Read turkana Ngitichisio 7 Bible Online

Ngitichisio 7 - turkana bible

Ngitichisio 7

¹ Sodi kingit ngesi Emuron Loapolon a Akuj tama, “Iteni ngakiro nu a?”

²Tatachak Sitepano tama, “Ngikaitotoi kata apakang, topupokisi mono esi ngakiro kang! Atakanuuni kolong Ekapolon Akuj a akwangis ani eyei apayok Aburaam na ayakar nakwap a Mesopotamia, eringa nyewoto tolom Aran.

³Tolim Akuj tama, ‘Toisik akwap kon ka ngitunga kon sodi tolot nakwap nakedodikini ayong iyong.’

⁴Sodi taramak ngesi anakwap a Ngikalidayo tolot tolom Aran. Ani atoanet ka apakeng, kitaramak Akuj ngesi kitanangu nakwap na tokona ilomito esi naga.

⁵Nyeinakina Akuj ngesi tani ewae lodiochichi a akwap kana toliwor akeng, tani kikoni neni, kichikak Akuj ngesi atamar eliwor akeng ka ngalesea keng, tarai tani amam ngesi ikoku ngirwa ngulu.

⁶Alimokini Akuj ngesi tama, ‘Eraunete ngalesea kon ngipeyok anakwap a ache, eliworosi kesi ngikedalak sodi toboliare a ngikaru a ngamiae a ngoomwon.

⁷Erirae ayong ngitunga a akwap ana erauneta kesi ngirikon, ani ekisidi epudunete kesi anakwap kangina sodi kelipa ayong kane.’

⁸ Sodi kichikak ngesi Aburaam achamunet na a akilengero. Toliwor Aburaam apakeng a Isaka sodi kilenger ngesi akolongit na a ngakan-kauni aabor a akidoun. Ani ekisidi toliwor Isaka apakeng a Yakobo, nabo touri Yakobo ta apayok lutomon ka ngiarei.

⁹“Kona erakaritor ta apayok etereku kotere Yosep, togielasi ngesi toliwor ekedalan anakwap a Misiri. Nakaneni arukito ngesi ka Akuj

¹⁰toyuu ngesi alochan keng kadaang. Tominak Akuj ngesi kitaanyu ajokis ka aosou ani a Parao alo arai ekapolon a Misiri. Kitiliwo tani Parao ngesi ekapolon a akwap kangina ka awi keng daang.

¹¹Sodi tolom eron a akoro wadaang a Misiri ka Kanaan, pena ngichan luaronok noi. Tongopik ta apaayok akimuj,

¹²na eirarea Yakobo atamar eyei akimuj Misiri, tomea ngesi ta apayok alosiet kech na ekingaren.

¹³Alosiet kech na a ngaarei, kitoyen Yosep ngikaitotoi keng, nabo toyen Parao ngitunga a Yosep.

¹⁴Ani ekisidi, tomea Yosep ngitunga nika apakeng ka ngiyenet keng daang eraakasi alomachar kech ngitomwon-kaarei ka ngikan, ebala potu Misiri.

¹⁵Kongina, tolot Yakobo Misiri ni atoaketa ngesi kata apaayok luche.

¹⁶ Yaarae ngawat kech tanang Chekem, tomurakinae naliel nakolong agieluni Aburaam alokitela ka Amor alo Chekem, a ngaropiyae a ngakaalak.

¹⁷“Naadolio ngirwa lu iyookinere akichikakinet nakolong echikakini Akuj Aburaam, eatakina ekimar a ngitunga yok alo Misiri alalak noi.

¹⁸Ekisidi, tolomak ekapolon eche lopeayeni Yosep apolokin Misiri.

¹⁹Tosubea ngitunga a ekitela yok ngakiro naaronok noi. Toboliar ngesi ta apayok ani abalar ejoikinit eisikinete ngide kech luuchik anikalapatan sodi totoaketa.

²⁰Kidounoe Musa ngirwa ngulu, arai ngesi ikoku nikebusean. Kitanae ngesi a ngilapio a nguuni anawi ka apa keng,

²¹na epudunere ngesi nikalapatan, kirapu nakookeng a Parao ngesi kitanu ikwa ikoku keng.

