Read turkana Ngitichisio 21 Bible Online

Ngitichisio 21 - turkana bible

Ngitichisio 21

¹Nakilimokinea sua kesi atamar kidongo niajokon, ewaaros jik atananga ni anyaritae Kos. Akolongit na a ngaarei, atananga Rode sodi atorotokisi kaneni atananga Patara.

²Atorukautu atubwa na alosi Poinike. Atodokasi natubwa ngina ewaaros.

³Atanangutu ni atakanea Kupuro, atamana alowae alo a atoo edirasi Siria. Atotiyaunos sua alore alo ayei lokwaas a anam enyaritae Tiro kainyo asakio atiyaun ngiboro anatubwa.

⁴Atorukautu sua ngikanupak ngiche, eruko ka kesi a ngirwa a ngikan-kaarei. Kiruoro ngikanupak ngulu a agogongu a Etau a Akuj tolimokis Paulo atamar nyeelot Yerusalem.

⁵Nakaneni ani na adaunotor ngirwa lu kirukitor sua ka kesi, atonyoutu atoloto nisek kilosi. Kitenasi kesi daang sua erukito ka ngaberu kech ta ngide atopudosi alore tanang nasinyonoit na a ekwaas a anam na kiriedikio sua elipa Akuj.

⁶ Ani erumor atotiakas ka kesi, atodokasi sua natubwa sodi tobongosi kesi nawiyei.

⁷Atotena sua ngaren ewaaros alo Tiro atananga Tolemais ni kimalaa sua ngikanupak, eruko ka kesi akolongit apei.

⁸Akolongit na atupit ngina, atorotokisi sua atananga Kaisaria. Atepeyono sua kaneni anawi a Pilip alo ketataman ngakiro a Akuj. Arai ngesi epei a ngitunga alukan-kaarei alu aseunitae toliworos ngikengaranakinak alo Yerusalem.

⁹Ayakasi ngesi ngapesur a ngaracha ngoomwon na adwareenete.

¹⁰Nakisalitor sua kaina ngirwa ngikaalak, todolu ekadwaran a Akuj lo enyaritae Agabo lo abuni anakwap a Yudea.

¹¹ Na abunio ni kiya sua, tolem aruba na aenitor Paulo ngiworui keng sodi toenea ngakan ka ngakejen keng a ilope sodi tolim tama, “Elimunit Etau a Akuj kona, eenete Ngiyaudi elope a aruba kana alo Yerusalem loger lo. Erikokinio ngesi ngibukui lu nyerai Ngiyaudi.”

¹²Nakiirarea sua ngakiro nu, emaima sua ka ngitunga luche Paulo atamasi nyeelot Yerusalem.

¹³Tatachu ngesi tama, “Anukiro nu? Nyo iruorotor esi kona isurioto etau kang? Nyachamunit ayong aenanot bon alo Yerusalem, achamu tani atoanere kotere ekiro a Ekapolon Yesu.”

¹⁴Emaimaa sua ngesi kitokuruwo. Sodi atajalutu atamasi, “Kimiekisi tosubakin kona echamitor Ekapolon.”

¹⁵Adaunet a ngirwa a ngikaalak, atoena ngiboro kosi atoloto Yerusalem.

¹⁶Erukosi sua ka ngikanupak ngiche lu aya Kaisaria kiterikosi kesi sua nawi a Minasoni alo erai itwaan a Kupuro. Arai ngesi ekanupan napei kolong jik.

¹⁷Nakinangunea sua Yerusalem, kipeyout ngikanupak a alakara.

¹⁸Akolongit nache, erukosi sua ka Paulo aanyun Yakobo. Ayakasi ngikasukou daang a ekanisa neni.

¹⁹Kimala Paulo kesi, ani erumor kisisak ngakiro daang na asubi Akuj ani a ngibukui alu nyerai Ngiyaudi kotere etich lo asubi ngesi.

²⁰Na eirareta kesi ngakiro keng, kipuruut daang Akuj. Ani erumor tolimokis Paulo tamasi, “Lokaatokosi a ekiro a Yesu, kingolik mono iyong eger lo anupeta Ngiyaudi lukaalak ngakiro a Akuj, nabo irichakinito kesi etal lokojokon.

²¹Alimokinitae kesi atamar itatami iyong Ngiyaudi daang lu elomito nakwapea a ngibukui alu nyerai Ngiyaudi atamar toisikis etal a Musa. Abe ibala iyong kesi nyiilengera ngide kech, kori nyiiwap ngitalio lua Ngiyaudi.

²²Erai iirarete kesi dir atamar idolu iyong nege. Ejoikinit tokona ikokinio ai?

