Read turkana Ngitichisio 5 Bible Online

Ngitichisio 5 - turkana bible

Ngitichisio 5

¹Nakaneni togielasi ekile lo anyaritae Anania ka aberu keng Sapira iborosit kech.

²Tachamakin ngesi ka aberu keng totiaka ngaropiyae kidaa epewae sodi nakis nache ngimeanara.

³Tanyara Petero ngesi tama, “Anania, nyo imiekinea iyong Esiitan kilomakini iyong sodi kingala iyong Etau a Akuj ani idaea epewae a ngaropiyae ana ianyuni iyong alomana kon?

⁴Ani eringa iyong nyegielara iborosit ngini, arai ikon, ani na igielarea iyong, arai ngaropiyae ngakon. Ani nyo bo itiakunea iyong akisub ngakiro na ikote ne? Meere ngitunga ingalat iyong, erai Akuj ingalat iyong!”

⁵Napei eirarea Anania ngakiro nguna, kitelokin kwap totoan. Tobul ngitunga daang lu eirarete ngakiro nguna.

⁶Tolomut ngisapa kimuko akwaan keng, yaasi nikalapatan, tonuka.

⁷Adaunet a ngisaaa esibit nguuni, tolom aberu keng neni peeyeni nguna apot tosubakin.

⁸Kingit Petero ngesi tama, “Tolimokinae kerai ngaropiyae daang na ianyunete iyong ka ekile kon aniborosit kus kesi nu?” Tatachu ngesi tama, “Ee, eraakasi daang nu.”

⁹Sodi kingit Petero ngesi tama, “Nyo itiakuneta iyong ka ekile kon akining Etau a Akuj? Topupok mono iyong! Eyakasi tokona ngitunga lu tete aloose akinuk ekile kon lokidor kiyaarete iyong dang!”

¹⁰Kitelokin Sapira ngaren ngakejen a Petero totoan. Naalomuneta ngisapa ngulu, torukaut ketoana. Sodi yaarae ngesi nikalapatan tonukakinae diyete ekile keng.

¹¹Tobul ngitunga a ekanisa ka luche daang lu eirarete ngakiro nguna.

¹²Apot ngimeanara tosuba ngakitoodikinet nakailiilok ka nakatalarak nakaalak alotunga. Eriameenete ngikanupak daang tooma Nagulei a Solomon.

¹³Emam itwaan niche ni pearai ekanupan ni asaki akimorikin ka kesi. Tani kikoni neni, epuruunito kesi ngitunga luche lu pearai ngikanupak.

¹⁴Eatanakin ngitunga lukaalak lokanupak, asepich a ngaberu ka ngikiliok lu anupete ngakiro a Ekapolon.

¹⁵Kotere na asubete ngimeanara, yaarae ngitunga lorotin kisinapakinae lokitandae ka lojemu, sodi ani itoruni Petero neni, min etorube keng ni eya ngiche kech.

¹⁶Potu ngasepicho a ngitunga alorerea alu edunyasi ka Yerusalem. Yaut kesi lu edekasi kori lu akoporito ngikerep sodi kitojokae kesi daang.

¹⁷Sodi toting Emuron Loapolon a akai a Akuj ka ngirukitos keng daang, ta atukuoru a Ngisadukayo etereku noi kotere ngimeanara,

¹⁸sodi kirumut kesi ngimeanara toena alojela.

¹⁹Nakaneni tangaa emalaikat a Ekapolon ngidorin a ejela toriko ngimeanara nikalapatan dio tolimok kesi tama,

²⁰“Kapesi towaa alokai a Akuj sodi tolimokis ngitunga daang ngakiro a akiyar anakitetet kana.”

²¹Kiwapakis ngimeanara ngakiro nguna, tolomasi kai a Akuj nataparach elilim tolomakis akitatam. Tochunakis Emuron Loapolon a akai a Akuj ka ngirukitos keng ngikasukou a Ngiyaudi lua Atuk daang wapei lokiriam loapolon. Dio tomeasi kesi ngitunga lojela esakete ngimeanara torikunoe ngaren kech.

