Read turkana Ngitichisio 26 Bible Online

Ngitichisio 26 - turkana bible

Ngitichisio 26

¹Tolimok Agiripa Paulo tama, “Kiruorik iyong ngakiro na eraakasi ngakon.” Kikea Paulo akan kisisau ngakiro na eyuunor tama,

²“Ekapolon Agiripa! Aanyunit ayong ekeny ajokon akolongit na ani eraakar ni iyei iyong atachea ngakiro na ketitakinitotor Ngiyaudi,

³ kainyo ayeni ayong atamar iyeni iyong lokojokon ngitalio daang a Ngiyaudi ka ngakiro na epegaanasi kesi. Kemaimai bocha tokona ayong iyong atamar totinenik ipupi ngakiro nugu.

⁴“Eyenete Ngiyaudi daang ngakiro a elote kang napei kolong aringa ayong adit. Eyenete kesi epit lo ebooyo ayong anakwap kang, ani erumor ebooyi alo Yerusalem.

⁵Kayan kesi ayong nakanuan, arai tani tasakete alimor, ketamarito napei kolong jik, arai ayong epei a Ngiparisayo alu irichito noi ngakiro a ngakujo yok.

⁶Nakaneni awei tokona ayong kane ketitao ani egienor akichikakinet nakolong echikakini Akuj ta apayok,

⁷akichikakinet napei igienosi ngibukui yok lutomon ka ngiarei aanyun, ilipito Akuj akwaar ka apaaran. Ekapolon lokiyenikinitae! Ketitaate ayong Ngiyaudi kotere ni egienor ngakiro nguna!

⁸ Nyo kigogongikinit esi lu iyakasi nege peinupeta atamar iteyaruni Akuj ngitunga lu atoaka?

⁹“Etamit kolong ayong elope atamar ejoikinit asubi nakaalak na etepeniarea ngakiro a Yesu alo a Nasaret niapenan.

¹⁰Ngakiro nguna ngesi asubi ayong alo Yerusalem. Ketutuko Ngimurok Luapolok sodi atoenene ngitunga a Akuj lukaalak alojela. Ani na atubere atamar eario, atacham ayong dang atamar taarae.

¹¹Aboliar ayong kesi jiik anakais a Atuk asaki atamar tongero anupit ngakiro a Akuj. Anyunyurikina ayong kesi noi aloseene tani lorerea a ngakwapea anache aboliar kesi.

¹²“Eraakasi ngakiro nguna ngesi alosio ayong Damasko eya ngakiro na ketutukito Ngimurok Luapolok.

¹³Ekapolon lokiyenikinitae, arai naparan lotingilan ngesi aanyungarea ayong akicha naakwaan kea na idwangit akwangis keng tani na a akolong, ekwanguni alo kidiama keriam ayong ka ngitunga lu kirukitor alowaitin kadaang.

¹⁴Atadakakin sua daang kwap, sodi eira ayong etoil kesuruorikini ayong a Ngaeburaniae ebala, ‘Saul, Saul, nyo kiboliar iyong ayong kona? Iwana iyong bon loger a esikiria alo epetepete akitoe naita na idesere.’

¹⁵Engit ayong ngesi atama, ‘Ngae iyong Ekapolon?’ Sodi katatachak Ekapolon tama, ‘Ayong ngesi Yesu lo iboliar iyong.

¹⁶Nakaneni tonyou towo. Edodiun ayong anikon kainyo asaki aseun iyong toliwor ekasuban etich kang. Ilimokini iyong luche na ingolik iyong anikang akolongit naga ka nakedodikini ayong iyong monan.

¹⁷Kayuuni ayong iyong alotunga a Isirael ta ngibukui lu nyerai Ngiyaudi, lu kameari ayong iyong nikech.

¹⁸Ingaari iyong ngakonyen kech, toreunos kesi anaribu nakicha nabo toreunos anagogongu a Esiitan pena nia Akuj. Sodi ani kenupa kesi ngakiro kang, erimakinio ngasechesea kech dio toliworos ngipei ka ngitunga a Akuj luseuna.’

¹⁹“Ani kanguna Ekapolon Agiripa, abu robo ayong atacham akiwapakin ngakiro a ngakisingolikinet ana kedodikinio anadis.

²⁰Atolomak ayong mono ekingaren akitatam ngitunga lu aya Damasko, ka lu aya Yerusalem ka akwap daang a Yudea ta ngibukui lu nyerai Ngiyaudi dang. Etatam ayong kesi atamar ejoikinit elungete ngasechesea kech sodi toreunos nia Akuj dio tosuba ngitichisio lu idodiunete atamar alunga kesi ngasechesea kech.

²¹Eraakasi ngakiro nguna ngesi kerumuneta ayong Ngiyaudi naayakar kai a Akuj, tasaka akiar.

²²Nakaneni kengarak ayong Akuj tanang akolongit napei tokona na. Ibore ngini ngesi awaar ayong kane alimokinit ngitunga daang ngakiro kang, luuchik ka luapolok aapei. Ngakiro na eruoro ayong ngesi na kolong pei alimunito ngikadwarak a Akuj ka Musa atamar esubakinosi,

²³ ngakiro nguna ngesi na abeyo ejoikinit Kiristo eario toliworor lo a ekingaren eyaruni, sodi tolimorea atamar, eanyunete Ngiyaudi ka ngibukui lu nyerai Ngiyaudi ayuuno, na isikwaanitae ka akicha.”

²⁴Ani na esisaunea Paulo ngakiro na eyuunor aloger kalo, kikilak Pesto ngesi tama, “Kikerepik iyong Paulo! Kitokopo iyong ni isomator noi ngikerep!”

²⁵Tatachu Paulo tama, “Nyekekerepikinit ayong ekapolon lokiyenikinitae! Eraakasi ngakiro na eruoro ayong ngaka iteni dir.

²⁶Ekapolon Agiripa, kesuruori ayong iyong ngakiro nu daang a atitinyu kainyo iyeni iyong ngakiro nu daang. Ayeni ayong atamar emam akiroit na tani apei na nyiyeni iyong kainyo emam na asuba anirapap!

²⁷Ekapolon Agiripa, inupit iyong ngakiro a ngikadwarak a Akuj a? Ayeni ayong atamar inupit!”

²⁸Tolimok Agiripa Paulo tama, “Itamit iyong atamar kori kitiliwori iyong ayong ekiristoit a esaa alouriyen kalo a?”

²⁹Tatachak Paulo tama, “Tani keuriana kori kewoi, elipit ayong Akuj atamar toliworos iyong ka luche lu eya ne daang Ngikiristoi loger kang, tarai bocha nyikeenio esi kwa ayong!”

³⁰Sodi tonyout ngikapolok Agiripa ka Pesto ka Berinike naarai aberu ka Agiripa ta ngitunga luche daang.

³¹Ani na arotokinioto kesi, tolimokin make tamasi, “Emam ibore esechit itwaan en ni echamit earere kori eenikinere lojela.”

³²Tolimok Agiripa Pesto tama, “Arai nyeesaki itwaan en alosit nia ekapolon a Ngiroma, kelachakin.”