Read turkana Ngitichisio 18 Bible Online

Ngitichisio 18 - turkana bible

Ngitichisio 18

¹Arumoret kanguna, torotok Paulo alore a Atene tolot Korinto.

²Kiriamun ngesi ka Eyaudit lo enyaritae Akula kaneni lo edounitoe anakwap a Ponto. Aringa sek ngesi epote ka aberu keng na anyaritae Prisila, apote kesi anakwap a Italia kainyo adungunit ekapolon a Ngiroma lo enyaritae Kaisari Kilaudio atamar torotokis Ngiyaudi daang alo Roma. Tolot Paulo aanyun kesi,

³sodi kibooyoto aapei ka kesi kainyo arai ayaritotor kesi daang ngieman lu asubeenete togielanasi.

⁴Apegaanasi Paulo ka ngiche alokai a Atuk ngirwa daang lu eraakasi ngika Sabato, esaki akitunup Ngiyaudi ka Ngigirik ngakiro a Akuj.

⁵Na adolunioto Sila ka Timoteo alo Makedonia, tolomak Paulo akitatam ngakiro a Akuj ngirwa daang. Kidodenak Ngiyaudi atamar Yesu ngesi erai Kiristo.

⁶Na etopegeta kesi ngesi tolomakis akimeny ngesi, dio kidodiu atamar angerit ngakiro nguna a akilakalakaar ngiworui keng sodi tolimok kesi tama, “Ani kibukorosi esi, eliworosi ngakiro nguna ngaka a akibuu kus! Emam na kapaikinio ayong. Alosi tokona ayong jik lobukui lu nyerai Ngiyaudi.”

⁷Sodi torotok ngesi kaneni tolot kiboi anawi a itwaan ani nyerai Eyaudit enyaritae Tito Yusuto. Elipeene ngesi Akuj nabo ayei akai keng diyete akai a Atuk.

⁸Abu Kirispo lo arai ekapolon a akai a Atuk tonup ngakiro a Akuj ka ngitunga a awi keng daang. Topupokis Ngikorintoi ngiche dang ngakiro a Paulo, tonupa sodi kibatisae.

⁹Akolongit apei nakwaare, taanyunga Paulo akisingolikinet a Akuj. Anakisingolikinet kangina, tolimok Ekapolon Paulo tama, “Wara nyiem, torubak iruoro nabo wara nyiililing,

¹⁰kainyo kirukit ayong ka iyong. Emam itwaan kiwani iyong kainyo elalak ngitunga kang lu eya lore lo.”

¹¹Sodi kiboi Paulo kaneni ekaru epei ka ngilapio ngikan-kapei, itatami ngitunga akiroit a Akuj.

¹²Na araakar Galio ekapolon a akwap a Akaya, kiriamariama Ngiyaudi kirumut Paulo torikosi nitubet ekies akititare.

¹³Tamasi, “Isupi itwaan en ngitunga esaki kilipa Akuj a erot alo nyechamakinitae Alotal!”

¹⁴Ani eringa Paulo nyiruorikina, tolimok Galio Ngiyaudi tama, “Arai tarai ibore en ni esechit itwaan idiobore kori ichwangakinit, kejoikinit ayong anaikini ngakiro nakus esi Ngiyaudi.

¹⁵Nakaneni kona ipegatar esi ngakiro ka ngirora lu eraakasi ngika a etal kus, torumosi esi ngikulepek ngakiro nguna. Nyaliwor ayong ekatubon a ngakiro ana ikote nguna!”

¹⁶Kitwarak ngesi kesi a nitubet ekies.

¹⁷Kirumut kesi daang Sositene lo arai ekapolon a akai a Atuk kibungata alongaren nitubet ekies. Nakaneni nyemisikina Galio ngakiro nguna tani wadiochichi.

¹⁸Kiruko Paulo ka ngikanupak lu aya Korinto ngirwa ngikaalak. Ani erumor totiakas ka kesi, todokasi ngesi ka Prisila ta Akula natubwa kiwaaros Siria. Ani eringa nyedokara natubwa alore alo a ekwaas a anam ana anyaritae Kenikirea, totuboe ngitim keng kotere ngakiro nasek echikakinit ngesi Akuj.

¹⁹Na anangeta Epeso, toisik Paulo Prisila ka Akula kaneni. Toloma ngesi kai a Atuk topega ka Ngiyaudi.

²⁰Tolimokis ngitunga ngesi atamar kiboikin neni nikooyen nakaneni towou ngesi.

²¹ Tani ikoni neni, tolimok ngesi kesi na anyounio tama, “Ani kerai echami a Akuj, abonguni ayong nege.” Sodi todoka ngesi natubwa alore alo a ekwaas a anam enyaritae Epeso.

²²Na anangea ngesi Kaisaria, tolot Yerusalem sodi kimala ngitunga a ekanisa ani erumor tolot Antiok.

²³Ekisidi a aperor inaa ngirwa ngikaalak, torotok sodi kitor Galatia ka Pirugia itogogongi ngikanupak daang a ngakiro a Akuj.

²⁴Ngirwa ngulu, abu Eyaudit lo enyaritae Apolo lo edounitoe alo Alekisandaria, bu Epeso. Ayenikinitae ngesi noi a ekiruor, nabo ayeni ngagiran lokojokon.

²⁵Etatamitae ngesi noi epit a Erot a Ekapolon. Kiruor ngesi ngakiro a Yesu esibit ebobokinito ngesi ngakiro nguna noi. Kitatam ngesi ngakiro a Yesu kiyoonok tarai bo akibatisare a Yoana bon ngesi ayeni ngesi.

²⁶Tolomak ngesi akiruor a atitinyu alokai a Atuk. Naeirareta Prisila ka Akula ngakiro keng, torikosi ngesi nawi kech kisisakis ngesi lokojokon epit a Erot a Akuj.

²⁷Sodi totiaku Apolo atamar alosi Akaya, kingarakis ngesi ngikanupak lu aya Epeso ani egireta abarua nia ngikanupak alu aya Akaya atamar kipeyout ngesi. Na anangea inaa, kingarak noi lu aliworosi ngikanupak kotere ajokis a Akuj.

²⁸Kainyo etepegi ngesi Ngiyaudi niationon kidwang alongaren ngitunga. Kidodenak kesi dir ani egiritae nagiran atamar erai Yesu Kiristo.