Read turkana Ngiroma 1 Bible Online

Ngiroma 1 - turkana bible

Ngiroma 1

¹Ayong Paulo ekasuban etich a Yesu Kiristo ngesi egirunit abarua naga. Arai ayong nabo emeanara lo kanyarae Akuj katoseu atoliwor eketataman a Ngakiro a Naajokak keng.

²Kolong kanuan, echikakini Akuj ngitunga Ngakiro Naajokak nu ani a ngikadwarak keng, loger lo igiritere Nagiran na italeuno.

³Eraakasi ngakiro nguna na a Lokookeng, Ekapolon yok Yesu Kiristo. Alopit keng alo araakar itwaan, edounio ngesi erai ales a Daudi.

⁴Alopit a akitaleuno a Etau ani araakar ngesi Akuj, edodiunio dir a agogongu anaationon noi atamar erai ngesi Lokookeng a Akuj ani ayarunea.

⁵Kotere ngesi, kangaru ayong Akuj a ajokis keng ketarau emeanara, sodi atoreunea ngitunga a ngibukui kadaang tonupa ka akiker Akuj.

⁶Ngitunga ngulu ngesi esi dang lu iyakasi Roma, lu kinyara Akuj toliworos ngika Yesu Kiristo.

⁷Kegirakinit tokona esi daang lu iyakasi Roma, lu kimina Akuj kitoseu toliworos ngitunga keng. Kimiekisi Akuj Apayok ka Ekapolon yok Yesu Kiristo kitaanyu esi ajokis ka ekisil.

⁸Abuakinit ayong Akuj kang alakara mono ekingaren ani a Yesu Kiristo kotere esi daang, kainyo eirasi ngitunga a ngakwapea kadaang anupit kus.

⁹Eyeni Akuj atamar eraakasi naalimu ayong ngaka iteni, Akuj ngina ngesi naasubi ayong etich keng a etau kang kadaang etatami Ngakiro Naajokak a Lokookeng. Eyeni Akuj atamar ketamunit ayong esi

¹⁰esaa daang lo elipea ayong. Elipit ayong Akuj atamar ani kerai echami keng, kainak ayong alolom naabunio nikus tokona.

¹¹Nakaneni kemuit ayong aanyun ka esi noi, sodi atomoreta apiaro na etau a Akuj na itogogongi ngitai kus noi.

¹² Ngakiro nguna ngesi atamar, kingarakin ayong ka esi aapei, kengarak ayong anupit kus, nabo kingarak esi nakang.

¹³Asaki ayong esi ngikaitotoi kang toyena atamar akot ayong ngirwa ngikaalak abunere aanyun esi, nakaneni keratakinit ibore tani tokona. Asaki ayong ataanyu ngikanupak anikus dang loger lo aanyunea alobukui alu nyerai Ngiyaudi.

¹⁴Kainyo alemuna ayong kotere ngitunga daang, lu aosut kalu eringa ebangaaka, lu isomato kalu nyisomato.

¹⁵Eraakasi nguna ngesi kemuitor akitatam esi lu iyakasi Roma Ngakiro Naajokak.

¹⁶Nyeketimit ayong atamar eraakasi Ngakiro Naajokak agogongu a Akuj na eyuunea daang lu enupete, Ngiyaudi mono ekingaren ta ngibukui lu nyerai Ngiyaudi dang.

¹⁷ Kainyo idodiunito dir Ngakiro Naajokak eger lo imarunea Akuj atamar erai ngitunga lu etenoono eboyor anikeng, kotere epit a anupit napei anakisiakinet tanang losal. Loger lo igiritere nagiran kona, “Itwaan ni etenoono eboyor ani a Akuj kotere anupit, eyari.”

¹⁸Etoodiun anyunyura a Akuj anadis atamar, engerit Akuj ngasechesea ka aronis daang a ngitunga alu itengerito ngakiro na iteni ayenunio kotere eboyor kech loaronon.

¹⁹Kainyo daang na a Akuj na epedorio akiyen, ileerete anikech kainyo Akuj bon etatakanu.

²⁰Napei kolong esubuni Akuj akwap, eboyor keng lo nyiteo lo ikoni agogongu keng nanyedaun ka ni araakar ngesi Akuj, eleereu atakanuu. Ayan ngitunga ngakiro nguna aloboro alu asubuni Akuj. Nakaneni emam ngakiro ngache na elimunete kesi sodi toyuunotor!

²¹Eyenete kesi Akuj, nakaneni nyekerito loger lo esakitor ngesi kesi katokear, kori nyebuanakinete kesi ngesi alakara. Nakaneni eraakasi ngakiro na itamete kesi ngapasiek, ani nabo ngitamen kech, erioketa kolong chuch.

²²Ebalasi kesi kiosok, nakaneni ebangaaka,

²³ adepasi kesi akilip Akuj na eyari jik, aliworosi ilipito ngakujo nasubuna na eraakasi ekisikwaane a ngitunga alu etoakeenete, kori ekisikwaane a ngikieny, kori lo a ngitieng kori lo a ngimunio.

²⁴Kotere nguna, ajal Akuj ngitunga ngulu emiek esubete emalaanu lo eminasi ngitai kech. Tosubeta ngawat kech ngakiro na a ngileech.

²⁵Edeparete kesi akinup ngakiro a Akuj na iteni sodi tonupa ngakiro na eraakasi alioko. Ekerito kesi nabo ilipito ibore nisubuna todepasi Akasubunan alope na erai ngesi ejoikinit ipuruunio jik! Aamen.

²⁶Kona esubeta nguna, areiki Akuj kesi kiwapa etereku lo a ngileech. Tani ngaberu dang eboliatar eberuane kech, aliworosi itopereeneo a eger alopalem nyepereeneto ngitunga.

²⁷Aloger alopei kangolo, adepasi ngikiliok dang apereenen ka ngaberu loger lopalem, aliwor imuit akiteper ngikiliok luche. Esubanakinotor ngikiliok make ngakiro na a ngileech, sodi kotere nguna, taanyut kesi eriras a ngakiro ana esecheenete.

²⁸Kona angerioto ngitunga akiyen Akuj, emiekinea Akuj kesi ngitamen lu inyasuna, sodi tosubeta kesi ngakiro na nyejoikinit esubete.

²⁹Elelebun nikech ngakiro naaronok daang, na ikote aronis ka etereku ka nginyas ka arorokanut noi ka akiar ka eburas ka engalas ta akitoronit luche. Iturumosi kesi

³⁰ka aswama, eraakasi kesi ngitunga lu eremokino Akuj. Iyenyasi kesi make, inisasi kesi ka akiwoga. Eminasi noi akisub naaronok nabo nyepupete ngakiro a ngikauriak kech.

³¹Emam ngakiro ekachito ngitai kech, nyiwapete ngakichikakinet kech. Nyepataka kesi ani eya luche kori nyisieniyete luche.

³²Eyenete kesi atamar elimunitoe alotal a Akuj atamar ngitunga lu esubete kongina, etoakete. Tani ikote neni, meere atamar kesi make esubete ngakiro nguna, nakaneni itoodikinito kesi tani luche atamar ejok ngakiro nguna.