Read turkana Ngiroma 11 Bible Online

Ngiroma 11 - turkana bible

Ngiroma 11

¹Tokona, kengisit ayong esi, “Ekoe kenger Akuj ngitunga keng a?” Mam jik! Arai ayong Esiraelit, ales a Aburaam, itwaan a ebukut a Benjamen.

²Nyengero Akuj ngitunga keng lukolong aseuni anakisiakinet. Iyenete esi na igiritae wache a ngagiran eger lo emaimaea Elija Akuj kotere Ngisirael tama,

³“Ekapolon, aar kesi ngikadwarak kon, nabo enyasut ngikenoi lu kipeyokinere iyong ngakipeyos. Ayong bon elope edongit, nabo esakete kesi akiar ayong dang.”

⁴Nakaneni a, anukiro atachakini ngesi Akuj? Tatachak Akuj ngesi tama, “Eya ngitunga kang ngabunge ngakan-kaarei lu eringa nyilipa akuj nasubuna enyaritae Baal.”

⁵Ikwaan ngakiro nguna ka na a ngirwa alu tokona kalu. Eringa eya ngitunga lupiyayek lu aseu Akuj kotere ajokis keng.

⁶ Eseunit ngesi kesi kotere ajokis keng, meere kotere ngakiro na asuba kesi, kainyo arai toseuniye Akuj ngitunga kotere ngakiro naajokak na esubete kesi, pekerai ajokis keng ajokis na iteni.

⁷Abe nyo tokona? Nyeanyuna Ngisirael ibore ni kolong asakete. Eraakasi ngitunga lupiyayek kolong aseuni Akuj make kesi aanyunete, kainyo akinimanete luche towout akiirar ngakiro a Akuj na anyaritor kesi.

⁸Loger lo igiritere nagiran kona, “Esiwaa kolong Akuj ngitamen kech, etililimiyo ngitai kech, tani nakolongit na, nyeanyungarete kesi kori nyingolikinete.”

⁹ Alimunit nabo Daudi ebala, “Toliwor akinumnum kech elokit lo isurumi kesi, kibusokinos neni sodi kirirae!

¹⁰Kimiekisi ngakonyen kech tarap aribu, nyeanyungareta kesi, nabo toliworos kesi ekudonokinosi eriabasi ngirwa daang.”

¹¹Kengisit tokona nabo ayong esi kona, nakolong adakarotor Ngiyaudi a, apot tomunyar a? Mam jik! Aanyunete ngibukui lu nyerai Ngiyaudi ayuuno ani asecheta Ngiyaudi. Sodi kirakarea Ngiyaudi etereku alobukui alu nyerai Ngiyaudi.

¹²Kotere akisech a Ngiyaudi, aanyut ngitunga daang a akwap agatakino naajokon noi. Ani kitaanyunit ibore ni ikoni eboot kech a ngitai ngibukui lu nyerai Ngiyaudi agatakino naajokon noi, ejoker agatakino ngina noi erai keanyut Ngiyaudi daang ayuuno!

¹³Kesuruori tokona ayong esi ngibukui lu nyirai Ngiyaudi, ani aringa ayong arai lo kamearitae lobukui lu nyerai Ngiyaudi, alakara ayong noi kotere etich kang.

¹⁴Kori apedori tani akisirakar ngitunga kang etereku sodi toyuunotor ngiche kech.

¹⁵Kainyo ani kerai ni angerio Akuj Ngiyaudi ngesi achamunotor ngibukui lu nyerai Ngiyaudi ka Akuj, ikokini ai na echamunea Akuj kesi? Ikokinete ngikatoak lu ayarut!

¹⁶Ani kisiaun amugati epewae nakinae Akuj, eliwor tani amugati daang akeng. Ani kelemun ngaten a ekitoe na eya tooma ngalup nakinae Akuj, eliwor tani ngaten na alokidiama dang ngaka a Akuj.

¹⁷Ani kechiatar epewae a ngaten a ekitoe a akimiet, lo itakinit itwaan mana, nakaneni tolemunae ateni a ekitoe a akimiet lo erai eka moding, tokodakinae nikeng, ikote esi ngibukui lu nyirai Ngiyaudi ekitoe a akimiet, lo erai eka moding. Ianyut tokona esi dang akiyar naajokon a Etau a Akuj, na erai aka Ngiyaudi.

