Read turkana Ngitichisio 2 Bible Online

Ngitichisio 2 - turkana bible

Ngitichisio 2

¹Na anangea akolongit na Pentekost, achunakina ngikanupak daang wapei.

²Sodi kiirasi atipei ibore eruuno anadis ni ekoni ekuse a ekuwam a loapolon, sodi tokeikin wadaang a akai ana ebooyoto kesi.

³Taanyungasi kesi ngiborei lu ekote ngasarae a akim epetarosi pena nakies a ngitunga kadaang.

⁴ Kilelebun kesi daang Etau a Akuj tolomakis ekiruor a ngabukui a ngagelagelae loger lo edodikinitor kesi Etau a Akuj.

⁵Ayakasi Ngiyaudi lu alomito Yerusalem lu erichakinito akilipit Akuj, aponito kesi alobukui kadaang anakwap.

⁶Na eirareta kesi echale ngolo, tochunun asepich a ngitunga. Talakaros kesi daang noi kainyo apupi ipei kech ngikanupak iruorosi ngabukui a akwap kech.

⁷Tatalasi kesi ngakiro nguna noi kipurokis tamasi, “Eraakasi ngitunga lu iruorosi kona lu ngika Galilaya, kori ai?

⁸Nyo tokona kipupio ngoni kesi iruorosi a ngabukui a akwap yok?

⁹Kiponit sua ngiche alo Pariti ka Medi ka Elam, ka Mesopotamia ka Yudea ka Kapadokia, ka Ponto ka Asia,

¹⁰ka Pirugia ka Pamupulia ka Misiri ta ngiwaitin a Libia lu eya diyete Kurene. Kirai sua ngiche ngipeyok lu kiponit alo Roma,

¹¹lu kirai Ngiyaudi ka ngibukui lu nyerai Ngiyaudi lu areunosi akilip Akuj a Ngiyaudi. Kiponit sua ngiche alo Kirete ka Arabia, kipupi sua daang kesi iruorosi a ngabukui kosi ngakiro natenoyek a Akuj!”

¹²Tolomakis kesi akingitanar make etalarito ngakiro nguna kibilerite tamasi, “Nyo eger a ngakiro kanu?”

¹³Nakaneni tokienatar ngiche tamasi, “Ilewat ngitunga lugu emuna lokitetet!”

¹⁴Sodi towaa Petero ka luche lutomon ka epei tolomak akitatam ngitunga irema ebala, “Ngikaitotoi, Ngiyaudi ka esi daang lu ilomito nege Yerusalem, topupokisi ngakiro kang lokojokon.

¹⁵Nyilewat ngitunga lu loger lo itamitotor esi kainyo erai tokona ngisaae nguuni a ataparach.

¹⁶Nakaneni ngakiro nu kesi nakolong eruoro ekadwaran a Akuj Yoel ebala,

¹⁷ ‘Ebala Akuj, ngirwa lu esal, abukokini ayong itwaan daang Etau kang. Ngide kus, lusapa ka lupesur, edwarete. Eanyungarete ngisorok kus ngakisingolikinet a Akuj, Irujaate ngikasukou kus.

¹⁸Ee robo, tani ngikasubak etich kang, lukiliok ka luberu, abukokini ayong Etau kang ngirwa ngulu, sodi todwara.

¹⁹Asubi ayong ngakitoodikinet nakailiilok alokidiama nadis ka ngakitoodikinet nakatalarak kane alokwap, epete ngaakot ka akim ta apuru na eenikina.

²⁰Isirionio akolong chuch, erenger elap puu kikok ngaakot, eringa akolongit naketubulon a Ekapolon nyenanga.

²¹ Sodi ani itwaan daang ni ilipi enyarit ekiro a Ekapolon Akuj, eyuunio.’

²²“Topupokisi mono esi ngakiro nu ngikiliok a Isirael! Yesu lo a Nasaret arai itwaan ni eleere apolou a Akuj anikeng dir ani asubea Akuj ngakitoodikinet nakailiilok ka nakatalarak anikeng. Iyenete esi ngikulepek nguna kainyo asubasi alokiding kus.

²³Iwapap ka eger lo ereat Akuj, atiakunit Akuj alope atamar kirikokinio esi Yesu. Sodi taara esi ngesi ani imiekineta ngitunga lu asechak eramakinete napir.

²⁴Nakaneni kiteyaru Akuj ngesi talachak anagogongu a akitu kainyo peapedori akitu akien ngesi.

