Read turkana Ngitichisio 6 Bible Online

Ngitichisio 6 - turkana bible

Ngitichisio 6

¹Ani ekisidi na eatakinotor ngikanupak, min enguringur nia ngikanupak alu eruorosi ngabukui a Ngigirik ka lu eruorosi ngabukui a Ngieburaniae. Abalasi lu eruorosi Ngagirik nyemisitae ngapuseru kech esaa lo ekorere akimuj ngirwa daang.

²Sodi tanyaraut ngimeanara ngikanupak wapei tolimut tamasi, “Nyejoikinit ngoni kipasakini akitatam ngakiro a Akuj dio atolomakisi atiakatiak ngaropiyae.

³Tokona bocha ngikaitotoi kang, toseutu alokiding kus ngitunga ngikan-kaarei lu ipuruunitoe, lu ileleba Etau a Akuj ka aosou sodi ainakisi etich ngolo.

⁴Nakaneni ejoikinit ngoni kirichakini akilip ka etich lo itatamere ngakiro a Akuj.”

⁵Talakar asepich daang a ngikanupak kotere akiroit ngina. Toseut kesi Sitepano, lo arai itwaan ni anupit noi nabo kileleba Etau a Akuj. Toseut nabo dang Pilip ka Pirokoni ka Nikanora ka Timona ka Parimena ta Nikolao lo a akwap a Antiok lokolong ebelo toliwor eka edin a Ngiyaudi.

⁶Nakis kesi ngimeanara ngitunga ngulu, sodi kilipa ngimeanara kidokokis ngakan kech nakies a ngitunga kangulu.

⁷Sodi tokeiar akiroit a Akuj. Kiatakinos ngirukitos a Yesu lu aya Yerusalem talalakearos atipei, kiwapakis tani ngimurok a Akuj lukaalak Ngakiro Naajokak a Akuj.

⁸Tosub Sitepano lo ayei ajokis a Akuj ka agogongu ngakitoodikinet nakatalarak noi ka nakailiilok alotunga.

⁹Sodi kitopega ngitunga ngiche Sitepano. Araakasi ngitunga ngulu lu aya kai apei a Atuk na anyaritae, “Akai a Atuk na erai aka ngitunga alu Elachakina dir,” aponito ngitunga ngulu alo Kurene ka Alekisandaria ka Kilikia ta Asia.

¹⁰Nakaneni nak Etau a Akuj Sitepano aosou lokojokon noi toliwor na iruorikinea ngesi, tongop kesi kona itopegete.

¹¹Sodi nakis kesi ngitunga ngiche ngaropiyae imunonito tamareta, “Kiira sua Sitepano imenyi Musa ka Akuj!”

¹²Sodi kichuchukis kesi ngitunga ka ngikasukou a Atuk ta ngiketatamak a etal. Kirumut kesi ngesi torikosi Natuk.

¹³Torikunoe Natuk ngikaanyunak lukaliokok lu eruorosi ebalasi, “Nyepalikini itwaan en jik akimeny ni italeuno nege ka etal a Musa.

¹⁴Kainyo kiira sua ngesi ebala abe inyasuni Yesu lo a Nasaret lo nege, sodi kibele ngitalio lukolong kianyuni ngoni ani a Musa!”

¹⁵Tokienyikis ngitunga daang lu ebooyete Anatuk Sitepano, dio taanyungasi kesi ereet keng ikoni lo emalaikat.