Read turkana Ngitichisio 20 Bible Online

Ngitichisio 20 - turkana bible

Ngitichisio 20

¹Adaunet a ekurikur, tochunak Paulo ngikanupak wapei kisuruor ngakiro a Akuj na ingarakinete, dio alimokin atamar kidongo niajokon. Dio tonyou tolot Makedonia.

²Kitor ngesi lowaitin ngulu kingaranak ngitunga noi a ngakiro a Akuj. Dio tanang Akaya,

³toper neni ngilapio nguuni. Ani na anyounitor ngesi alosit Siria, tongich atamar etukito Ngiyaudi asubea ngesi naaronok. Sodi totiaku ngesi abongor kitor Makedonia.

⁴Kirukosi ngesi ka Sopater lokookeng a Pirio lo abuni alo Berea. Luche nabo lu erukoreta ngesi araakasi ta Arisitariko ka Sekudo lu apote alo Tesalonike, Gayo lo abunit alo Deribe, Timoteo ka Tukiko ta Turopimo lu apote anakwap a Asia.

⁵Kingarenikis kesi kidarut sua alo Turoa.

⁶Atodokasi natubwa alo Pilipi adaunet a esukukuu a Ngamugati Anapadok. Ani ekisidi a ngirwa a ngikan, atoriamutu kesi alo Turoa. Atopero neni ngirwa ngikan-kaarei.

⁷Atabong apei akolongit na arai Jumamos,[2] atochunakinos sua wapei akinyam Akimuj a Ekapolon. Kisuruor Paulo kesi tanang kiding akwaar kainyo asaki ngesi arotokin akolongit na atupit ngina.

⁸Anokete ngataae nakaalak anamaniyat ana alokidiama ana kiriamiriamit sua.

⁹Ebooyi edia epei lo enyaritae Eutuko alopuke a akai ana eruoror Paulo. Ani eringa Paulo iruoro nikooyen, kilurut Eutuko ngaju naapotiok dio tojotoor. Tachakun ngesi anamaniyat ana a ngauni alokidiama. Tadakunae ngesi ketoana.

¹⁰Nakaneni totiyaun Paulo kwap toriedik, tadaku edia ngolo dio tonuak. Tolim tama, “Warasi nyikibul, eringa ngesi eyari!”

¹¹Sodi tobongo ngesi todoka kidiama tonyil amugati tanyam. Arumoret akiruoro ka kesi nikooyen tanang ni ipiripirunea, torotok Paulo.

¹²Torikosi ngitunga ngulu edia ngolo nawi eyari dio, talakaros noi.

¹³Engarenikisi sua atodokasi natubwa ewaaros Aso, ni kisakea etororeta Paulo. Kilimokinit ngesi sua atamar etorutu ngesi kaneni, kainyo alosi ngesi inaa a ngakejen.

¹⁴Ani kiriamuni sua ngesi alo Aso, todoku ngesi natubwa na kiya sua sodi atonyoutu kaneni atoloto Mitulene.

¹⁵Ani kinyouni kaina akolongit na a ngaarei, atanangutu ni ekienyikinit akwap a Kio. Akolongit na a ngauni atanangutu nakwap na enyaritae Samos. Ani akolongit na a ngoomwon atanangutu Mileto.

¹⁶Atiakunit Paulo alosit ngaren a atubwa nyiitor Epeso, sodi nyeerubak eyei nakwap a Asia. Ekirikira ngesi asaki akinang Yerusalem akolongit na a Pentekost, erai kepedori.

¹⁷Tomea Paulo itwaan alo Mileto alimokin ngikasukou a ekanisa alo Epeso atamar pot kiriamun ka ngesi.

¹⁸Ani na ananguneta kesi ni ayei ngesi, tolimok kesi tama, “Iyenete esi atamar kirukit ayong ka esi jiik napei kolong jik anangunea ayong nakwap a Asia.

¹⁹Abu ayong etiditeun noi nabo egor asubi etich a Ekapolon ngirwa lu ariabar noi kotere eger lo kalokitotor Ngiyaudi.

²⁰Nakaneni emam akiroit na ejok anikus na akerit ayong alimokin esi na eruoror ka akitatam ani eriameenete ngitunga ka ngawiyei kus.

²¹Echikichiki ayong Ngiyaudi ka ngibukui lu nyerai Ngiyaudi atamar ejoikinit elungete ngasechesea kech toreunos Nakuj sodi tonupa ngakiro a Ekapolon Yesu.

²²Nakaneni, alosi ayong tokona Yerusalem ewapit ngakiro a Etau a Akuj. Nyayeni ayong ngakiro na kianyunor kaina.

²³Ayeni ayong atamar kechikichikit Etau a Akuj ebala kedarit ayong alore kadaang aenanot alojela ka ngichan.

²⁴ Nakaneni epasakinit ayong akiyar kang, ibore ni eitanit ayong noi ngesi arumor etich lokolong kedodikini Ekapolon Yesu atamar atosub. Etich ngolo ngesi alimor Ngakiro Naajokak a ajokis a Akuj.

²⁵“Tokona, ayeni ayong atamar emam tani ipei anikus, esi lukolong ketatami ayong ngakiro a a apolou a Akuj ni kiriamun ka ayong.

²⁶Kalimokinit tokona esi dir atamar ani kebukor tani ipei kus, emam na kapaikinio ayong.

²⁷Kainyo nyeema ayong alimokin esi ngakiro daang na esaki Akuj.

²⁸Kirichunos esi make. Kirichutu tani ngitunga a ekanisa lu kitaanyu esi Etau a Akuj sodi tochoikis. Tochoikisi ngitunga a ekanisa a Akuj lu aanyuni ngesi kotere akitu a Lokookeng.

²⁹Ayeni ayong atamar na arotokinio ayong, epote ngitunga lukaadengak nikus lu ikote ngipeei. Nyelakakinete kesi akinyasun ngikanupak.

³⁰Enangi ngirwa lu isudioto ngiche anikus sodi kibatasi ngikanupak kiwapakis kesi.

³¹Nakaneni kiboikinos robo irichuna, iyenete atamar egoro ayong akwaar ka apaaran etatami ipei kus daang a ngikaru a nguuni.

³²“Kemiekinea tokona ayong esi Akuj na kichoikini esi. Kemiekinea tani ngakiro na ajokis keng na eraakasi kesi kitogogongete esi sodi kirumeta apiaro aapei ka daang lu etoseg Akuj.

³³Nyirakara ayong etereku lo asakea alemar asuat nakwangat elalak ngaropiyae kori egolit kori eworu anitwaan a idio.

³⁴Iyenete esi ngikulepek atamar asubi ayong etich a ngakan anakang kanu, sodi ataanyu ibore ni kiyarea ayong ka ngirukitos kang.

³⁵Anakiro kanguna kadaang, kedodik ayong esi atamar ejoikinit isubete etich kingarakineta lu ichanasi. Kitamutu ngakiro nakolong alimuni Ekapolon Yesu ebala, ‘Ejok noi akipotor idwangit akidiaun!’ ”

³⁶Na arumorea Paulo alimun nguna, toriediko ka kesi daang kilipa.

³⁷Egorosi kesi daang na anuakineta ngesi tolimokis atamar tolot niajokon.

³⁸Tosuros kesi ngitai noi ani alimunio ngesi atamar nyeanyungarete kesi ngesi nabo jik. Sodi kitenasi kesi ngesi toloto natubwa.