Read turkana Ngitichisio 9 Bible Online

Ngitichisio 9 - turkana bible

Ngitichisio 9

¹Ngirwa lupei ngulu, torubak Saul iricha niationon atamar aari ngirukitos a Ekapolon. Tolot ngesi ni Emuron a Loapolon

²atamar asaki ngabaruae na idodiunito atamar kachamakinitae ngesi alosi nakais a Atuk na eya Damasko. Sodi ani kerukau ngesi ngaberu ka ngikiliok lu iwapito Erot a Ekapolon, kirum dio toriku Yerusalem.

³Ani eapiari Saul lore a Damasko, tokwangu akicha anadis atipei kiriam ngesi alowaitin kadaang.

⁴Tadakakin ngesi kwap kiira etoil ebala, “Saul, Saul, nyo kiboliar iyong ayong?”

⁵Kingis Saul tama, “Iyong ngesi ngae, Ekapolon?” Tatachu etoil tama, “Ayong ngesi Yesu lo kiboliar iyong.

⁶Nakaneni tonyou tolot lore sodi kitolimokin kaina na ejoikinit iyong isubakini.”

⁷Towaa ngikiliok lu aloose ka ngesi kililinga chek. Kiirasi kesi etoil nakaneni emam itwaan aanyungasi.

⁸Tonyou Saul analup ani ebala engolik akwap, nyingolikina ibore tani ipei. Sodi totinga kesi ngesi akan torikoroe Damasko.

⁹Tomudukan ngesi a ngirwa a nguuni, ngirwa ngulu daang, emam ibore ni emuj ngesi kori niamat.

¹⁰Ayei erukitos a Yesu Damasko lo anyaritae Anania. Taanyunga ngesi akisingolikinet a Akuj. Anakisingolikinet kangina, tanyara Ekapolon ngesi tama, “Anania!” Tatachu ngesi tama, “Ayei ayong nege Ekapolon.”

¹¹Tolimok Ekapolon ngesi tama, “Tosubakin tolot Lorot lo erikino, kingitu anawi a Yuda itwaan ni ebunit alo Tariso ni enyaritae Saul. Ilipit ngesi,

¹²aanyungari ngesi anakisingolikinet a Akuj itwaan enyaritae Anania elomuni sodi kidokok ngakan keng nakou keng dio taanyungarea ngesi akwap nabo.”

¹³Tatachak Anania tama, “Ekapolon, kalimokis ayong ngitunga lukaalak ngakiro a itwaan kaen ka ngakiro naaronok noi na asubea ngesi ngitunga kon alo Yerusalem.

¹⁴Abu ngesi nege edungokinito Ngimurok Luapolok atamar kirum daang lu ilipito elimito ekiro kon.”

¹⁵Nakaneni tolimok Ekapolon tama, “Kape cha iyong, kainyo aseu ayong ngesi toliwor iborosit kang, sodi tolimo ekiro kang alobukui alu nyerai Ngiyaudi ka ngikapolok kech ta Ngisirael.

¹⁶Kainyo edodikinit ayong ngesi atamar ejoikinit ngesi eboliare noi kotere ekiro kang.”

¹⁷Sodi tolot Anania toloma kai ngina. Ani erumor kidokok ngakan keng nakou a Saul tama, “Lokaatokang Saul, Ekapolon lo erai Yesu elope, lo atakanuuni anikon na iyakar iyong lorot ibunit nege. Ngesi kameu ayong sodi taanyungarea iyong akwap nabo, ani nabo dang, kilelebun Etau a Akuj nikon.”

¹⁸Tachakun ibore ni ikoni ngikabebekwa a ngikolia anakonyen keng atipei sodi taanyunga ngesi akwap nabo. Tonyou ngesi sodi kibatisae.

¹⁹Ani erumori akimuj, topwatun akwaan. Arukito Saul ka ngikanupak lu aya Damasko a ngirwa a ngidikidio.

²⁰Kidira ngesi nakais a Atuk tolomak akitatam atamar arai Yesu Lokookeng a Akuj.

²¹Tatalasi ngitunga ngakiro keng na eirarete tamasi, “Ekoe, meere itwaan en nikolong aareene lu alimito ekiro be Yesu alo Yerusalem a? Ikwa meere kolong abunitor ngesi nege akirumun ngitunga ngulu sodi toriko Lomurok Luapolok a?”

