Read turkana Ngitichisio 16 Bible Online

Ngitichisio 16 - turkana bible

Ngitichisio 16

¹Tolot Paulo tanang Deribe ka Lusitura ni alomit ekiristoit anyaritae Timoteo. Arai itiokeng dang akiristoit na arai Ayaudit, tarai apakeng Egirikit.

²Ngikanupak daang lu ayakasi Lusitura ka Ikonio epurosi Timoteo noi.

³Kona asakea Paulo akirik Timoteo, abu kilenger ngesi kainyo ayenete Ngiyaudi daang lu alomito nalup nguna atamar arai apakeng a Timoteo Egirikit.

⁴Na etorioto kesi lorerea, tolimokis ngikanupak ngitalio lu adungunete ngimeanara ka ngikasukou a ekanisa alo Yerusalem atamar kirichakinae, sodi tolimokis kesi ngimeanara atamar kiwapa ngitalio ngulu.

⁵Sodi kingarakinos noi ngitunga a ekanisa alopit a anupit kech nabo kiatanakinos ngirwa daang talalaketa.

⁶Kitoro kesi nakwapea a Pirugia ka Galatia kainyo eratakini kesi Etau a Akuj nyiitatam ngakiro a Akuj anakwap a Asia.

⁷Na anangeta kesi lokukuor lo asalunitor Musia, tasaka alomar nakwap a Bitunia. Nakaneni kitonger kesi Etau a Yesu.

⁸Sodi kidirasi kesi kitoro Musia, toloto Turoa.

⁹Nakwaare a akolongit kangina, taanyunga Paulo itwaan a akwap a Makedonia anakisingolikinet a Akuj ewei imaimai ngesi ebala, “Bua kare Makedonia kingarakinae sua!”

¹⁰Napei aanyungarea Paulo ngakisingolikinet a Akuj nguna, atosubakin sua atonyoutu atoloto Makedonia kainyo kipotu atotiakutu atamar kinyara sua Akuj etatama Ngakiro Naajokak alotunga a akwap kangina.

¹¹Atodoka sua atubwa alo Turoa ewaaros jik atananga Samoturake. Ani akolongit nache, atananga Nepoli.

¹²Ani kirotokini kaneni, atananga Pilipi lo erai ere loapolon lo ibakit alowae kangolo a akwap a Makedonia. Erai nabo dang akwap ngina na epolokinito Ngiroma. Eboyoto sua ngirwa ngikaalak kaina.

¹³Akolongit na a Sabato, atopudosi sua alokidor a alaar a ere atoloto lokwaas a angolol. Kibala sua kori eyei neni ni achunakina Ngiyaudi ilipito Akuj. Eboikinos sua eana ka ngaberu na achunakina neni.

¹⁴Ngipei a ngitunga alu apupete ngakiro kosi ngesi Ludia na abunit alore a Tuatira. Agielanari ngesi ngiworui lupus-kirionok. Arai ngesi aberu na elipeene Akuj. Tangaa Ekapolon ngitamen keng sodi topupok ngakiro na eruoro Paulo tonup.

¹⁵Arumoret a akibatisare ngesi ka ngitunga a awi keng, kitolimok ngesi sua tama, “Ani kingolikinito esi dir atamar anupit ayong Ngakiro a Ekapolon, potu apana nawi kang.” Kimaima sua atoloto.

¹⁶Akolongit apei na kilosio sua ni ilipeenere Akuj, eriamun ka apese na arai akedalan na akoporito ngikerep lu etodwarete ngesi ngakiro namonan esubakin. Aanyuniyete ngitunga lu arikito apese ngina ngaropiyae nakaalak ani adwarea ngesi ngakiro.

¹⁷Kiwapak ngesi Paulo ka sua echala ebala, “Eraakasi ngitunga lu ngikasubak etich a Akuj ana Epolot Noi! Kilimonokinete kesi esi eger lo iyuunotor!”

¹⁸Ekoanakini ngesi neni ngirwa ngikaalak. Ani apei kwaar, takadakis Paulo ngakiro nguna noi torei tolimok ngipean lu akoporito apese ngina tama, “Kadungokinit ayong esi a ekiro a Yesu Kiristo atamar topudutu anapese kana!” Topudut ngipean anapese kangina esaa lopei ngolo.

