Read turkana Ngitichisio 19 Bible Online

Ngitichisio 19 - turkana bible

Ngitichisio 19

¹Ani eringa Apolo eyei Korinto, torotok Paulo toped akwap na alona alokwaas a anam sodi tanangu Epeso. Torukau ngesi ngikanupak ngiche kaina

²kingit tama, “Ianyut kolong esi Etau a Akuj na kolong inupeta?” Tatachut kesi tamasi, “Nyiirara sua tani atamar eyei Etau a Akuj.”

³Kingit Paulo kesi tama, “Ani kibatiso kolong kibatisao esi?” Tatachut kesi tamasi, “Kibatisao sua akibatisare na a Yoana.”

⁴ Tolim Paulo tama, “Erai akibatiso a Yoana aka lu alungete ngasechesea kech. Sodi tolimok ngesi Ngisirael atamar tonupa ngakiro alo etupuuni ngesi, ngesi atamar, tonupa ngakiro a Yesu.”

⁵Ani iirarete kesi nguna, kibatisae kesi a ekiro a Ekapolon Yesu.

⁶Kidokok Paulo ngakan keng nakies kech, sodi taanyut kesi Etau a Akuj. Kiruoro kesi a ngabukui anagelagelae. Sodi tolimosi tani akiroit a Akuj.

⁷Araakasi kesi daang ngikiliok esibit ngitomon ka ngiarei.

⁸A ngilapio a nguuni, aloseene Paulo kai a Atuk kiruoro ka ngitunga etitiny ngesi. Eaneenete ngesi ka kesi esaki akitunup kesi ngakiro a Apolou a Akuj.

⁹Nakaneni echanaka ngiche kech, towout akinup. Sodi kimenya kesi alongaren ngitunga daang kotere epit a Erot a Ekapolon. Sodi totiakas Paulo ka kesi toriko ngikanupak toliwor isuruori ngirwa daang anakai anakaaloman a Turano ana etatamere ngitunga.

¹⁰Torubak ngesi ikoni neni a ngikaru a ngiarei. Sodi ngitunga daang lu alomito nakwap a Asia, Ngiyaudi ka ngibukui lu nyerai Ngiyaudi, apot kiirasi ngakiro a Ekapolon.

¹¹Asubi Akuj ngakitoodikinet nakailiilok nabo tarai naparing anakan a Paulo.

¹²Tolemuunut ngitunga ngawarui nasek atingeene ngesi ka na asubeenea etich yaasi lokadekak. Sodi tojoketa ngikadekak nabo topudosi ngipean anikech.

¹³Apot Ngiyaudi ngiche lu erimito akwap itwaranakinete ngipean tasaka akitwarakin ngipean elimito ekiro a Ekapolon Yesu. Tolimokis kesi ngipean tamasi, “Kadungokinit ayong esi a ekiro a Yesu alo iruoro Paulo ngakiro keng.”

¹⁴Araakasi ngitunga lu ekote neni ngide ngikan-kaarei lusapa a Eyaudit alo enyaritae Sikepa alo arai Emuron Loapolon a akai a Akuj.

¹⁵Nakaneni tolimok kesi Ekipe tama, “Ayeni ayong Yesu nabo ayeni tani ngakiro a Paulo, nakaneni ani esi a, iraakasi ta ngae?”

¹⁶Togirakin itwaan ni akoporito ngikerep kesi kibunga lokojokon, kidwang daang. Tamataros kesi alokai keng echilichilaara ngiworui toya ngajemei.

¹⁷Apot ngitunga daang lu alomito Epeso lu araakasi Ngiyaudi ka lu nyerai Ngiyaudi aapei kiirasi ngakiro nguna. Sodi tobul kesi daang noi nabo kipuruut kesi ekiro a Ekapolon Yesu.

¹⁸Pot ngikanupak lukaalak tolimonosi ka akisileereun alotunga ngakiro nasek asubete kesi.

¹⁹Tochunakis ngikaalak ngakitabea kech na amuroeneto kinomae alongaren ngitunga. Kimara kesi ngaropiyae na kolong kegielere ngakitabea nguna, toliwor etiae kech ngaropiyae ngabunge ngatomwon-kan.

²⁰Alopit a loationon kalo, tokeikin akiroit a Ekapolon wadaang nabo kisikokin togogonger.

²¹Akikokinet a ngakiro kanguna neni, totiaku[1] Paulo alosit kitor Makedonia ka Akaya, toten Yerusalem. Tolim tama, “Ani kalot inaa, anangi tani Roma.”