²³Kiwap ngakiro na kilimokini sua iyong. Eya ngikiliok nguomwon nege lu ikongito.

²⁴Kirukosi ka kesi kitalei tosegeta sodi tatach iyong ngaropiyae nakitaleere esi, ani erumor tabanyae ngakies kech. Ani kikok iyong neni, eyenuni itwaan daang atamar meere ngaka iteni ngakiro nangoon kiruorotor iyong ngitunga. Eyenete tani atamar irichunit iyong elope etal a Musa.

²⁵ Nakaneni ani alowae a ngikanupak alu nyerai Ngiyaudi, kigirak sua kesi abarua kilimokinit atamar kitiaku sua atamar nyeenyam akimuj na a amuronot kori ngaakot kori akiring a ibarasit ani emiedio, nabo tochoikinos alomalaanu ka elomit.”

²⁶Sodi toriko Paulo ngikiliok ngulu ani akolongit na atupit ngina, kitalei ka kesi aapei. Sodi toloma ngesi kai a Akuj tolimok ngitunga etiae a ngirwa alu irikari akitaleun na itosegetar kesi, ka akipeyos na elemunio kotere ipei kech daang.

²⁷Na aapikinea ngirwa lukan-kaarei ngulu adaun, kingolikis Ngiyaudi ngiche apote anakwap a Asia Paulo alokai a Akuj. Kichuchukis kesi asepich daang a ngitunga dio kirumut Paulo.

²⁸Tachalakis kesi tamasi, “Ngisirael! Kingarakinae kare! Ekile lo ngesi lopalem eloseene wadaang itatami ngitunga daang atamar tongero Ngisirael ka etal a Musa ta akai a Akuj naga. Tani tokona, ariku ngesi ngibukui ngiche lu nyerai Ngiyaudi tooma akai a Akuj kinyasut niasegan ne!” (

²⁹ Alimunete kesi nguna kainyo aanyungarete sek kesi Turopimo lo ebunit alo Epeso erukito ka Paulo alore. Sodi tamasi kesi kori kebu Paulo toriko ngesi kai a Akuj.)

³⁰Tosuros ngitunga daang a ere sodi tamataros aapei kirumut Paulo kiriyasi nikalapatan a akai a Akuj. Togolokinoe ngidorin a akai a Akuj atipei.

³¹Ani eringa kesi esakete akiar Paulo, tolot itwaan alimokin ekarikon a ngasigerea a Ngiroma atamar alomakis ngitunga daang a Yerusalem ekurikur.

³²Kirukosi ngesi ka ngikarikok ngiche lu atupito ngesi ta ngasigerea toloto Yerusalem atipei. Na engolikineta ngitunga ngulu ekarikon ngolo ka ngasigerea, tojongoto akibungare Paulo.

³³Tolot ekarikon nia Paulo kirum ngesi, dio alimokin ngasigerea atamar toena ngesi a ngiriko a ngiarei. Ani erumor kingis tama, “Ngae itwaan en, ani nyoni esubit ngesi?”

³⁴Tachalu asepich a ngitunga tolimut ngiche ngachekiro, tolimut ngiche ngache. Kona achalatar ngitunga alokurikur kangolo, tongopik ekarikon a ngasigerea atamar anukiro kesubasi. Sodi tolimok ngesi ngasigerea atamar torikosi Paulo kai na eyokiyete ngasigerea.

³⁵Kirukosi ka kesi ani enangi nidokaret kai, sodi tadakasi ngesi ngasigerea kainyo adedeng asepich a ngitunga noi.

³⁶Ewapito ngitunga daang kesi echalasi ebalasi, “Taara!”

³⁷Na asaketa ngasigerea akilomakin Paulo kai na eyokiyete kesi, tolimok Paulo ekarikon a ngasigerea tama, “Eya ngakiro asaki ayong alimokin iyong.” Kingit ekarikon a ngasigerea ngesi, tama, “Ikwa iyeni iyong Ngagirik a?

³⁸Ikwa meere iyong itwaan ni ngoon a Misiri alomakini akitojwore arieng sodi toriko ngirukooi ngabunge ngoomwon lu atingito ngatomean nariet a?”

³⁹Tatachak Paulo tama, “Arai ayong Eyaudit lo kedounio alo Tariso ana a akwap a Kilikia, arai ayong itwaan a ere alo eyenikinitae. Kimiekinae kare ayong esuruor ngitunga.”

⁴⁰Tachamak ekarikon a ngasigerea a Ngiroma ngesi akisuruor ngitunga. Sodi towo Paulo anidokaret dio kikea akan keng kisililing ngitunga. Na elilingeta kesi, kisuruorik Paulo kesi a Ngaeburaniae.