¹⁸Nakaneni nyejoikinit tokona esi imenyete lu ekokis ngaten na achiatar, nyo tokona inisatar esi? Ikote esi ateni na alokidiama, nyigangito esi ngaten na alokwap, ngaten na alokwap kesi kigangito esi.

¹⁹Nakaneni ilimuni iyong tama, “Iteni cha, nakaneni atuborio ngaten sodi atorupunea ayong anados kech.”

²⁰Eraakasi nguna iteni! Ekokinete kesi ngaten na achiatario ani peanupeta, sodi kidong iyong neni ani inupitor. Nakaneni wara nyiinis kotere nguna, ejoikinit iemi.

²¹Kainyo ani kolong pekisienito Akuj Ngiyaudi lu ikote ngaten na eraakasi ngaten dir, esibit iyong isieni iyong ngesi a?

²²Toyen anakiro kanguna atamar erai Akuj naajokon ka nakadedengan. Ededeng ngesi ani eya lu adakarosi, nakaneni ejok anikon, erai kirubak iyong anajokis keng. Nakaneni anipekirubak, kichiatario iyong dang.

²³Tani Ngiyaudi dang ani kilochosi tonupa ngakiro a Akuj, ebuakinio kesi nikolong ayakasi, kainyo epedori Akuj akikokin neni.

²⁴Ikote esi ngibukui lu nyirai Ngiyaudi ateni a ekitoe a akimiet alo alomoding, lo echiatario, sodi toropakinae lokitoe eche a akimiet itakinitae mana, losek nyimorikina ka ngesi. Ikote Ngiyaudi ekitoe lo etakinitae ngolo, nakaneni ebeben ani a Akuj akimorikin nabo ngaten na echiatara nu ka ekitoe lo erai ekech.

²⁵Ngikaitotoi kang, eya ngakiro namunonoe na eraakasi ngaka iteni na asaki ayong esi toyena sodi tojongoto akitam atamar kori iosok esi. Meere akichananu a Ngiyaudi aka jik, emini tanang ngirwa lu itemokinor ekimar a ngibukui alu nyerai Ngiyaudi alu enupete ngakiro a Akuj.

²⁶ Eliwor ngirwa ngulu ngesi eyuunere Ngisirael daang. Loger lo igiritere nagiran atamar, “Ebuni Ekayuunan alo Sion, elemari aronis analesea a Yakobo.

²⁷Kichikakin ayong ka kesi ngakiro nu na arimakinea ayong ngasechesea kech.”

²⁸Kona angerioto Ngiyaudi Ngakiro Naajokak, aliworosi kesi ngimoe a Akuj kotere esi ngibukui lu nyirai Ngiyaudi. Nakaneni kotere nikolong aseunea kesi Akuj, eraakasi kesi ngipaalon a Akuj kotere ta apakech.

²⁹Kainyo Akuj nyilochi ngakiro ani eya lukolong aseuni ngesi topia.

³⁰Ani esi ngibukui lu nyirai Ngiyaudi, ingerete kolong sek esi Akuj, nakaneni ianyut tokona esi akisienut a Akuj ani angerioto Ngiyaudi Akuj.

³¹Aloger alopei kangolo, kotere akisienut na ianyut esi, angero tokona Ngiyaudi Akuj, sodi taanyuneta kesi dang tokona akisienut.

³²Kainyo aen Akuj ngitunga daang ani engeritotor ngesi, sodi kisieniyoto ngesi ngitunga daang.

³³Ekoe, ejok noi ebari a Akuj! Nabo echwaana ngesi noi toos! Ngae epedori akisisaun ngakiro na edungunit ngesi? Ngae epedori akiyen eboyor keng?

³⁴ Loger lo igiritere nagiran atamar, “Ngae eyeni ngitamen a Ekapolon? Ngae epedori akitatam ngesi?

³⁵ Ngae alemiki ngesi ibore idio, ni ejoikinit ngesi etachi?”

³⁶ Kainyo erai kolong ngesi asubi ibore daang nabo erai agogongu keng ayakatar ngiboro daang, eraakasi ngikeng. Min apolou nia Akuj jik! Aamen.