²² Kitatamae Musa ngakiro daang na aosou a akwap a Misiri dio, toyenikinae noi a ngakiro ka ngitichisio.

²³“Naanangeta ngikaru a Musa ngitomwon-omwon, tolot ngesi aanyun ngitunga keng lu eraakasi Ngisirael.

²⁴Kingolik ngesi epei kech eboliar Emisirit, sodi toik ngesi itwaan ngini taar Emisirit. (

²⁵Etamit Musa atamar kori eyenunete ngitunga keng atamar esubea Akuj ngesi etich lo eyuunea kesi, nakaneni nyeyena kesi kongina.)

²⁶Akolongit na a ngaarei, kingolik Ngisirael ngiarei ejiete. Tasak akitiak kesi kisila tama, ‘Ngikiliok, iraakasi esi ngikaitotoi, nyo tokona isaketa esi awana make?’

²⁷Nakaneni kijuka lo etiji loche Musa lokwaas tolimok tama, ‘Ngae kitiliwori iyong ekapolon ka ekatubon ngakiro kosi?’

²⁸Kingit tama, ‘Isaki iyong akiar ayong loger lobeen iarea Emisirit a?’

²⁹ Na eirarea Musa ngakiro nguna, todoki alo Misiri tolot tolom nakwap a Ngimidian. Touriu kaina ngide ngiarei.

³⁰“Adaunet a ngikaru a ngitomwon-omwon, tatakanu emalaikat a Akuj ani a Musa anasarae ana anokea akim anamoni ana ayei nariet, diyete emoru a Sinai.

³¹Toiliilikis Musa na aanyungari, sodi tolot diyete amoni kingolikinea lokojokon. Nakaneni kiira ngesi etoil a Ekapolon Akuj ebala,

³²‘Ayong ngesi Akuj kata apaakon, Akuj ka Aburaam ka Isaka ta Yakobo.’ Tobul Musa tamaranik, nyesaka nabo akienyikin.

³³Tolimok Ekapolon ngesi tama, ‘Tobuto ngamuk kon kainyo italeuno neni iwaar iyong.

³⁴ Engolik ayong dir eger lo eboliare ngitunga kang alo Misiri. Eira ayong akigoro kech nakaneni atiyaun ayong ayuun. Kiirak tokona, kameari ayong iyong Misiri.’

³⁵“Musa ngesi lokolong angerete Ngisirael. Kingita tamasi, ‘Ngae kitiliwori iyong ekapolon ka ekatubon ngakiro kosi?’ Ngesi lo ameuni Akuj apolokin ngitunga ka alachakin ingarakina ka emalaikat lo atakanuuni anikeng anamoni ana anoki.

³⁶Ariki ngesi ngitunga kipudo alo Misiri, tosub ngakitoodikinet nakailiilok ka nakatalarak alo Misiri ka anam a Chamu ta lu asubi a ngikaru ngitomwon-omwon anariet.

³⁷Musa ngolo ngesi lo alimokini Ngisirael tama, ‘Emeuni Akuj ekadwaran keng nikus, loger lokolong kameunea ayong sodi toliwor ngesi epei a ngitunga kus.’

³⁸ Musa ngesi lokolong achunakina ka Ngisirael nariet. Arukito ngesi kaina kata apaayok ta emalaikat lo eruorosi ka ngesi alomoru a Sinai, dio taanyu ngesi Ngakiro a Akuj na a akiyar, kikobak ngoni.

³⁹“Towout ta apayok akiwap ngakiro keng. Tongero ngesi kiitana atamar atobongo Misiri.

⁴⁰Sodi tolimokis kesi Aron tamasi, ‘Tosubakinae sua ngakujo na kirikete. Nyikiyeni atamar anukiro asubakin ani eyei Musa alo kolong kirikuni kipud alo Misiri.’

