Read turkana Ngitichisio 28 Bible Online

Ngitichisio 28 - turkana bible

Ngitichisio 28

¹Nakinangea sua lokwaas a anam niajokon, atoyena atamar enyaritae akwap ngina Malita.

²Kitepeyono sua ngitunga a akwap kangina niajokon. Esiakinit akiru akitep alilim akwap sodi kinokakis kesi akim kitanyaraut sua daang epiararos niajokon.

³Kikeyanu Paulo ngakito ani eringa iwaanakini nakim, toliau emun anakito na ewarakinea akim kilogakin nakan a Paulo.

⁴Na engolikineta ngitunga a akwap kangina emun iyoloyolo anakan a Paulo, tolimokinos make tamasi, “Abe erai itwaan en ekaaran, tani ngoon kebuchuna ngesi ananam, nyechamit Akuj na enyaritae Akatubon ngakiro eyari.”

⁵Nakaneni tarachak Paulo emun ngolo nakim nabo nyekonya emun ngolo ngesi.

⁶Tamasi kesi kori ebui akwaan keng, kori dikino tani edakakin kwap atipei totoan. Ani na edareta kesi nikooyen kingolikis atamar emam ngakiro asubakin anikeng, kilochosi tamasi, “Abe erai itwaan en Akuj!”

⁷Diyete neni, aya ngamanat a Pubulis alo arai ekapolon a ekwar kangolo alo elukakina kiding anam. Kitepeyon ngesi sua niajokon atarata ngipeyok keng a ngirwa a nguuni.

⁸Aperi apakeng a Pubulis irakarit arukum, kiuruto. Toloma Paulo kai na aperio ekasukout ngolo kilip Akuj. Ani erumor, kidokok ngakan keng nakou a ekasukout, sodi tojoker ekasukout ngolo.

⁹Akikokinet neni, pot ngitunga daang lu adekasi alokwar kangolo kitojok Paulo.

¹⁰Kiinakis ngitunga ngulu sua ngainakinet nakaalak. Ani nakinyounio sua alosit, kiinakis kesi sua akimuj nakaalan nanyamat alorot.

¹¹Adaunet a ngilapio a nguuni, tonyou nabo alotoru kosi atodokasi natubwa na enyaritae “Ngakujo na Imuunitae” na abunit alore a Alekisandaria. Awei atubwa ngina alo Malita ngirwa daang lu aringaakar akwap iibachikinit.

¹²Atananga lore a Sirakusa, atopero inaa ngirwa nguuni.

¹³Atonyoutu kaneni elodasi atananga lore lo enyaritae Regio. Akolongit na atupit ngina, tokut ekuwam anakan ana aloteten a atoo. Adaunet a ngirwa a ngiarei, atanangutu lore a Potoli.

¹⁴Atorukautu sua ngikanupak kaneni lu kilimokinete sua atamar atepeyono ka kesi a ngirwa a ngikan-kaarei. Ani erumor, atanangutu sua Roma.

¹⁵Na eirareta ngikanupak lu eya Roma atamar kiponit sua, pot kisiriama sua anigielet ngiboro ani enyaritae Agialaru a Apio ka nikimujet ni enyaritae Ngiotelio Luuni. Na engolikinea Paulo kesi, tobuak Akuj alakara, topwatun etau lokojokon.

¹⁶Nakinangunea Roma, kimiekinae Paulo ibooyi anikeng bon erukito ka asiger na iyoki ngesi.

¹⁷Adaunet a ngirwa a nguuni, tochunak Paulo wapei ngikapolok a Ngiyaudi lu aya neni. Ani iriamiriamete kesi, tolimok Paulo tama, “Ngitunga kang Ngisirael, tani kemam naaronok asubit ayong alotunga kang kori tani pekechwangakinit ngitalio kata apaayok, apon kerumun ayong alo Yerusalem katorikokin Ngiroma.

¹⁸Nakengitanareta kesi ayong ngakiro tongichut atamar emam ibore ni asechit ayong, tasaka kesi alakakin ayong.

¹⁹Nakaneni na etopegeta Ngiyaudi ngakiro nguna, engolik ayong atamar ejoikinit alosi aanyun ekapolon a Ngiroma, tani kemam ngakiro naaronok etitakinea ngitunga a akwap kang.

²⁰ Eraakasi ngakiro nguna ngesi asakea ayong aanyun ka esi eruoro, kainyo eraakasi ngakiro na igienosi Ngisirael ngesi kaenitere ayong a erikot kalo.”

²¹Tolimokis kesi ngesi tamasi, “Emam abarua nakigirakin sua alo Yudea, kori emam tani ekanupan abu nege akisisare ngakiro a ngikapolok a Ngiyaudi kori akiruoror iyong ngakiro naaronok.

²²Nakaneni kisaki sua akiirar ngakiro kon, kainyo kiyeni atamar itopegete ngitunga awadaang ngakiro a atukuoru ana iloma iyong kana.”

²³Ani kanguna, kichikakinos kesi ka Paulo erwait lo iriamiriameta. Ani enangi akolongit ngina, pot elalak noi ni ebooyo Paulo. Napei nataparach jik tanang nakwaare, kisisak ngesi kesi ngakiro naajokak a apolou a Akuj. Tasak ngesi akitunup kesi ngakiro a Yesu ani alimuununio ngakiro a etal a Musa ka ngagiran a ngikadwarak a Akuj.

²⁴Tonupa ngiche ngakiro keng, nakaneni nyenupa ngiche.

²⁵Sodi topegakinos kesi make tonyout torotokis naarumorea Paulo alimun akiroit apei na abala, “Eraakasi ngaka iteni ngakiro na alimuni Etau a Akuj anakituk a ekadwaran a Akuj Isaya tolimok ta apakus!

²⁶ Kainyo alimuni ngesi tama, ‘Kape tolimok ngitunga lu tama, Ipupokinete lokojokon nakaneni nyiyenunete, ingolikinete lokojokon nakaneni nyebwangasi ngakies toyena.

²⁷Kainyo esiwaa kolong Akuj ngitamen a ngitunga kalu, agol ngesi ngaki kech, agol tani ngakonyen kech. Arai nyikote neni, keanyungarito ngakonyen kech, kiirarito ngaki kech, keyan ngakiro alotamen kech, ebala Akuj, kereuna kesi nikang, sodi etojok ayong kesi.’ ”

²⁸Sodi torumo Paulo ekiruor a ngakiro ana alimuni tama, “Toyena robo atamar ayuuno na itorunit nia Akuj, esiporor lobukui lu nyerai Ngiyaudi. Epupokinete kesi!” [

²⁹Na arumorea Paulo alimun nguna, torotokis Ngiyaudi iburaate make.]

³⁰Kiboi Paulo alokai ana atacheene ngaropiyae a ngikaru a ngiarei. Dio kirumuunu ngesi ngitunga daang lu aponenete aanyuunun ngesi kaneni.

³¹Kitatam ngesi ngakiro a apolou a Akuj ka ngakiro a Ekapolon Yesu Kiristo. Kitatam ngesi lokojokon a atitinyu emam ibore iratakinit.