Read turkana Ngitichisio 3 Bible Online

Ngitichisio 3 - turkana bible

Ngitichisio 3

¹Akolongit apei, toloto Petero ka Yoana kai a Akuj ngisaae ngikan-koomwon na erai ngesi elipenere.

²Ayei itwaan ni angwalit napei kolong edounere lokidor lo anyaritae Ekidor Lokebusean. Akolongit daang ayaanario ngesi lokidor ngolo akilipanar ngaropiyae alotunga alu alomanarete kai a Akuj.

³Na engolikinea ngesi Petero ka Yoana ekoto alomar, kilip kesi ibore idio.

⁴Tokienyikis kesi ngesi dio tama Petero, “Tokienyikinae sua!”

⁵Sodi tokienyik ngesi kesi, ebala kori eyei ibore idio einakinete kesi ngesi.

⁶Nakaneni tolimok Petero ngesi tama, “Emam ayong ngaropiyae atingit, nakaneni kainakini ayong iyong ibore ni atingit, alokiro a Yesu Kiristo alo a akwap a Nasaret, kadungokinit ayong iyong atamar tonyou torotok!”

⁷Sodi toting ngesi akan keng na aloteten kitonyou kitowo. Togogongioto ngakejen keng ka ngitobolae atipei,

⁸topor ngesi towo dio tolomak alosit. Sodi tolomasi ngesi ka kesi kai a Akuj elosi, toporoporoe ka akipuruunit Akuj.

⁹Kingolikis ngitunga ngesi kaneni elosi kipuruunite Akuj,

¹⁰ani na ayeneta ngesi atamar erai itwaan ni palem iboyeene Alokidor Alokebusian ilipanar, toriangakinos kesi daang tatalasi nakesubakinosi anikeng.

¹¹Ani eringa itwaan ngini erukito ka Yoana ka Petero ani anyaritae ngagulei a Solomon, tatalasi ngitunga daang ngakiro nguna tomotunos ni aya kesi.

¹²Na engolikinea Petero ngitunga, tolimok kesi tama, “Ngisirael, nyo kitalaritor esi akiroit na? Nyo kikienyikinitotor esi sua kwa ibore esibit erai agogongu kosi, kori ni kirichakinitor sua ngikulepek etal a Akuj ngesi kitonyounio sua itwaan en torotok!

¹³Erai Akuj na Aburaam ka Isaka ka Yakobo ka Akuj kata apaayok ngesi ainaki Ekasuban etich keng Yesu apolou a Akuj. Nakaneni irikokinete esi ngesi ngikapolok a akwap nabo tongero alongaren Pilato tani na atiakunea Pilato atamar ajoikinit elachakinio.

¹⁴Ipot esi tongero lo italeuno, kimaimaa Pilato ibaasi talachak ekaaran ngitunga.

¹⁵Taara esi lokitanangi nakiyar, sodi kiteyaru Akuj ngesi, kirai sua ngikaanyunak kanguna.

¹⁶ Erai agogongu a ekiro keng ngesi aanyunea itwaan niangwalan en ngikilinga. Na ianyungasi esi nabo toyena, asubasi ani anupitere ekiro keng. Erai anupit ngakiro a Yesu ngesi etojoki ngesi loger lo iteeto esi daang.

¹⁷“Ngikaitotoi kang, ayeni tokona ayong atamar na isubeta esi ka ngikapolok kus Yesu, isubete peiyenete.

¹⁸Alimuni kolong Akuj kanuan alokadwarak kadaang atamar eboliare Kiristo keng. Kiyook Akuj ngakiro nguna alorot kangolo.

¹⁹Tolunga robo ngasechesea kus toreunos nia Akuj sodi kikisarere ngasechesea kus. Ani kikokis esi neni,

²⁰epote ngirwa lu ilakarator esi noi ani a Ekapolon sodi tomeunere Kiristo lokolong aseunio lo erai Yesu.

²¹Ejoikinit ngesi iboikin kidiama nadis tanang ngirwa lu itiliworere ibore daang ikitetet, loger lokolong alimunio Akuj ani a ngikadwarak keng alu italeuno alu kolong kanuan.

²²Kainyo alimuni Musa tama, ‘Emeuni Ekapolon Akuj kus ekadwaran nikus loger lo kameunea ayong, eliwor ngesi epei kus. Echamit esi iwapete ngakiro daang na kilimokini ngesi esi atamar tosuba.

²³Itwaan daang ni nyiwapi ngakiro a ekadwaran, ipakario alotunga a Akuj kinyasunae.’

²⁴Eruorosi ngikadwarak a Akuj daang napei a Samuel ka luche esidiun ngesi, eruorosi daang ngakiro na esubasi ngirwa lu.

²⁵Eraakasi ngakiro na echikakini Akuj ngikadwarak ngakus, nabo erai achamunet na achamunotor Akuj kata apaakus, akus dang. Kona alimokinea ngesi Aburaam tama, ‘Apiari ayong ngitunga daang anakwap a ngalesea kon.’

²⁶ Sodi kiteyaru Akuj Ekasuban etich keng dio tomeu nikus mono ekingaren sodi kitopia esi ani ereunea ipei kus daang alorotin keng aluaronok.”