Read turkana Ngitichisio 23 Bible Online

Ngitichisio 23 - turkana bible

Ngitichisio 23

¹Tokienyik Paulo ngitunga a Atuk tama, “Ngitunga kang a Isirael! Ebooyi ayong ani a Akuj a etau ajokon tanang akolongit na tokona naga.”

²Todungok Emuron a Akuj Loapolon anyaritae Anania ngitunga lu awaasi alo diyete Paulo atamar kibapa ngesi nakituk.

³ Tolimok Paulo ngesi tama, “Kibapi iyong dang Akuj, iyong lo ikoni arotat na ipuchakinitae emunyen lo akwaan! Ibooyi iyong kane isaki akirirare ayong a epit a etal tarai bo isech iyong dang etal ani idungokinea kesi atamar kebapa ayong!”

⁴Tolimokis Paulo ngitunga lu aya diyete keng tamasi, “Iyenyi iyong Emuron a Akuj Loapolon a?”

⁵ Tatachu Paulo tama, “Ngitunga kang a Isirael, peayeni ayong atamar erai ngesi Emuron Loapolon. Igiritae nagiran kona, ‘Nyiiruoror ekapolon a ngitunga kon ngakiro naaronok.’ ”

⁶ Na ayenea Paulo atamar araakasi ngitunga ngiche a Atuk Ngisadukayo taraakas luche Ngiyaudi, kirema Anatuk tama, “Ngitunga kang a Isirael! Arai ayong Eparisayot, lokookeng a Ngiparisayo. Ketitakinitae ayong kane kainyo anupit ayong atamar eyarunete lu atoaka.”

⁷Napei alimunio ngesi ngakiro nguna, tolomakis Ngisadukayo ka Ngiparisayo akiburare, sodi totiakas ngitunga a Atuk ngaarei. (

⁸Erai ebalasi Ngisadukayo nyeyarunete ngitunga lu atoaka, ebalasi nabo dang emam ngimalaikae ka ngiborei lusubuna lu emam ngawat. Nakaneni enupito Ngiparisayo nauni nguna daang.)

⁹Tachalut ngitunga lokojokon noi! Sodi tonyout ngiketatamak a etal ngiche lu eraakasi ngika a atukuoru a Ngiparisayo kitongolopa luche epegasi ebalasi, “Emam ibore ni ichwangakinit itwaan en! Ngae tokona eyeni ejok kisuruorite ngesi dir ibore ni emam akwaan kori emalaikat!”

¹⁰Kisikokin eburas toroner noi sodi kitapo tani ekarikon a ngasigerea tama kori edikino ngitunga enyilinyilaarete Paulo. Todungok ngesi ngasigerea atamar toloto Natuk torikosi Paulo kai na eyokiyete kesi.

¹¹Nakwaare a akolongit ana atupit ngina, towo Ekapolon Yesu alo diyete Paulo tama, “Wara nyiem! Iruoro iyong ngakiro kang kanege alo Yerusalem nabo ejoikinit iyong ikokini neni tani alore a Roma.”

¹²Ataparach a akolongit ana atupit ngina, tochunakinos Ngiyaudi ngiche totuko. Kikongo kesi ebaasi emam ibore ni kinyami kori ni kimasi eringa nyeara Paulo.

¹³Eporito ngitunga lu atukito aapei ngitomwon-omwon.

¹⁴Dio toloto kesi Lomurok Luapolok ka ngikasukou a Atuk tamasi, “Kikong sua aapei atamar nyikimuji eringa nyeara Paulo.

¹⁵Tomeasi tokona esi ka ngitunga a Atuk itwaan ni eyei ekarikon a ngasigerea a Ngiroma ibalasi isakete esi Paulo torikunoe ni iyakasi esi. Kitosubutu esi eya ngakiro na isakete esi angichun ani keng lokojokon. Nakaneni kidaruni sua ngesi ataara eringa nyenanguna nege.”

¹⁶Nakaneni kiira lochien a Paulo ngakiro nguna tolot kai na eyokiyete ngasigerea dio kisisak Paulo ngakiro nguna.

