Read turkana Ngiroma 10 Bible Online

Ngiroma 10 - turkana bible

Ngiroma 10

¹Ngikaitotoi kang! Agasi cha ayong a etau kang kadaang atamar toyuun cha ngitunga a ebukit kang!

²Ayeni ayong atamar ilipito kesi Akuj lokojokon noi, nakaneni nyerai akilip kech na eyeneta ngakiro na iteni.

³Eringa kesi nyeyenuna eger lo imarunea Akuj ngitunga atamar etenoono eboyor anikeng, aliworosi kesi esakete akiwaakin erot lo erai ekech a ngikulepek. Sodi towout kesi achamun erot a Akuj lo imarunea ngitunga atamar etenoono eboyor kech.

⁴ Kainyo Kiristo erai esal a etal, sodi ani itwaan daang ni enupi, imarunio atamar etenoono eboyor ani a Akuj.

⁵Egiri kolong Musa ngakiro na imarunere itwaan atamar etenoono eboyor ani a Akuj kotere ni iwapitor etal. Kigir tama, “Itwaan cha daang ni iwapi ngakiro na edungunit etal, eyari.”

⁶Nakaneni ngakiro nu kesi igiritae kotere eger lo erai imarunere itwaan atamar etenoono eboyor ani Akuj, “Wara nyiitama alotau kon bon ibala, Ekoe ngae elosi kidiama nadis?” (ngesi atamar, atiyaun Kiristo kwap).

⁷“Kori wara nyiinis ibala, ekoe ngae elomari nalup?” (ngesi atamar akiteyarun Kiristo).

⁸Ngakiro na igiritae kesi nu, “Eya ngakiro a Akuj diye kon, eya nakituk kon nabo eya lotau kon”, ngesi atamar, ngakiro a anupit ana kitatami sua.

⁹Ani kilimu iyong a akituk atamar Yesu ngesi Ekapolon, sodi tonup alotau kon atamar eteyaruni kolong Akuj ngesi, kiyuunio iyong.

¹⁰Kainyo enupi itwaan alotau keng, sodi kimaru Akuj ngesi atamar etenoono eboyor anikeng, ani erumor tolim a akituk keng sodi toyuunere.

¹¹Igiritae nagiran kona, “Itwaan cha daang ni enupi ngakiro keng, nyirumete ngileech.”

¹²Eraakasi ngakiro nguna ngaka ngitunga kadaang, kainyo nyetiakak Ngiyaudi ka ngitunga a ngibukui alu nyerai Ngiyaudi. Akuj ngesi napei erai Ekapolon kadaang, nabo einakini daang lu enyarito nesi ebari keng.

¹³ Loger lo igiritere nagiran kona, “Itwaan daang ni enyarae Ekapolon Akuj atamar kengarak, eyuunio.”

¹⁴Nakaneni ikokinete kesi enyaraate ngesi atamar kingarak ai, toringa nyenupa ngakiro keng? Ani ikokinete kesi enupete toringa nyiirara ngakiro a Akuj ai? Ani ikokinete kesi iirarete ngakiro a Akuj erai pekelimor ai?

¹⁵Ani ikokinete ngakiro a Akuj elimorio erai pekemearitae ngikasubak etich ai? Loger lo igiritere nagiran kona, “Ejok noi ebune kangulu eyaunito Ngakiro Naajokak!”

¹⁶Nakaneni meere daang achamut Ngakiro Naajokak. Eruoro kolong ekadwaran a Akuj Isaya elope ebala, “Ekapolon, ngae anupi ngakiro na kitatami sua?”

¹⁷ Tokona bocha, itoruni akinup nakiirar ngakiro a Akuj, nabo itorunete ngakiro a Akuj nakitatam Kiristo.

¹⁸ Nakaneni engita cha ayong, “Nyiirara mono cha kesi dir ngakiro a Akuj a?” Iteni dir, eirarito kona igiritere nagiran atamar, “Apetarosi ngakiro na eruorosi kesi tokeikin ngakwapea wadaang, tananga ngakiro kech losal a akwap.”

¹⁹Engita nabo ayong atamar peayenete dir Ngisirael a? Musa elope ngesi lo esieuni tatachu tama, “Kesirakari ayong esi etereku kotere ngitunga lu nyesibito tani echebukut, sodi tongoikis esi lokojokon, ebukut a ngikabangabangae.”

²⁰ Nabo tolim tani Isaya ngakiro a atitinyu tama, “Kaanyut ayong ngitunga lukolong pekasakete, atakanuuni ayong ani eya ngulu kolong pekengitasi ayong.”

²¹Nakaneni ani anakiro a Ngisirael tolim tama, “Apaaran juui, ebakinit ayong ngakan emaimai ngitunga lu nyepupete ngakiro taraakas luketulunyak ngakan.”