²² Nakaneni torubak Saul itatami a agogongu noi kisipiyo ngesi Ngiyaudi lu alomito Damasko ngakiro tongopa naetachunete ani achiununea ngesi ngakiro na idodiunito atamar erai Yesu Kiristo.

²³Adaunet a ngirwa a ngikaalak, kiriamariama Ngiyaudi sodi totuko akiar Saul,

²⁴nakaneni tolimokinae ngesi atamar etukito kesi. Akwaar ka apaaran, kiyoko kesi ngidorin a ere esakete akiar ngesi.

²⁵Nakaneni tadakut ngesi ngirukitos keng nakwaare anakikap kiyooliut ani aorori anawas kimiekis anikalapatan.

²⁶Tolot Saul Yerusalem esaki akiruk ka ngirukitos a Yesu. Nakaneni nyenupa kesi atamar arai ngesi erukitos a Yesu, sodi toema kesi daang ngesi noi.

²⁷Nakaneni bu Barinaba akingarakin ngesi toriko ni aya ngimeanara. Kisisak kesi eger lo engolikinea Saul Ekapolon alorot ka atamar esuruori ngesi Ekapolon. Tolimok nabo kesi eger lo etatamea Saul a atitinyu a ekiro a Yesu na ayakar Damasko.

²⁸Sodi kiruko Saul ka kesi ani aloose kadaang alo Yerusalem. Kitatam ngesi a atitinyu a ekiro a Ekapolon.

²⁹Eanete ngesi nabo topega tani ka Ngiyaudi lu eruorosi ngabukui a Ngigirik, nakaneni tasaka kesi akiar ngesi.

³⁰Na ayeneta ngikanupak ngakiro nguna, torikosi ngesi tanang Kaisaria dio kimiekis ngesi elosi Tariso.

³¹Sodi min ekisil lokanupak daang alo Yudea ka Galilaya ta Samaria. Kiatakin ngikanupak talalaketa kona engarakinitor kesi Etau a Akuj nabo torikite Ekapolon.

³²Tolot Petero wadaang. Ani akolongit apei, tolot aanyun ngitunga a Akuj lu ayakasi lore a Lida.

³³Toriam itwaan ni anyaritae Ainea kaina. Angwalit Ainea peapedori anyoun alokitanda a ngikaru a ngikan-kauni.

³⁴Tolimok Petero ngesi tama, “Ainea, kitojok iyong Yesu Kiristo, tonyou tosubak ekitanda kon.” Tonyou Ainea atipei.

³⁵Na anyungareta ngitunga daang lu alomito Lida ka Charon Ainea, apot toreunos nia Ekapolon.

³⁶Alo Yopa, ayei aberu na arai akanupan anyaritae Tabisa. (Enyaritae ekiro keng a ngabukui a Ngigirik Dorikas, eger keng atamar “agete”.) Asubeene ngesi ngakiro naajokak nakaalak nabo apatana noi engaranakini ngikebootok.

³⁷Ngirwa ngulu, todekakin ngesi totoan, arumoret akilotar ngesi, kinapakinae akwaan keng namaniyat na alokidiama akai.

³⁸Kona ayakar Lida diyete Yopa, ani iirarete ngirukitos a Yesu atamar eyei Petero Lida, tomeasi ngitunga ngiarei akimaima ngesi tamasi, “Bua kare cha nikosi atipei.”

³⁹Sodi tosubakin Petero kirukosi ka kesi. Na adolunio ngesi, torikoroe kai na ayei kidiama. Towaa ngapuseru daang kiriama ngesi igorosi ka akidodeanakin ngesi ngiworui lu enapitae alotooma ka nikalapatan lu adonyonokini kesi Dorikas ngirwa lu ayarea.

⁴⁰Nakaneni kipudo Petero kesi daang nikalapatan dio toriedik kilip, ani erumor torei nakwaan a Dorikas tama, “Tabisa, tonyou!” Tokienyu ngesi ani eanyungari Petero, kiboikin.

⁴¹Taapia Petero nikeng, toting akan kitonyou. Ani erumor, tanyarau ngesi ngikanupak daang ka ngapuseru sodi nak ngesi kesi Dorikas eyari.

⁴²Tokeikin ngakiro nguna lowaitin daang a Yopa sodi tonupa ngitunga ngikaalak Ekapolon.

⁴³Kiboi Petero alo Yopa ngirwa ngikaalak anawi a Simon alo amureene ngilowi.