⁴¹Neni ngesi asubakineta kesi ekisikwaane a itaok, tolemikis ngakipeyos ani erumor tolomakis ekimuje erimasi ibore ni asubete kesi ngikulepek.

⁴²Sodi torei Akuj anikech kimiek kesi ilipito ngikanyer lu eya nadis, loger lo igiritere nakitab a ngikadwarak kona, ‘Ngisirael! Meere kolong ayong kingolanakinete esi ka akipeyonokin ngibaren a ngikaru a ngitomwon-omwon anariet.

⁴³ Iwokito esi eam a akuj be Molek, ka ekisikwaane a ekanyerit a akuj kus anabe Repa, ngikisikwaane lu isubi iyong ngesi lu ilipi iyong. Kotere nguna kemiekini kitorik nikalonan noi ni idwangit Babilon.’

⁴⁴“Atingito ta apaayok eam lo edodiunit atamar arukito Akuj ka kesi anariet. Asubio loger lo alimokinea Akuj Musa atamar tosub. Tosubun dir lopit lokolong edodikinitere.

⁴⁵Apot ta apaayok lu aanyunete eam ngolo ani kata apaakech, totinga eam ngolo na alooso kesi ka Yochua sodi toloma nakwap na etwarakinea Akuj ngibukui lusek alomito neni. Sodi kidong eam ngolo neni tanang ngirwa lua Daudi.

⁴⁶Tominak Daudi Akuj sodi tolimok ngesi Akuj atamar asaki atosubak Akuj a Yakobo ni iboikin.

⁴⁷ Nakaneni arai Solomon ngesi adukokini ngesi akai.

⁴⁸“Nakaneni nyibooyi Akuj naapolon noi anakais ana esubete ngitunga, loger lo ebalar ekadwaran a Akuj,

⁴⁹ ‘Ebala Ekapolon, nadis eyei ekicholong kang lo eboyonokin ayong anapolou kang, nabo akwap ngesi echiakit ayong. Akai na ikoni ai kidukokinete esi ayong? Aliwae eboikin ayong eangarea?

⁵⁰ Meere kolong ayong asubi ngiboro lu daang a?’ ”

⁵¹Torubak Sitepano ebala, “Wae, abe egogong esi ngakies! Eroko ngitai kus loger a ngibukui alu nyerai Ngiyaudi nabo nyiirarete ngakiro a Akuj. Ikwaan esi ka ta apaakus. Ngirwa daang itopegete esi Etau a Akuj.

⁵²Eyei ekadwaran a Akuj edio lo peaboliatar ta apaakus a? Aarete kesi ngimeuna a Akuj lukolong kanuan alimorete abunere a Ekasuban etich alo etenoono. Nakaneni tokona, irikokis esi ngesi ngitunga sodi taara.

⁵³Esi kolong ianyunete ngitalio a Akuj lu kiinakinete ngimalaikae, nakaneni nyiwapa esi ngitalio ngulu!”

⁵⁴Na eirakineta ngitunga a Atuk ngakiro a Sitepano, tongoa noi tokiricha ngikel enyunyurasi.

⁵⁵Nanakeni tokienyia Sitepano nadis ileleba noi Etau a Akuj. Sodi kingolik akwangis a Akuj ka Yesu ewei anakan ana aloteten a Akuj ana erai Apa.

⁵⁶Tolim tama, “Kingolikisi a, engolik adis engaar ka Lokookeng a Itwaan ewei alowae alo aloteten a Akuj!”

⁵⁷Nakaneni kikalout kesi kiremasi togolo ngaki a ngakan kech. Dio toporokis kesi ngesi atipei,

⁵⁸kipudosi ngesi nikalapatan a ere kimasa a ngamoru. Kimiekineta ngikaanyunak esorokit lo anyaritae Saul ngiworui kech sodi kiratak.

⁵⁹Ani eringa kesi echakachakaate ngesi a ngamoru, tanyara Sitepano Akuj ebala, “Ekapolon Yesu, kideu etau kang!”

⁶⁰Toriedik ngesi kirema tama, “Ekapolon! Nyiimaru akisech naga anikech!” Na alimunio nguna, dio totoan.