¹⁹Na ayenuneta ngitunga lu arikito apese ngina atamar atoania erot losek aanyununeta kesi ngaropiyae, kirumut Paulo ka Sila. Kiriyasi kesi ngaren ngikapolok lukatubok ekies lu aya ni agielanarere ngiboro.

²⁰Torikut kesi lokatubok ngakiro alu araakasi Ngiroma tamasi, “Eraakasi ngitunga lu Ngiyaudi nabo ichanete kesi ngitunga alore kosi.

²¹Itatamete kesi ngitalio lu nyikichamakinitae sua Ngiroma kirichuni kori kiwapi.”

²²Tonyoik asepich a ngitunga daang akidet Paulo ka Sila. Sodi tochilichilaasi ngikatubok ngakiro ngiworui a Paulo ka Sila nabo todungut atamar kidetae kesi a akulit.

²³Ani kides lokojokon kerumor, toinikinae lojela. Todungokinae asiger a ejela atamar tochoik kesi lokojokon noi.

²⁴Na adungokinere ngakiro nguna, toinik asiger a ejela kesi kai na alotooma ejela. Toinik ngakejen kech nakito nalangir naapotiok.

²⁵Na aapikinea kiding akwaar, elipito Paulo ka Sila nabo aeosi ngieosio a Akuj. Apupete ngitunga luche lu aenitae ka kesi ngieosio kech.

²⁶Napei ngina, tamaranik akwap noi tamaranik tani ni adukokinitae ejela. Tangaaros ngidorin daang atipei nabo tachakun ngiriko alotunga kadaang alu aenitae.

²⁷Ani ekienyuni asiger a ejela torukau ngidorin daang engaara, tama ngesi kori kesiwa ngitunga lu aenitae daang. Tout ngesi ekileng keng tasak akichumakin.

²⁸Nakaneni tachalak Paulo irema ebala, “Wara nyiiwana! Kiya sua daang nege!”

²⁹Tolimok asiger itwaan atamar kainu ataa. Tamatar asiger tooma tadakakin diyete nakejen a Paulo ka Sila emarani.

³⁰Sodi toriko asiger kesi nikalapatan kingit tama, “Ngikiliok, ekokini ayong aanyuni ayuuno ai?”

³¹Tatachakis tamasi, “Tonup ngakiro a Ekapolon Yesu, nakaneni iyuun iyong aapei ka ngitunga a awi kon.”

³²Sodi tolimokis ngesi ka ngitunga daang lu aya nawi keng Ngakiro a Ekapolon.

³³Esaa lopei ngolo nakwaare, toriko asiger kesi kilota ngajemei kech. Kibatisae ngesi atipei ka ngitunga a awi keng daang.

³⁴Sodi toriko ngesi Paulo ka Sila nawi keng nak akimuj tanyama. Talakaros ngesi ka ngitunga a awi keng ani anupeta ngakiro a Akuj.

³⁵Ani iwalari, tomeut ngikatubok ngakiro ngasigerea ebalasi, “Kimiekisi ngitunga ngulu toloto.”

³⁶Tolimok asiger a ejela Paulo ngakiro nguna tama, “Ameut ngikatubok ngakiro itwaan ebaasi kitalachakin iyong ka Sila. Topudosi robo toloto niajokon.”

³⁷Nakaneni tolimok Paulo kesi tama, “Kideese kesi sua pas alongaren ngitunga. Amam ibore nikisech sua nabo kirai sua Ngiroma. Dio kitoenikis kesi sua lojela. Esakete tokona kesi alachakin sua ekiilingat. Emam! Kimiekisi kesi pot kipudosi sua.”

³⁸Toloto ngasigerea na ameunitae tolimokis ngikatubok ngakiro nguna. Toema ngikatubok ngakiro na eirareta atamar erai Paulo ka Sila Ngiroma.

³⁹Sodi toloto kesi todiaka Paulo ka Sila esakete torimakis kesi. Ani erumor torikosi kesi alojela tolimokis atamar toloto wache.

⁴⁰Torotokis Paulo ka Sila alojela toloto nawi a Ludia. Torukaut kesi ngikanupak kaneni, kisuruoro ngakiro a Akuj na ingarakinete, ani erumor torotokis.