitotoi lu nyirai Ngiyaudi lu iyakasi lore a Antiok ka ngakwapea a Siria ta Kilikia.

²⁴Kiira sua atamar kichanete esi ngitunga ngiche lu apote anikosi kisialolong esi a ngakiro ana eruorosi kesi. Nakaneni emam ngakiro kilimokinit sua kesi.

²⁵Nakaneni kiriama tokona sua kichamakin daang aapei aseun ngitunga atomeutu nikus. Irukunete kesi ka Barinaba ta Paulo lu kimina sua noi.

²⁶Ejalito kesi akiyar kech ani esubeta etich a Ekapolon yok Yesu Kiristo.

²⁷Kimeunit tokona sua Yuda ka Sila lu kisisakinete esi ngakiro napei kigirit sua nu.

²⁸Kidodik sua Etau a Akuj atamar nyikiatakini esi ngakiro ngache nakationok ikote eegos mati ngitalio lu make, lu echamit esi irichunete.

²⁹Nyiinyam akiring na emurotere. Nyiinyam ngaakot. Nyiinyam akiring a ibarasit ani emiedio. Tochoikinos alomalaanu ka elomit. Eliwor iwapito esi na eriyan erai kichoikis esi nyiisuba nguna. Kibooyoto niajokon.”

³⁰Tomearae ngitunga ngulu toloto Antiok ni achunakineta kesi ngikanupak daang sodi nakis abarua ngina.

³¹Na esomaata ngitunga abarua ngina, talakaros noi kotere ngakiro na engarakinete kesi nguna.

³²Yuda ka Sila lu araakasi kwasiarei ngikadwarak a Akuj kiruoro ka kesi akooyen ingarakinito kesi a ngakiro a Akuj kitogogongo.

³³Ani arumoret akiboi kaneni nikooyen, kimiekis ngikanupak kesi toloto a ekisil sodi tobongosi ni aya lukolong ameunete kesi. [

³⁴Nakaneni kidong Sila neni.]

³⁵Kibooyoto Paulo ka Barinaba alo Antiok. Kimorikin kesi ka luche lukaalak kitatama ka akiruoro akiroit a Ekapolon.

³⁶Adaunet a ngirwa a ngiche, tolimok Paulo Barinaba tama, “Potu atobongosi ataanyutu ngikaitotoi yok alore kadaang alo kolong kitatamea ngoni akiroit a Ekapolon sodi ataanyutu eger lo erubakinitotor kesi enupito.”

³⁷Asaki Barinaba kirukosi kesi ka Yoana Mariko,

³⁸nakaneni kingolik Paulo atamar nyejoikinit Yoana Mariko irukorete ka kesi kainyo abongi kolong sek ngesi toisik kesi alo Pamupulia. Awouni ngesi akiruk ka kesi tanang etich edaun.

³⁹Kiburata kesi lokojokon kotere ngakiro nguna totiakas. Toriko Barinaba Mariko kiwaaros toloto Kupuro.

⁴⁰Toseu Paulo Sila, ani arumoret a ngimeanara alimokin kesi atamar taanyut ajokis a Akuj, torotokis.

⁴¹ Kitor ngesi Siria ka Kilikia, ingaranakini ngitunga a ekanisa a ngakiro a Akuj.