²²Sodi tomea ngesi ngikengarakinak keng ngiarei lu enyaritae Timoteo ka Erasito esaki kingarenikis toloto Makedonia. Kidong ngesi nakwap a Asia mono.

²³Ngirwa ngulu, pena ngichan luaronok Epeso kotere epit a Erot alo a Ekapolon.

²⁴Ayei eketiakan ngasua epei lo enyaritae Demeterio. Asubeene ngesi ngikais luuchik lu eraakasi ekitetemes a akai a Akuj kech beru ana enyaritae Aritemi. Aanyuniyete Demeterio ka ngikasubak etich keng ngaropiyae nakaalak alotich kangolo.

²⁵Tochunak Demeterio kesi ka ngitunga luche lu asubeenete etich lo ikoni ngolo wapei tolimok tama, “Ngikiliok, iyenete esi atamar etich loyok lo ngesi kiyaritor ngoni.

²⁶Iirasi tokona esi nabo ingolikis ngakiro na esubi Paulo. Meere nege Epeso bon esubea, esubi alowaitin kadaang a Asia. Esup ngesi ngitunga ebata ebala meere ngakujo na esubete ngitunga ngakujo dir.

²⁷Echanakin tokona etich yok edikino itoronio. Meere kongina dang bon, nakaneni itiliwori tani eger ngolo akai a akuj yok anaberu anaapolon ana enyaritae Aritemi apasit. Eliwor emam nabo itwaan erima akuj naberu na ilipito ngitunga daang alo Asia ka ngakwapea daang!”

²⁸Na eirarea asepich a ngitunga ngakiro nguna, tongoa noi tolomakis achala ebalasi, “Epol noi Aritemi naka Epeso!”

²⁹Tokeikin ekurikur lore wadaang. Kirumut ngitunga Gayo ka Arisitariko lu araakasi Ngimakodeniae ngiarei lu arukito ka Paulo, tamataros ka kesi tananga nakeor.

³⁰Asaki Paulo elope alosit nasepich a ngitunga ngina, nakaneni kiratakis ngikanupak.

³¹Ngikapolok ngiche dang a akwap a Asia lu araakasi ngipaalon keng, tomeasi ngitunga ni ayei ngesi imaimayete ebaasi nyeelot nakeor.

³²Esaa lopei ngolo, tachalut ngitunga daang lu eriamiriamito neni, tachalut ngiche tolimut ngakiro be ati, tachalut luche tolimut ngache, kainyo ebilerit kesi peayenete lukaalak ibore ni achununitere wapei.

³³Etamito ngitunga ngiche atamar kori Alekisanda aya ngakiro ani etowoeta Ngiyaudi ngesi alongaren ngitunga. Sodi kikea Alekisanda akan kisililing ngitunga, sodi tasak akiruorikin ngakiro na eyuunor.

³⁴Ani na ayeneta kesi atamar erai ngesi Eyaudit, tachalut daang aapei a ngisaae a ngiarei elimito ngakiro ngapei ebalasi, “Epol noi Aritemi na a Epeso!”

³⁵Ani esal, topedo ekegiran a ere akisililing ngitunga. Tolim tama, “Ngikiliok lu iyakasi Epeso! Eyeni itwaan daang atamar erai lore a Epeso ngesi edukokinitae akai ka Aritemi ana epol noi, nabo nege ngesi echoikinitere ngamoru na kolong achakun anadis.

³⁶Emam itwaan epegi ngakiro nguna. Ejoikinit tokona esi ililingete nyiimatakinosi nakiro atipei.

³⁷Irikut esi ngitunga lugu nege tarai bo nyekokoa ngiboro a ngakais a akuj yok kori nyiimenya tani ngakais a akuj yok anaberu.

³⁸Ani kesakete Demeterio ka ngikasubak etich keng akititare itwaan idio eya ngikatubok ngakiro ka ngirwa lu iriameenere nitubet ekies. Ejoikinit kesi ititasi kaina.

³⁹Ani keya na iitanito esi, erumorio alokiriam a ngitunga kadaang alo echamakinitae.

⁴⁰Erai epedorio akititakin ngoni tamarae kisiakini ekurikur kotere ngakiro na asubasi kane akolongit naga. Emam ngakiro natenoyek na kisiakinere ekurikur lo nabo emam ngakiro na eriyan na kilimuni ngoni atopuunotor.”

⁴¹Na arumorea alimun nguna, kieala ngitunga.