Read turkana Ngitichisio 27 Bible Online

Ngitichisio 27 - turkana bible

Ngitichisio 27

¹Na atiakunere atamar kilosi sua nakwap a Italia, apon tolimokinae Yulius atamar toweik Paulo ka ngitunga ngiche lu aenitae. Arai Yulius ekarikon a ajore ana enyaritae, “Ajore a ekapolon a Ngiroma.”

²Atodokasi sua natubwa ani enyaritae Adaramito. Anyounit atubwa ngina alosit lorerea lu aya lokwaas a anam ana a akwap a Asia, ewaaros sua a atubwa kangina. Kirukit sua ka Arisitariko lo arai Emakedoniat lo abuni alo Tesalonike.

³Akolongit na a ngaarei, atodokutu alore a Sidon. Tapataner Yulius ani a Paulo, tachamak ngesi elosi aanyun ngipaalotin keng sodi nakis ngesi ibore ni kichana ngesi.

⁴Atonyoutu sua kaneni ani kona akutunitor ekuwam, tanang atubwa kosi lokwar lo elukakina kiding anam lo enyaritae Kupuro anakan ana peakutunitor ekuwam.

⁵Totubor atubwa kosi alowae a anam alo ayei nakwapea a Kilikia ka na a Pamupulia atanangutu lore lo ayei lokwaas a anam ana enyaritae Mura, lo a akwap a Lukia.

⁶Torukau ekarikon a ngasigerea atubwa na abuni alo Alekisandaria na ateni nakwap a Italia, kidokok sua natubwa ngina.

⁷Kiwaar atubwa kosi a ngirwa a ngikaalak, iyapi wadio. Sodi ataapiasi sua lore a Nido kichana noi. Kona kitukuruworea sua ekuwam akidirar nakan ngina, atamana sua Kirete anakan ana erapap alokuwam, etoro lodoket lo eremokino nanam na enyaritae Salimone.

⁸Kinapakin atubwa kosi ekwaas a anam. Kiwaar atubwa ngina kichani noi sodi atanangutu lodoket a atubwa lo enyaritae “Ngidoketa Ajokak”, diyete ere lo a Lasea.

⁹Ebooyoto sua nikooyen kaneni tadaun tani Akolongit na Aronere. Toroner alosit a atubwa na ekokineta ngakiro neni. Kichikichik Paulo kesi tama,

¹⁰“Ngikiliok, engolikinit ayong atamar eroner alosit yok napei kane jik. Inyasun atubwa ka ngiboro, nabo kipedori ngoni dang amunyar.”

¹¹Nakaneni topupok ekarikon a ngasigerea ngakiro a ekamean a atubwa ka na a elope a atubwa nyekachik ngakiro a Paulo.

¹²Kona peajokia edoket ngolo ibooyere ngirwa lua aibach, tasaka ngitunga ngikaalak alosit ngaren, ani kikok neni, tananga Poinike kiboikinos inaa ngirwa lu aibach. Erai Poinike edoket a akwap a Kirete, lo eyei kwap too ka kuju too.

¹³Nakaneni na esiakinea ekuwam akutun wadio anakan ana aloteten a atoo, tamasi ngitunga kori kitemokin esaa lo enyouneto kesi. Kikeut kesi ibore niapotion etoweit atubwa sodi tomeasi kesi atubwa kinapakin ekwaas a anam a akwap a Kirete.

¹⁴Nakaneni tokut ekuwam loationon, lo enyaritae “Ekuwam lo ekutunit alo too anakan ana Lokedieny” atipei iwasiunit alokwar alo elukakina kiding anam.

¹⁵Kibap ekuwam ngolo atubwa, ani kona akuruworor akidirakin atubwa lokuwam, atojongoto sua amere atubwa toliwor ijukit ekuwam.

¹⁶Eyookinos sua wache ni erapap alokuwam na kimanea sua alokwar alo elukakina kiding anam lo enyaritae Kauda anakan ana ibakit aloteten keng, alo kide. Ani kinangi neni, kichan sua noi atubwa naachi na ainikinitae natubwa, ani bocha erumor, erumutu.

¹⁷Kidokunae atubwa naachi ngina tooma natubwa sodi toenae atubwa a ngaunoi lokojokon. Aemito kesi abaasi kori enangete atubwa ngalup naukur a ekwaas a akwap a Libia. Sodi totiyaut kesi awaru a atubwa na ijukit ekuwam, kimiekis atubwa ijukit ekuwam.

¹⁸Na esikokinor ekuse a ekuwam, tolomakis kesi achakanakin ngiboro ngiche lu ewokit atubwa nakipi,

¹⁹akolongit na a ngauni, tolomakis kesi achakanakin ngiboro a atubwa epewae lu ikote ngaunoi ka ngawarui nanam.

²⁰Nyeanyungara sua akolong kori ngikanyer a ngirwa a ngikaalak. Torubak ekuwam ekutunit noi. Atamasi sua kori nyeringa nabo kiyari.