²²Nakaneni na anangeta lu amearitae lojela, torukaut kesi emam kaneni. Sodi tobongosi kesi alimokin lu eriemito neni,

²³tamasi, “Kiriamuni sua ejela egolol, towaas lu eyokiyete ngidorin. Nakaneni ani nakingaarea, emam itwaan kirukau sua eyei tooma!”

²⁴Na eirarea ekarikon a ngikeyokok a akai a Akuj ka Ngimurok Luapolok ngakiro nguna, toriangakinos itapoit peeyenete na asubakinosi.

²⁵Bu itwaan ipei tolimok kesi tama, “Topupokisi! Ngitunga lu iinikinito esi lojela, eyakasi tokona kai a Akuj itatamete ngitunga!”

²⁶Sodi tolot ekarikon alu eyokiyete akai a Akuj ka ngasigerea keng kai a Akuj torikut kesi. Nakaneni nyiirumut kesi itingaunito kainyo akerito ebaasi kori kichakete ngitunga a ngamoru.

²⁷Torikutu kesi kitowaa Anatuk. Tolimok Emuron Loapolon a akai a Akuj tama,

²⁸ “Kidungokini kolong sua esi atamar nyiitatam a ekiro a itwaan kaen, nakaneni kingolikisi mono tokona esi ngakiro na isuba esi! Ikeikis esi ngakiro na itatamete wadaang a Yerusalem, nabo isakete esi atamar sua kiari ngesi!”

²⁹Tatachut Petero ka ngimeanara luche tamasi, “Ejoikinit sua kiwapi ngakiro a Akuj, meere na a ngitunga.

³⁰Eteyaruni Akuj kata a apaayok Yesu na iramakineta esi napir taara.

³¹Ngolo ngesi lokolong ekeuni Akuj kisibak anakan keng analoteten, toliwor Ekarikon ka Ekayuunan sodi taanyuneta Ngisirael elunge ngasechesea kech torimakinae.

³²Kirai sua ngikaanyunak a ngakiro kanu, sua ka Etau a Akuj, lo erai ainakinet a Akuj ani eya ngulu iwapete ngakiro keng.”

³³Na eirareta ngitunga a Atuk ngakiro nguna, tongoa noi tasaka atamar taarae ngimeanara.

³⁴Nakaneni tonyou epei a Ngiparisayo lo anyaritae Gamaliel towo, arai ngesi eketataman a etal nabo arimasi ngitunga toyenikinitetei noi. Todungu ngesi atamar torikoroe ngimeanara nikalapatan,

³⁵sodi tolimok ngesi ngitunga lu aya Natuk tama, “Ngisirael, tochoikinos kotere ngakiro na isakete esi asubea ngitunga lu.

³⁶Iyenete esi atamar kolong ngicherwa, abuni Seuda ebala arai ngesi itwaan ni kekileenikinit, sodi kiwapakis ngesi ngitunga esibit ngamiae ngoomwon. Nakaneni taarae ngesi dio kialaros ngirukitos keng daang, tongopia atiakaru keng.

³⁷Arumoret kanguna, bu Yuda lo a akwap a Galilaya ngirwa lu emarere ngitunga, kiwapakis ngesi ngitunga lukaalak, nakaneni taarae ngesi dang kialaros ngirukitos keng.

³⁸Kongina bocha tani tokona dang anakiro kanu, kalimokinit ayong esi atamar warasi nyiisubeta ngitunga lu idiobore. Kimiekisi kesi make! Ani keraakasi ngakiro na erekinito kesi lotunga eponitotor, engopiarete,

³⁹nakaneni ani keraakasi nia Akuj eponitotor, nyipedorete esi akidwang kesi. Kori isubunete tani esi itijiete Akuj!” Tachamut ngitunga daang a Atuk ngakiro na alimuni Gamaliel.

⁴⁰Sodi tanyaraut ngimeanara ngulu, todungunoe atamar kidetae ani nabo kichikichikae atamar nyiitatam nabo a ekiro a Yesu, ani erumor kimiekinae toloto.

⁴¹Topudosi ngimeanara Anatuk elakara noi kainyo emaru Akuj kesi lu itemokino eboliare kiruma ngileech kotere ekiro a Yesu.

⁴²Torubakis ngimeanara itatamete akolongit daang ngakiro Naajokak a Yesu alo erai Kiristo, alokai a Akuj ka ngawiyei a ngitunga.