Read turkana Ngitichisio 24 Bible Online

Ngitichisio 24 - turkana bible

Ngitichisio 24

¹Adaunet a ngirwa a ngikan, bu Emuron Loapolon lo anyaritae Anania ka ngikasukou ngiche ta ekeruoron kech a etal enyaritae Teritulo, tanangut Kaisaria. Toloto nia ekapolon a akwap kangina kisisakis ngesi ngakiro na ititakinitotor kesi Paulo.

²Sodi tanyaraunae Paulo tolom. Tolomak Teritulo akisisaun ngakiro na etitakinitor ngesi kona, “Ekapolon lo kiyenikinitae! Kotere ni iraakar iyong itwaan nikooson, kianyu sua ekisil lo a ngirwa alukaalak. Nabo iloch iyong ngakiro nakaalak ajoketa anakwap kosi.

³Kijoikinito sua ngakiro nu awadaang ka ngirwa daang nabo kilakara noi anikon.

⁴Nakaneni kona nyasakea akitadaun esaa kon, kemaimai iyong atamar kiira kare a apatanu kon ngakiro kosi a aurianut.

⁵Kiyen sua atamar erai itwaan en nikechanan noi. Isianakini ngesi ekurikur Aloyaudi kadaang ka ngakwapea daang nabo ngesi erai ekarikon a atukuoru ana a Nginasaret.

⁶Asaki ngesi tani akinyasun akai a Akuj sodi erumutu sua ngesi. [Atasaka akititakin ngesi Alotal kosi

⁷nakaneni bu ekarikon a ngasigerea lo anyaritae Lusia toriko ngesi anikosi a ekileenu.

⁸Sodi todung Lusia atamar ejoikinit ngitunga lu ititakinito ngesi epote nikon.] Ani kingichingich iyong ngesi, iyenuni iyong elope ngakiro daang na kititakinitor sua ngesi.”

⁹Kikobasi Ngiyaudi dang ngakiro nguna tamasi eraakasi daang ngaka iteni.

¹⁰Todod ekapolon ngolo Paulo esaki kiruorik. Tolim Paulo tama, “Kona ayenea atamar irai iyong ekatubon ngakiro a ngitunga a akwap kana ngirwa lukwokaalak, eruorikini tokona ayong ngakiro na ayuunor alakara.

¹¹Ipedori iyong dang angichun atamar esibit tokona ngirwa ngitomon ka ngiarei adaun napei ngoon alosio ayong Yerusalem akilip Akuj.

¹²Emam itwaan tani ipei arukaut Ngiyaudi kipega ka ayong alokai a Akuj. Nyerukauna kesi alomakinit ayong tani akikurukur ngitunga anakais a Atuk kori alowae a eche a ere.

¹³Emam tani ibore ni idodiunit atamar eraakasi ngakiro na ketitaata kesi ayong ngaka iteni.

¹⁴Ngakiro ngapei achamuni ayong alongaren kon, elipit ayong Akuj kata apayok, nabo ewapit a Erot alo ebaasi kesi erai eka a alioko. Anupit ayong tani ngakiro daang na igiritae Lotal a Musa ka ngakitabea na a ngikadwarak a Akuj.

¹⁵Anupit ayong dang ngakiro na a Akuj napei enupito ngitunga lu, na ikote na a atamar, eyarunete ngitunga daang lu atoaka, luajokak ka luaronok.

¹⁶ Erichakina ayong ngirwa daang akiboi a etau ajokon ani a Akuj ka ngitunga.

¹⁷“Naaperorea ayong alo Yerusalem ngikaru ngikaalak, atobongo inaa aina ngitunga kang ngaropiyae nabo atolemuunu ngakipeyos.

¹⁸Ani na asubea ayong nu, katorukaut kesi ayong alokai a Akuj na arumorea akitosega alotal. Amam asepich a ngitunga kirukitor ayong kori amam tani ekurikur.

¹⁹Nakaneni aya Ngiyaudi ngiche lu aponito anakwap a Asia neni. Ejoikinit kesi epote ngaren kon ne tolimut keyei ibore niketitakinitotor kesi ayong.

²⁰Kori kimiek ngitunga lu tolimut kesi ibore ni echwangakini ayong na awaar Anatuk,

²¹ erai ibore ipei bon eremari ayong na awaar alongaren kech atolim atama, ‘Kititaate esi ayong akolongit na ani anupitor ayong atamar eyarunete lu atoaka.’ ”

²²Sodi Pelis lo ayeni lokojokon epit a Erot, togol ekiruor ngolo. Tolimok kesi tama, “Atubi ayong ngakiro na ititator esi na ebunio Lusia lo erai ekarikon a ngasigerea.”

²³Todungok ngesi ekarikon a ngasigerea loochi lo eyoki Paulo atamar kiyok ngesi lokojokon, nakaneni kimianak kilaana wadio, nabo kimiek tani ngipaalon keng inanakis ibore keyei ni esakete ainakin.

²⁴Ekisidi a ngirwa a ngikaalak, kirukut Pelis ka aberu keng Durusila, na arai Ayaudit. Tomea Pelis itwaan anyarare Paulo sodi topupokis kesi ngakiro na eruoro Paulo aloboyor alo enupere Yesu Kiristo.

²⁵Nakaneni ani eringa Paulo iruoro ngakiro a ajokis ka achoikin akwaan anakiro anaaronok, ta Akolongit namonan iriraare ngitunga, tobul Pelis tolim tama, “Kape tokona. Ani kemin kona kianyun ka iyong, kinyarae sua iyong nabo.”

²⁶Esaa lopei ngolo, etamit ngesi atamar kori kainakini Paulo ngaropiyae ngadi. Kotere ngakiro nguna dang, anyaraununi ngesi Paulo a ngirwa akiruor ka ngesi.

²⁷Adaunet a ngikaru a ngiarei, kilunyokin Pesto Porikio nados a Pelis toliwor ekapolon a Palestina. Kona asakea Pelis Ngiyaudi daang tominakis ngesi, toisik ngesi Paulo alojela.