²⁵ Kainyo alimuni Daudi ngakiro keng tama, ‘Etee ayong Ekapolon alongaren kang ngirwa daang, eyei ngesi nakan kang na aloteten, kegangit ayong nyariangakin.

²⁶Kotere nguna, talakar etau kang, sodi nabo emaritete a alakara, ebooyi ayong eya na egieno,

²⁷kainyo nyikimiekini iyong ayong ani eya ngikatoak, kori nyichamakini iyong ekasuban etich kon lo emunoi ebosi analiel.

²⁸Kidodik iyong ayong ngirotin lu enangere nakiyar, atalakar ayong noi ani kirukitor ka iyong.’

²⁹“Ngikaitotoi kang, asaki ayong kesisak esi ngakiro ka apaayok ekapolon Daudi, ngakiro na ileerete dir. Atoani ngesi tonukae nabo eyei aliel keng ni kiya ngoni ne tanang akolongit na.

³⁰Nakaneni kona araakar Daudi ekadwaran a Akuj, ayeni atamar ekongi sek Akuj atamar etiliwori epei a ngalesea keng ekapolon, kilunyokin nados keng.

³¹ Toyen Daudi ngakiro na edikino esubasi monan, sodi kiruor ngakiro a akiteyaruno a Kiristo na abalar, ‘Peemiekinio ngesi ani eya ngikatoak, nyebosa akwaan keng analiel.’

³²Eteyaru Akuj Yesu lopei ngolo, nakaneni kirai sua daang ngikaanyunak ana asubasi.

³³Kikearae ngesi tanang nakan na aloteten a Akuj, Apa keng, taanyu anikeng Etau a Akuj loger lo echikakinitere. Erai tokona ibore ni iteete esi topupete Etau keng lo abuku Akuj.

³⁴Kainyo meere kolong Daudi alosi kidiama nadis, pearai ngesi alimuni tama, ‘Ekapolon ngesi alimokini Ekapolon kang tama, kiboikin ne teten kang

³⁵ tanang na ewaakinea ayong ngimoe kon kwap nakejen kon toreu iyong.’

³⁶“Ejoikinit tokona Ngisirael daang eyenete dir atamar Yesu lo iramakinete esi napir ngolo ngesi etiliwo Akuj, Ekapolon ka Kiristo!”

³⁷Na eirareta ngitunga ngakiro nguna, tonoma ngakiro ngitai sodi kingita Petero ka ngimeanara luche tamasi, “Kikokini tokona sua ai, ngikaitotoi?”

³⁸Tolimok Petero kesi tama, “Ejoikinit ipei kus daang elungi ngasechesea keng sodi kibatisae a ekiro a Yesu Kiristo sodi kitorimakin ngasechesea kus, sodi taanyuneta esi ainakinet a Akuj, ngesi Etau a Akuj.

³⁹Kainyo arai kolong akichikakinet ngina akus, ka ngide kus, ka daang lu eloka, ta daang lu enyarauni Ekapolon Akuj yok nikeng.”

⁴⁰Kisuruor Petero kesi ngakiro nakaalak kichikichik tama, “Toyuunos aloriras alo eanyunete ngitunga luaronok a ngirwa kalu!”

⁴¹Tonupa ngikaalak ngakiro keng kibatisae akolongit ngina. Kiatakin ngitunga esibit ngabunge ngauni lokanupak akolongit ngina.

⁴²Torubakis kesi daang epupete ngakitatamet a ngimeanara ka aponenere lokiriam a ngikanupak ka anyameenen akimuj a ngikanupak ta akilipeenen.

⁴³Asubasi ngakitoodikinet nakailiilok ta nakatalarak nakaalak ani a ngimeanara sodi tobul itwaan daang.

⁴⁴Torubakis ngikanupak eraakasi ngipei, ekorete ngiboro kech daang.

⁴⁵Togielanasi kesi ngibaren ka ngiboro kech, totiakanakinae ipei kech daang ngaropiyae, etiae lo iitanit ngesi.

⁴⁶Ngirwa daang eriameenete kesi kai a Akuj, nabo emujeenete kesi aapei anawiyei kech. Emujete kesi elakara noi nabo peamonitotor ngamuja kech,

⁴⁷ epuruunito kesi Akuj, nabo tominakinito ngitunga daang. Ani akolongit daang, kiatanak Ekapolon natiakaru kech ngulu ayuununio.