Read turkana Ngitichisio 4 Bible Online

Ngitichisio 4 - turkana bible

Ngitichisio 4

¹Ani eringa Petero ka Yoana isuruorete ngitunga, todolut Ngimurok a akai a Akuj ngiche ka ekarikon a ngasigerea ana eyokiyete akai a Akuj ta Ngisadukayo ngiche.

²Akadakinito kesi ngakiro nguna kainyo etatamete ngimeanara luarei ngulu ngitunga atamar ayaru Yesu, edodiunit ibore ngini atamar eyarunete ngikatoak.

³Sodi kirumunae kesi toenikinae lojela tanangea ataparach nache kainyo abu towar.

⁴Nakaneni tonupa lukaalak eirarete ngakiro nguna, dio talalaketa ngikiliok tanang ngabunge esibit ngakan.

⁵Ani iwalari, apot ngikapolok a Ngiyaudi ka ngikasukou a Atuk ta ngiketatamak a etal tochunakin Yerusalem.

⁶Kiriamariama kesi ka Emuron Loapolon lo anyaritae Anas, ka Kayapa, ka Yoana, ka Alekisanda ta luche lu arai ngiyenet a Emuron a Loapolon.

⁷Kitowaa ngimeanara alongaren kech kingita tamasi, “Ikokinete esi isubete nu ai? Anigogongu isubeta esi nu kori ekiro a ngae isubeta esi nu?”

⁸Tatachak Petero kesi ileleba Etau a Akuj tama, “Ngikapolok a ngitunga ka ngikasukou a Atuk,

⁹ani kerai kingitanarete esi sua akiroit naajokon asuba anitwaan ani a angwalan kaen, ka eger lo etangalekinere ngesi,

¹⁰ejoikinit esi daang ka Ngisirael daang iyenete atamar ewei itwaan en alongaren kus ejok noi kotere agogongu a ekiro a Yesu alo a Nasaret alo iramakinete esi napir dio kiteyaru Akuj.

¹¹ Yesu ngesi lokolong igiritae ngakiro keng nagiran kona, ‘Amoru na ingerete esi ngikadukok ngesi tokona aliwor naajokon noi edwang daang.’

¹²Eanyunio ayuuno anikeng bon kainyo anakwap kadaang, emam nabo ekiro eche lo kiinak ngoni Akuj atoyuunotor.”

¹³Tatalasi ngikasukou a Atuk ngakiro a atitinyu a Petero ka Yoana kainyo peesomato kesi. Toyena atamar arukito sek kesi ka Yesu.

¹⁴Nakaneni na engolikineta itwaan ni etangalekinio ewaasi ka kesi, kililinga chek.

¹⁵Sodi tamarae kesi topudosi alokai a Atuk dio kidongo ngikasukou ianete make.

¹⁶Kingitas tamasi, “Kikokinea ngitunga lu ai? Eyenete ngitunga daang alo Yerusalem atamar asuba kesi ngakitoodikinet nakailiilok nugu nakaneni nyikipegi ngoni nguna.

¹⁷Nakaneni ani kisaki akiroit naga nyepetakin lotunga, echikichika ngitunga lu sodi nyiisuruor nabo itwaan iche alokiro a Yesu.”

¹⁸Sodi tanyaraut kesi nabo Natuk dio kichikichika atamar nyechamit kesi nabo jik iruorosi kori itatamete a ekiro a Yesu.

¹⁹Nakaneni tatachut Petero ka Yoana tamasi, “Totiakutu esi ngikulepek atamar ibore ni etenoono alongaren Akuj, ngesi akiwap ngakiro a Akuj kori akiwap nakus?

²⁰Kainyo nyikipalikini sua akiruor na kingolik ka nakiira.”

²¹Sodi kichikichika kesi ngikasukou a Atuk lokojokon ani erumor talachakis toloto. Kingolikis kesi atamar nyikipedori akirirare kesi kainyo epuruunito ngitunga daang Akuj ana asubakinosi.

²²Arai itwaan ni asubere ngakitoodikinet nakailiilok nugu ni eporito ngikaru keng ngitomwon-omwon.

²³Napei alachakinere kona, tobongosi kesi lorukitos kech sodi tolimokis kesi ngakiro na alimokinete kesi Ngimurok Luapolok a Akuj ka ngikasukou a Atuk.

²⁴Na eirareta ngikanupak nguna, tochunakin daang wapei kilipa Akuj tamasi, “Ekapolon ka ekasuban a adis ka ngalup ka anam ta ibore daang ni eyei tooma!

²⁵ Iyong kolong itilimuni ekasuban etich kon, apaakosi Daudi alimun a agogongu a Etau a Akuj tama, ‘Nyo alemaritotor ngibukui lu nyerai Ngiyaudi? Nyo atukioto ngitunga ngakiro na eraakasi ngapasiek?

²⁶ Eriamiriamete ngikapolok a ngakwapea, tochunakin ka ngikarikok wapei, akitopeg Ekapolon Akuj ka Kiristo keng.’

²⁷Kainyo erai iteni dir eriamiriamete Erode ka Pontio Pilato ka ngibukui lu nyerai Ngiyaudi ka Ngisirael lore akitopeg Yesu, Ekasuban etich kon lo italeunitoe lo itiliwori iyong Kiristo.

²⁸Achunakinosi kesi akisub ibore daang ni kolong itiakuni iyong a agogongu kon ka echami kon atamar esubakin.

²⁹Tokona Ekapolon, kingolik cha iyong eger lo esaketa kesi akitoem sua, sodi kitochamak sua ngikasubak etich kon eruoro ngakiro kon a atitinyu.

³⁰Kitorwaa akan kon kitangalek ngitunga, nabo kimiek ngakitoodikinet nakatalarak ka nakailiilok tosubas alokiro a ekasuban etich kon alo erai Yesu lo italeunitoe.”

³¹Na arumoreta kesi akilip, tamaranik ni elipitotor kesi. Kilelebun kesi daang Etau a Akuj tolomakis akitatam ngakiro a Akuj a atitinyu.

³²Nakaneni arai asepich a ngikanupak lu etamete ka anupit ngakiro ngapei. Amam tani ipei abala arai ngiboro keng ngikeng a ilope, nakaneni amoreenete kesi ngiboro daang lu atingito.

³³Tolimonosi ngimeanara ngakiro a ayarun a Ekapolon Yesu a agogongu anaationon noi sodi topia Akuj kesi daang lokojokon noi.

³⁴Emam itwaan anikech ni echana. Nakaneni lu aya ngamanat kori ngakais, togielasi yautu ngaropiyae na ariamunete,

³⁵ nakis ngimeanara, sodi tokoranakinae itwaan ngaropiyae loger lo eitanitor.

³⁶Ayei itwaan a ales a Lawi lo edounio anakwap a Kupuro, anyaritae ngesi Yosep. Anyarito ngimeanara ngesi Barinaba (eger keng atamar “Ngolo kitalakari”),

³⁷agielari ngesi amana keng yau ngaropiyae nak ngimeanara.