Read turkana Ngitichisio 22 Bible Online

Ngitichisio 22 - turkana bible

Ngitichisio 22

¹Tolim ngesi tama, “Ngisapanet kang kata apakang, topupokisi kesisak esi ngakiro na idodiunito atamar nyasechit ayong!”

²Na eirareta kesi ngesi isuruori kesi a Ngaeburaniae, kililinga kesi chek. Sodi torubak Paulo iruoro tama,

³“Arai ayong Eyaudit lo kedounio alo Tariso anakwap a Kilikia, nakaneni apolouni ayong kane alo Yerusalem ketatami Gamaliel. Ketatam ayong ngitalio kata apaayok lokojokon, nabo amina ayong akilipit Akuj noi loger lo tokona ilipitotor esi daang lu iyakasi nege.

⁴Abolianar ayong ngitunga lu ewapito epit a Erot a Yesu sodi ataar. Erumuununi ayong ngaberu ka ngikiliok atoenanak lojela.

⁵ Eyenete ngikasukou daang a Atuk ka Emuron Loapolon a akai a Akuj atamar eraakasi ngakiro nguna ngaka iteni. Kegiranakinete kesi ayong ngabaruae atolosio lotunga yok lu eraakasi Ngiyaudi lu alomito Damasko. Sodi atolot ayong inaa akirumun ngitunga lu ewapito epit a Erot sodi atoriku kesi Yerusalem eenitae a ngiriko, toboliare.

⁶“Ani na alosio ayong aapiarea Damasko naparan lotingilan, tokwangu akicha na akwaan kea anadis atipei keriam ayong alowaitin kadaang.

⁷Atadakakin ayong kwap eira etoil ebala, ‘Saul, Saul! Nyo kiboliar iyong ayong?’

⁸Engit ayong atama, ‘Iyong ngesi ngae, Ekapolon?’ Katolimok ngesi ayong tama, ‘Ayong ngesi Yesu lo a Nasaret lo kiboliar iyong.’

⁹Kingolikis ngitunga lu kirukitor ayong akicha nakaneni nyiirara kesi etoil a itwaan ani kesuruori ayong.

¹⁰Engit ayong ngesi atama, ‘Ekokini tokona ayong ai Ekapolon?’ Katolimok ayong Ekapolon tama, ‘Tonyou tolot Damasko sodi kitolimokin kaneni ibore daang ni esaki Akuj iyong tosub.’

¹¹Atomudukan ayong kotere akicha na akwaan kea ngina. Sodi katorikosi ayong ngirukitos kang akan tanang Damasko.

¹²“Ayei itwaan ni anyaritae Anania lore ngolo ni erichunit noi etal a Ngiyaudi. Epuruunito ngesi Ngiyaudi daang lu alomito neni.

¹³Bu ngesi ni ayei ayong towo alo diyete kang dio tama, ‘Lokaatokang Saul, taanyunga akwap nabo!’ Napei ngina ataanyunga ayong akwap nabo atokienyik ngesi.

¹⁴Tolim ngesi tama, ‘Kiseu iyong Akuj kata apaayok akiyen na echamit ngesi. Sodi kingolik iyong Ekasuban etich keng lo etenoono, nabo kiira iyong etoil keng a elope na eruoror.

¹⁵Kainyo iliwor iyong ekaanyunan keng tolimok itwaan daang nguna ingolik iyong nabo iira.

¹⁶Nyo tokona nabo eringa iyong idarit? Tonyou kibatisae sodi kilip ngesi kitorimak iyong ngasechesea kon.’

¹⁷“Atobongo ayong Yerusalem ani eringa ayong elipit alokai a Akuj, ataanyunga akisingolikinet a Akuj.

¹⁸Engolik ayong Ekapolon lo kalimokini ebala, ‘Tonyou atipei torotok kane alo Yerusalem, kainyo nyenupete ngitunga kane ngakiro kang na ilimokini iyong.’

¹⁹Atatachak ayong ngesi atama, ‘Ekapolon, eyenete kesi dir atamar aloseene ayong nakais a Atuk erumuunu lu anupito ngakiro kon edet.

²⁰Ani na aarere Sitepano lo alimonokini ngitunga ngakiro kon, ayei ayong dang neni kajoikinit ni aarere ngesi nabo eratakinit ayong ngiworui alu aarete ngesi.’

²¹ Katolimok ayong Ekapolon tama, ‘Kape kainyo kameari ayong iyong nialonan ni eya ngibukui lu nyerai Ngiyaudi.’ ”

²²Topupokis ngitunga ngakiro a Paulo tanang na alimunio ngesi ngakiro nguna. Esaa ngolo tolomakis kesi daang achala noi ebalasi, “Kidonyosi kare! Nyechamit ngesi imiekinio toyar!”

²³Achalasi kesi kiwakiwakete ngiworui kech nabo tokurwonorete ngalup kidiama.

²⁴Tolimok ekarikon a ngasigerea a Ngiroma ngasigerea atamar torikosi Paulo kai na eyokiyete kesi, sodi kideta ngesi tongichut ibore ni echalatar Ngiyaudi kotere ngesi.

²⁵Nakaneni na aeneta ngasigerea ngesi esakete akidet, kingit Paulo ekarikon loochi awei kaneni tama, “Kichamakinitae mono esi ideese itwaan a akwap a Roma, eringa nyengichuna ibore ni esechit a?”

²⁶Na eirarea ekarikon loochi ngakiro nguna, tolot nia ekarikon a ngasigerea kingit ngesi tama, “Ikokini tokona iyong ai? Erai itwaan ngini ika a akwap a Roma!”

²⁷Sodi tolot ekarikon a ngasigerea nia Paulo kingit tama, “Tolimokinae ayong kirai iyong itwaan a akwap a Roma?” Tatachak Paulo tama, “Ee.”

²⁸Tolim ekarikon a ngasigerea tama, “Aliwor ayong itwaan a akwap a Ngiroma ani ainakinea ngikapolok a arieng ngaropiyae nakaalak.” Tatachu Paulo tama, “Arai ayong itwaan a akwap a Roma kainyo araakasi ngikauriak kang dang ngitunga a akwap a Roma.”

²⁹Tobongosi ngitunga lu asakete akingitanar ngesi ngakiro atipei. Toem tani ekarikon a ngasigerea na ayenea atamar erai Paulo lo aenitae itwaan a akwap a Roma.

³⁰Asaki ekarikon a Ngiroma akiyen dir ibore ni etitakinitotor Ngiyaudi Paulo. Akolongit na atupit ngina, tolim ngesi atamar talacharae ngiriko anakan a Paulo, sodi tolimok ngesi Ngimurok Luapolok ka ngitunga daang a Atuk atamar kiriamariama. Sodi toriko ngesi Paulo kitowo alongaren kech.