Read turkana Ngitichisio 25 Bible Online

Ngitichisio 25 - turkana bible

Ngitichisio 25

¹Ekisidi a ngirwa a nguuni alu anangunea Pesto nakwap ngina, tonyou alo Kaisaria toten Yerusalem,

²tolimokis Ngimurok Luapolok ka ngikapolok a Ngiyaudi atamar kititakinit kesi Paulo. Kimaimaa Pesto,

³ebaasi kimiek Paulo torikoroe Yerusalem. Erai atukito kesi aarakin ngesi lorot.

⁴Tatachak Pesto tama, “Kona eenitere Paulo alojela alo Kaisaria tarai edikino ayong abongi inaa atipei,

⁵kimiekisi ngikapolok kus erukosi ka ayong Kaisaria sodi kititakis ngesi keyei ibore esechit.”

⁶Kiruko Pesto ka kesi kaina ngirwa esibit ngikan-kauni kori ngitomon, ani erumor tonyou tolot Kaisaria. Ani iwalari, kiboikin ni etubio ngakiro dio alimun atamar torikunoe Paulo tooma.

⁷Na adolunio Paulo, towaa Ngiyaudi lu apote alo Yerusalem kirikaut ngesi kititakis a ngakiro anaaronok anakaalak. Nakaneni emam ibore edodiunit atamar eraakasi ngakiro nguna ngaka iteni.

⁸Nakaneni tolim Paulo ngakiro keng tama, “Emam ibore ni asech ayong Alotal a Ngiyaudi kori alokai a Akuj kori ani a ekapolon a Ngiroma.”

⁹Nakaneni kona asakea Pesto akitalakar Ngiyaudi, kingit Paulo tama, “Isaki iyong alosit Yerusalem kititakin kaina alongaren kang a?”

¹⁰Tolim Paulo tama, “Awei ayong alongaren ngikatubok a ngakiro alu a akwap a Roma, lu eraakasi nikech ejoikinit ayong ketitaare. Emam ibore asechakinit ayong Ngiyaudi, loger lo iyenea iyong dang.

¹¹Ani kasechit ayong etal kori kasubit naaronok na ejoikinit kaarere, nyasaki ayong atobuchar. Nakaneni kerai ngakiro na eraakasi alioko ketitaata kesi ayong, emam itwaan karikori ayong nikech. Asaki ayong katorikor nia ekapolon a Ngiroma.”

¹²Ani erumori Pesto akiruor ka ngitunga a Atuk, tatachu tama, “Ilim iyong atamar isaki alosit lokapolon a Ngiroma, nakaneni ilosi nikeng.”

¹³Adaunet a ngirwa a ngiche, kirukut ekapolon lo anyaritae Agiripa ka aberu keng Berinike pot Kaisaria akilomun Pesto lotich.

¹⁴Na aperoreta kesi inaa ngirwa ngikaalak, kisisak Pesto ekapolon ngolo ngakiro a Paulo tama, “Eyei itwaan ne nikolong aisikini Pelis eenitae alojela,

¹⁵ani na alosio ayong Yerusalem, katolimokis ayong Ngimurok Luapolok ka ngikasukou a Atuk atamar esechit ngesi, nakaneni tasaka ayong erira ngesi.

¹⁶Nakaneni atatachak ayong kesi atamar nyenaito Ngiroma akimiekin itwaan kititae eringa mono nyisiriama ka ngitunga lu ititakinito ngesi sodi taanyu ngesi alimun ngakiro na eyuunor.

¹⁷Na ananguneta kesi ne, nyemamakina nabo ayong. Akolongit na a ngaarei, eboikin ayong ni etubeenere ekies sodi atama torikunoe itwaan ngini tooma.

¹⁸Na anyouneto ngiketitak keng, nyelimuno ngakiro naaronok anikeng loger losek etamitor ayong atamar kori elimunete.

¹⁹Topega Paulo ka kesi ngakiro a ngakujo kech ka ngakiro a itwaan ani atoana anyaritae Yesu, nakaneni abe ebala Paulo eyari.

²⁰Peayeni ayong kona angichuni eger a ngakiro kanu. Sodi engit ayong Paulo kesaki alosit Yerusalem kititae kaina a ngakiro kanu.

²¹Nakaneni towou Paulo. Dio tolim ngesi atamar ejoikinit ngesi kaenio tanang ekapolon a Ngiroma etubi ngakiro na ititaare ngesi. Sodi atodungok ayong ngasigerea atamar kiyoko ngesi tanang erikorio nia ekapolon a Ngiroma.”

²²Tolimok Agiripa Pesto tama, “Asaki ayong akiirar ngakiro a itwaan kaen.” Tatachak Pesto tama, “Iirari iyong ngakiro keng moi.”

²³Ani iwalari, pot Agiripa ka Berinike inyiakanarete ngitunga ikusete kesi noi. Tolomasi kesi kai naapolon na eriameenete ngitunga erukito ka ngikarikok a ngasigerea ka ngitunga lu ayenikinitae alore kangolo. Todung Pesto atamar torikunoe Paulo, sodi torikunoe Paulo kai ngina.

²⁴Tolim Pesto tama, “Ekapolon Agiripa ka esi daang lu iyakasi ka sua ne, itwaan ni ewei alongaren kus en, ititaate Ngiyaudi daang lu eya nege ka lu eya Yerusalem. Echalasi kesi ebaasi nyejoikinit ngesi eyari!

²⁵Nakaneni emam ibore ni angichu ayong ni itemokino ngesi earere. Ani kona alimunio ngesi elope atamar alosi nia ekapolon a Ngiroma, atiaku ayong atamar erikorio ngesi nia ekapolon a Ngiroma.

²⁶Kangopikis ayong ngakiro keng na ileerete na egirakini ayong ekapolon a Ngiroma. Ngakiro nguna ngesi arikunitor ayong ngesi ngaren kus, tarai cha noi ngaren iyong ekapolon Agiripa! Sodi ani kingichingich iyong ngakiro keng, ataanyu ayong ngakiro na egirakini.

²⁷Kainyo nyejok ayong atamari torikosi itwaan ni eenitae erai peileerete ngakiro na ititaare ngesi.”