²¹Ani na ebooyoto kesi nikooyen eringa nyimuja, towo Paulo alokiding kech tama, “Ngikiliok, arai ngoon kiirasi esi ngakiro kang nyenyouno alo Kirete, pekebukoro ngiboro yok daang kona.

²²Nakaneni kemaimai ayong esi atamar totitinyoketo! Emam esi tani itwaan ipei ni etoani, erai atubwa bon ngesi inyasun.

²³Abuni been emalaikat a Akuj kang ana elipit ayong nakwaare,

²⁴sodi katolimok ayong tama, ‘Nyiem Paulo! Iwei iyong alongaren ekapolon a Ngiroma. Kotere ni kiminar iyong Akuj, ebuchunosi ngitunga daang lu irukito ka iyong!’

²⁵Totitinyoketa robo tokona ngikiliok, kainyo anupit ayong ngakiro a Akuj atamar ikokinete nguna eger lo kalimokinio ayong.

²⁶Nakaneni ekutari ekuwam atubwa yok tanang lokwar eche lo elukakina kiding anam.”

²⁷Nakwaare a akolongit ana a ngatomon ka ngoomwon, ejukit ekuwam atubwa kosi ananam a Mediterenian. Na adilio akwaar, togipasi ngitunga lu aweikinito atubwa atamar aapia atubwa nalup nakoonok.

²⁸Sodi kitemo kesi aoyau a anam a auno ana ainikinitae ibore niapotion. Torukaut eraakasi ngimitae ngitomwon-omwon. Ani ekisidi nabo kitemo, torukaut eraakasi ngimitae ngitomwon-uni.

²⁹Toema kesi tamasi kori edikino atubwa ebwangakin natabab. Kiyoolikis kesi ngiboro lu apotiok nguomwon nakipi anaabor a atubwa sodi towaar atubwa. Tagata kesi atamar kiwala atipei.

³⁰Sodi tasaka ngitunga lu aweikinito atubwa akisii. Totiyaasi kesi atubwa nakipi tosub iyoolionokinete kesi ngiborei lu apotiok nakipi alongaren atubwa.

³¹Nakaneni tolimok Paulo ekarikon a ngasigerea ka ngasigerea tama, “Ani pekiboikinosi ngitunga lu eweikinito atubwa tooma natubwa, nyiiunosi esi.”

³²Sodi totubo ngasigerea ngaunoi na aenitere atubwa naachi, kimiekis kesi atubwa ngina ijukarete ngakipi.

³³Ani na apikinea akiwalar, kimaima Paulo kesi daang esaki kimuja tama, “Ibooyoto esi a ngirwa a ngitomon ka nguomwon emam ibore inyam.

³⁴Tokona, kemaimai ayong esi kimuja adio kimuj sodi toyareta. Emam ibore kiwani esi tani wadiochichi.”

³⁵Alimunet kongina, tolem Paulo amugati tobuak Akuj alakara iteete kesi daang. Tonyil ngesi amugati ngina dio tanyam.

³⁶Topwatun kesi daang ngitai kimuja tani akimuj.

³⁷Arai ekimar kosi kadaang alu kidokit atubwa ngina ngitunga ngamiae ngaarei ka ngitomwon-kaarei ka ngikan-kapei.

³⁸Na emuja itwaan daang toup akimuj, tachakakis ngakanoi daang nanam kainyo asakete atubwa tooker.

³⁹Na ewalarea, tokuruwo ngitunga lu aweikinito atubwa akiyen ekwaas a anam ngolo. Sodi kingolikis apas na ejuarit. Totiakut kesi atamar etoweikisi atubwa neni erai kepedor.

⁴⁰Sodi totubo kesi ngiborei lu apotiok etoweito atubwa kimiekis ananam. Ani esaa lopei ngolo, talachut ngaunoi na eenito ngakito nameet atubwa. Dio kikeut kesi awaru na ayei ngaren atubwa esakete ekuwam kijuka atubwa ngaren. Nakaneni, kipotu sua edirasi lokwaas a anam.

⁴¹Nakaneni kikungokin atubwa nalup naukur kimak kaneni. Kitijakin ewae lo alongaren nalup tojongo tani akiloiloo. Kona akutunitor ekuwam noi, tobwangabwangata ngitoroi ewae lo aabor a atubwa.

⁴²Totuko ngasigerea akiar ngitunga daang lu aenitae sodi nyiitapatapaareta kesi lokwaas a anam sodi tosiwa.

⁴³Nakaneni kona asakea ekarikon a ngasigerea ayuun Paulo, kitonger kesi akikokin neni. Abu ngesi todung atamar tachakakinos ngitunga daang lu eyenete akitapatap nanam kitapatapaasi lokwaas a anam.

⁴⁴Ani erumor, totupakis luche etingito ngakito nadapal ka ngakabelekeke a atubwa. Erai eger ngolo ngesi kinangea sua daang lokwaas a anam niajokon.