¹⁷Sodi tanyarau Paulo epei a ngikarikok alu atupito ekarikon tolimok tama, “Toriko edia lo ni eyei ekarikon a ngasigerea, eya ngakiro esakit ngesi akisisakin ekarikon.”

¹⁸Toriko asiger ngina edia ngolo tanang nia ekarikon a ngasigerea, dio alimun tama, “Kanyarae ayong Paulo lo eenitae katolimok atamar toriku edia lo nikon kainyo eya edia lo ngakiro na esaki akisisakin iyong.”

¹⁹Toting ekarikon a ngasigerea edia ngolo akan tochada kingit tama, “Anukiro isaki iyong alimokin ayong.”

²⁰Tolim edia tama, “Etukito ngikapolok daang a Ngiyaudi aapei ebaasi kilimokinete moi iyong atamar esakete kesi Paulo torikoroe Natuk. Itusubunete kesi kori eya ngakiro na esakete angichun ani keng lokojokon.

²¹Nakaneni tochoite iikini ngakiro kech kainyo eya ngikiliok lu iporito ngitomwon-omwon lu edukete kidarut ngesi. Ikongito kesi atamar emam ibore ni enyamete kori ni emaase eringa nyeara Paulo. Idarito tokona kesi akiar ngesi, eraakasi ngakiro na ilimuni iyong kesi make idarito.”

²²Tolim ekarikon a ngasigerea tama, “Nyiilimok itwaan iche atamar kisisak iyong ayong ngakiro nu.” Kimiek ngesi edia ngolo tolot.

²³Sodi tanyarau ekarikon a ngasigerea ngikarikok lu etupito ngesi ngiarei tolimok tama, “Toseutu atipei ngasigerea ngamiae ngaarei ka ngasigerea ngache ngatomwon-kaarei na edokito ngangolei ta ngache ngamiae nabo ngaarei na ejiete a ngakwaaras. Kisiakis kesi anyoun alosit Kaisaria ngisaa nguuni a akwaar.

²⁴Tosubakisi ngangolei na edokari Paulo dang sodi kitumosi kesi niajokon tanang nia ekapolon a Ngiroma lo enyaritae Pelis lo epolokinit Palestina.”

²⁵Kigir ekarikon a ngasigerea abarua kona,

²⁶“Ayong Kilaudio Lusia ngesi kegirakinit iyong ekapolon lo kiyenikinitae, Pelis. Kemalae!

²⁷Erumunete Ngiyaudi itwaan en tonyout akiar. Eira ayong atamar erai ngesi itwaan a akwap a Roma sodi atoloto ayong ka ngasigerea atoyuutu ngesi.

²⁸Atoriko ayong ngesi Natuk asaki aanyun ibore ni ititaare ngesi.

²⁹Ataanyu ayong atamar ititakinitae ngesi kotere ngikodikodea lu eraakasi ngika a etal kech. Nakaneni emam ibore ni esechit ngesi ni ejoikinit eenere alojela kori earere.

³⁰Ani nakalimokinere ayong atamar etukitoe akiar ngesi, atotiaku ayong atipei atamar ameuni ngesi nikon. Alimok ayong ngitunga lu ititakinito ngesi atamar kiruoro ngakiro na ititakinitotor ngesi alongaren kon.”

³¹Sodi torikosi ngasigerea Paulo loger lo alimokinitere. Torikosi ngesi nakwaare tananga Antipatro.

³²Akolongit na atupit ngina, tobongut ngasigerea na aloose a ngakejen toisikis lu adokito ngangolei irukorete ka ngesi.

³³Torikosi ngesi Kaisaria kipotosi abarua nakis ekapolon a Palestina ani erumor kimiekis Paulo anikeng.

³⁴Kisoma ekapolon abarua sodi kingit Paulo ewae lo ebunitor ngesi. Na ayenea ngesi atamar ebunit alo Kilikia,

³⁵tolim tama, “Eirari ayong ngakiro kon moi epote ngitunga lu kititakinito iyong.” Dio tolim ngesi atamar kiyokoi Paulo alokai ana kolong aduki Erode.