Read turkana Ngitichisio 8 Bible Online

Ngitichisio 8 - turkana bible

Ngitichisio 8

¹Sodi tojoik Saul ni aarere Sitepano. Akolongit napei ngina toboliare noi ngikanupak lu ayakasi Yerusalem. Kialaros ngikanupak daang totena nakwap a Yudea ka Samaria. Ngimeanara make nyialara.

²Tonuka ngitunga lu elipito Akuj Sitepano kigoro lokojokon esutonokinete.

³ Nakaneni tasak Saul akinyasun ngikanupak, tolomanak anakais kirum ngikiliok ka ngaberu toen daang alojela.

⁴Toloto ngikanupak lu ealarosi wadaang itatamete Ngakiro Naajokak.

⁵Tolot Pilip lore loapolon alo Samaria kitatam ngakiro a Kiristo alotunga alu aya neni.

⁶Tomisik asepich a ngitunga ngakiro na eruoro Pilip lokojokon, apupokinito ngakiro keng, kiteete ngakitoodikinet nakailiilok asubi ngesi.

⁷Topuduunut ngipean alotunga alukaalak iremasi, dio kitojok lu angwalito ka lu echodosi.

⁸Talakaros ngitunga a ere kangolo.

⁹Alomit itwaan ni anyaritae Simon neni, atalanari ngesi ngitunga a Samaria kotere amuronot keng. Abala ngesi arai itwaan ni kayenikinitae,

¹⁰ayenikinito ngesi ngitunga daang alore, lu eyenikinitae ka lu nyeyenikinitae, abalasi, “Erai ngesi agogongu na a Akuj na enyaritae, ‘Agogongu Naapolon.’ ”

¹¹Ayenikinito ngitunga ngesi kainyo a ngirwa a ngikaalak, atalanarete kesi ngakiro a amuronot keng.

¹²Nakaneni na anupeta kesi ngakiro a Apolou a Akuj na etatami Pilip a ekiro a Yesu, kibatisae ngikiliok ka ngaberu.

¹³Tonup Simon dang. Ani kibatisae kerumor, torubak erukito ka Pilip, etalarito ngakitoodikinet nakailiilok ka nakatalarak na etee ngesi.

¹⁴Na eirareta ngimeanara lu aya Yerusalem atamar achamut ngitunga a Samaria ngakiro a Akuj, tomeasi Petero ka Yoana inaa.

¹⁵Na anangeta Petero ka Yoana inaa, kilipakis ngikanupak esakete taanyut Etau a Akuj.

¹⁶Kainyo amam tani ipei kech ni alomarit Etau a Akuj. Arai akibatisare bon ebatisatae kesi a ekiro a Ekapolon Yesu.

¹⁷Sodi kidokokis Petero ka Yoana ngakan kidiama ngakies kech, taanyut kesi Etau a Akuj.

¹⁸Na anyungarea Simon atamar aanyut ngikanupak Etau a Akuj ani edokonokinioto ngimeanara ngakan nakies kech, tolemik ngesi Petero ka Yoana ngaropiyae,

¹⁹tolim tama, “Kimiekinae ayong dang ataanyu agogongu na sodi taanyunea itwaan ni edokokini ayong ngakan kang nakou keng Etau a Akuj.”

²⁰Nakaneni tatachak Petero ngesi tama, “Kimiek ngaropiyae kon tobukoros ka iyong aapei kainyo itamit iyong atamar kori egielio ainakinet a Akuj a ngaropiyae!

²¹Emam ni ingichakin iyong alotich kalo, kori emam tani itwaan kimarunit iyong alotich kosi kainyo nyetenoono etau kon ani a Akuj.

²²Tolung robo aronis nakon na sodi kilip Ekapolon kitorimak iyong ngitamen luaronok lu.

²³Kainyo engolik ayong atamar ileleba iyong aronis a etereku nabo kienit iyong akisech.”

²⁴Sodi Simon tolimok Petero ka Yoana tama, “Wae, kilipa kare Ekapolon kotere ayong sodi nyesubakinosi ngakiro na ilimut esi anikang tani wadiochichi.”

²⁵Na arumoreta kesi alimun ngakiro a Yesu na ayenete kesi ka akitatam Ngakiro Naajokak a Ekapolon, tobongosi Petero ka Yoana Yerusalem. Ani eloose alorot, kitatama Ngakiro Naajokak anadakarin anakaalak Alosamaria.

²⁶Tolimok emalaikat a Ekapolon Pilip tama, “Tosubakin sodi tolot kuju, tomea erot lo isiakini alo Yerusalem tanang Gasa.” (Emam itwaan itoreene lorot lo ngirwa lu.)

²⁷Sodi tosubakin Pilip tonyou tolot. Esaa lopei ngolo, ayei itwaan a Isopia ni edongitoe, alosi ngesi nawi keng. Arai ngesi ekapolon lo aweikinit ngaropiyae daang a aberu ana apolokinit Isopia. Alosit sek ngesi Yerusalem akilip, ani esaa ngolo, adokit ngesi aurukuk na erito ngangolei keng abongi nawi.

²⁸Ani na alosio ngesi, esomae akitab a ekadwaran Isaya.

²⁹Tolimok Etau a Akuj Pilip tama, “Kape toloma naurukuk na irito ngangolei ngin.”

³⁰Tamatar Pilip torukau ngesi isomae akitab a ekadwaran Isaya. Kingit ngesi tama, “Iyeni iyong ngakiro na isomae iyong nu a?”

³¹Tatachu itwaan ngini tama, “Ekokini ayong ayeni emam itwaan ni kesisakini ai?” Sodi tolimok ngesi Pilip atamar todoka naurukuk kiboikinos ka ngesi.

³² Ngagiran a Akuj na esomae ngesi kesi nu, “Ekoni ngesi amesek na ejukitae akingol, ekoni ngesi imesek ni nyeruo echudio ngajul. Nyelimuno ngesi akiroit tani apei.

³³Etaanyunio ngesi ngileech, nyiirirae a ngakiro ana eriyan. Emam itwaan etamari eya ngesi ngalesea, kainyo alemar akiyar keng anakwap.”

³⁴Kingit ekapolon lo edongitoe ngolo Pilip tama, “Ngakiro a ngae iruoro ekadwaran a Akuj lo? Elimunit ngesi ngakiro na eraakasi ngakeng a ilope kori ngakiro na eraakasi ngaka itwaan a iche?”

³⁵Sodi tolomak Pilip ekiruor napei anagiran kanguna jik, tolimok ngesi Ngakiro Naajokak a Yesu.

³⁶Ani iwapito erot, tanangut ni aya ngakipi sodi tolim ekapolon ngolo tama, “Ngakipi nu, nyoni keratakini ayong nyekebatisae?” [

³⁷Tolimok Pilip tama, “Kibatisao iyong kinup a etau kon kadaang.” Tolim Ekapolon ngolo tama, “Anup ayong atamar Yesu Kiristo ngesi erai Lokookeng a Akuj.”]

³⁸Todung ekapolon ngolo atamar kitowae aurukuk na erito ngangolei. Totiyaunos kesi kwasiarei tolomasi nakipi sodi kibatisa Pilip ngesi.

³⁹Na apudunioto kesi anakipi, kitorotok Etau a Ekapolon Pilip toten wache. Nyeanyungara nabo ekapolon ngolo Pilip, nakaneni tolot elakara noi.

⁴⁰Tolot Pilip tanang Asoto, kitor ngesi lorerea daang itatami Ngakiro Naajokak tanang tani Kaisaria.